Read Batak Dairi Jesaya 27 Bible Online

Jesaya 27 - Batak Dairi bible

Jesaya 27

¹Tupung ari i ipakkè JAHOWA mo pedangNa sintegguh janah ntajem lako menghukum Lewiatan, nipè simèot-èot janah mergolong-golong i, dekket memunuh naga laut.

²Tupung ari i idokken JAHOWA mo, “Endèken mo tersèngèt pekken anggurKu simerandal i.

³Aku JAHOWA, pertaramna; gennep tèk ngo dak kusiram, mahar ari berngin kujagai, asa ulang lot kalak mencèdai.

⁴Oda nè nggerrah atèngku. Mula pè lot dukut barang kopi-kopi, mèter kugogo mo i, janah kututung kerri karina i.

⁵Tapi mula itulusi janah culèndung bangku musuh-musuh ummatKu atèna mo merdamè kalak i dekket Aku, uè merdamè dekket Aku.”

⁶Ipodi ari bangsa Israel tosè bagè kayu merurat jah makin kambangna, janah idomi mo babo tanoh èn deket buahna.

⁷Ihukum JAHOWA pè bangsaNa, oda bagè mberrat hukumna bai bangsa-bangsa simemusuhi kalak i. Oda ngo bagè pemunuh taba musuhNa i pemunuhna taba bangsaNa.

⁸Ihukum JAHOWA bangsaNa merkitè ibuang kalak i mi nagerri sidèban. Ipuari ngo kalak i merkitè angin jahat i kebincaren nai.

⁹Tapi dosa kalak Israel ndorok iampuni pellin merkitè mula igiling kalak i melèmet bagè kapur langgaten bai gana-ganaen. Karina perdahupaen dekket pertanda Asyera kennah ngo ireppuk ma.

¹⁰Enggo melongo janah itadingken kuta gotting i bagè rambah lunglang. Meng- gagat janah mergempangen mo i sidi pinakan-pinakan ninganna menggagati kerri bulung bak dahan kayu.

¹¹Mula enggo kessa ngkerrah rantingna janah merbohoken, merohen mo mi sidi daberru-daberru lako kisebban. Oda lot kadè pemettoh bangsa i, gabè oda ikekelengi barang masèh atè Dèbata Situmempa midah kalak i.

¹²Tupung ari i ipedèmpu JAHOWA ngo bangsaNa mersada-sada, mulai i Laè Efrat nai soh mi perbalengen Mesir. Isirang ngo kalak i bagè kalak menirang pagè i roncina nai.

¹³Tupung ari i, mersora mo sarunè mbellen lako menenggoi balik karina kalak Israel sinibuang mi Assur dekket mi Mesir. Roh mo kalak i mi Jerusalem lako menembah JAHOWA i uruk simbadia.