Read Batak Dairi Jesaya 26 Bible Online

Jesaya 26 - Batak Dairi bible

Jesaya 26

¹Tikan ari i, iendèken jelma mo endè èn i tanoh Juda: “Soh mo ntegguhna kutanta; Dèbata sendiri ngo memahan bèntèngNa, isèn mo kita njuah-njuah.

²Pedalngah mo pèntu pengkeruhen, asa mbengket bangsa sidak setia, bangsa simengulaken lemmo atè Dèbata.

³Alè JAHOWA, kono ngo merrèken damè dekket kemenangen bai jelma sintegguh perukuren kumarna percaya ia baMu.

⁴Dak tong mo percaya bai JAHOWA, kerna JAHOWA Dèbata ngo dak-dak mengelènggemmi kita.

⁵JAHOWA ngo peteruhken jelma sindates roka; Ia ngo menggeppui kuta gotting kalak i ma janah ipedos dekket tanoh.

⁶Kalak ncor janah mpersuk mendedohisa.”

⁷Kalak bujur merdalan i dalan mpènter, kumerna ko ngo alè JAHOWA mengerentes dalan bana.

⁸Kuèkutken kami ngo kepantasenMu alè JAHOWA, janah kupèma-pèma kami ngo kono; kono ngo pojien dekket iketedohken ukur nami.

⁹Iketedohken ukurku ngo ko tikan berngin, itulusi ukurku ngo ko tikan siceggen. Mula ihukum kono tanoh èn luas ibettoh pengisi dunia mo bakunè ngo bennar.

¹⁰Mula pè mendè ibaing taba jelma jahat oda ngo nggèut ia mengguruken simerandal. I nagerri simendalanken hukum pè tong ngo ia bècuk, janah oda uè mengakui kuasa JAHOWA.

¹¹Alè JAHOWA, enggo kebbas ko menghukum musuhMu, tapi oda ibettoh kalak i. Gabè mèla mo kalak i janah malu mengidah masèh atèMu taba bangsaMu. Belli mo ripur kalak i ibaing hukum sienggo ipèmaken ko bai kalak i.

¹²Alè JAHOWA, kono ngo maing kami damè jah karina sikuulaken kami kono ngo mahanken i bainami.

¹³Nung ngo kami ikuasai tuan-tuan sidèban tapi pellin ko ngo kessa kuakui kami alè JAHOWA Dèbata nami.

¹⁴Enggo matè kalak i janah maknè nggelluh sumanganna pè oda nè kèkè mengolihi Kerna enggo ripur kalak i ibinasaken kono janah iapusken kono ipas pernèngèten nai.

¹⁵Ipeterrem ko kami merlipat ganda alè JAHOWA janah ipebellang ko nagerri nami kumarna mermulia ngo ko.

¹⁶Enggo ihukum kono kami; ibas tersessak tumulih kami taba ko janah mersodip kami taba ko, alè JAHOWA.

¹⁷Bagè daberru rabisen mengenat janah mendeherreng kerna mberniten, bagi ngo kami i hadeppenMu alè JAHOWA.

¹⁸Mbadan kami janah mengenat mberniten tapi oda lot menubuhken barang kadè; oda lot kuberrèken kami keluahen bai dunia, oda ma menambahi jelma pengisina.

¹⁹BangsaMu sienggo matè gabè nggelluh mengolihi bangkèna gabè kèkè mengolihi. Jelma sienggo ikubur i tanoh ngelluh nola dekket mersurak-surak. Bagè hembun pelamlamken tanoh, ipegelluh ko bangsaMu sienggo ndekkah matè.

²⁰Masuk mo ko mi bagesmu alè bangsangku, nai gerruk mo pèntu. Ciboni mo sinempas, mèma malap laga JAHOWA.

²¹Susur ngo JAHOWA i bekkasNa i sorga nai, lako menghukum jelma sinitanoh èn kumarna dosa kalak i. Siniulaken kalak i memunuh deket cara mboni-mboni gabè ipetarar. Oda nè iboniken tanoh i jelma simatè ibunuh.