Read Batak Dairi Jesaya 28 Bible Online

Jesaya 28 - Batak Dairi bible

Jesaya 28

¹Merjaya mo kuta sinièndèlken jelma permabuk Israel! Merulang mo kinimendèna bagè bunga males i babontakal kalak i. Merjaya mo kuta sinipajek ndates i tengah napa nggabur, sinièndèlken jelma-jelma sienggo mabuk kalohon.

²Ipasulak JAHOWA mo sada kalak simergegoh janah lubalang. Pekerohna pè bagè topan merdengan baho bagè udan gata-gutu janah mengeraja mengampuh. Merkitè paksa itembemken mo kalak i mi tanoh.

³Sinièndèl-èndèlken pengulu-pengulu simabuk i kennah ierrik.

⁴Ketermurmuren kuta kalak i sienggo mulai merulang i gabè mersèp. Nasipna bagè nasip buah kayu ara ntasak madèng tikkina; idah kessa, mèter ipotikken janah ipangan.

⁵JAHOWA Pergegoh Sisotercodi mo gabè bunga merandal bai bangsaNa sitading i.

⁶Iberrèken JAHOWA mo ukur adil bai karina hakim, janah keberanien taba jelma pertaram kuta, mula roh simenjuhap.

⁷Nabi-nabi bak imam pè mabuk kumarna mbuèsu mènum anggur dekket simperngis. Jumemba-jemba bak terdengdeng mo kalak i merdalan kumarna gulut pikirenna. Oda nèngè terarusen nabi-nabi alaten-alaten siniberrèken Dèbata bai kalak i. Imam-imam pè oda nè terputuskensa perkara siniaduken bana.

⁸Mèja kalak i dom utah-utah, gabè oda lot nè bekkas mpanting.

⁹Kekelsohen ngo kalak i tersèngèt aku, nina ngo, “Isè ngo ndia katèna siniajarenna èn? Isè pana memerluken penjelasenna? Idokdok ngo ndia kita èn anak-anak dèng rembaru sirang susu?

¹⁰Kasa pella iajar kita, kennah mengelètèri, membabah-babahi bak mengulaki sinidokkenna.”

¹¹Mula oda nggèut kènè mendengkohken katangku, ipasulak JAHOWA mo kalak sidèban mengajari kènè, legan pendokkenna janah laèn katana.

¹²Ihantari JAHOWA ngo bekkas mengadi bai ndènè karina, tapi oda uè kènè mendengkohkensa.

¹³Kumarna i ngo asa iajari JAHOWA kènè mersada-sada inang surat, kata bak kata, kalimat bak kalimat. Janah tergeppah bana tonggalak mo kènè tikan merdalan gabè ugahen, tersengkik janah tertaban.

¹⁴Dengkohken mo bakunè pendokken JAHOWA, alè pengerisak simemerèntah ginemgem i Jerusalem!

¹⁵Idokken kènè ngo enggo merpadan kè dekket kemagoen janah mersada kata dekket bekkas jelma matè. Ipastiken kènè ngo ukum olpek sinaing sempa i oda ngo bai ndènè sèmpa, kumerna akkal-akkal ngo ibaing kènè lako mengelègenni diri ndènè.

¹⁶Kumarnana idi bagèèn ngo pendokken JAHOWA, “Kubaing mo dangaen ntegguh janah ngkong i Sion; sada batu persoki maharga janah mersurat; ‘Barang isè tuhu-tuhu percaya, oda nggèut ia merkinisohna.’

¹⁷Ketègerren ngo Kubaing mahan sibar-sibar janah kebujuren Kubaing mahan tenali cipatu.” Kubaing mo udan baho lako mengampuh karina luap siniasangken ndènè i. Laè mengeraja mo menganun bekkas percibonien ndènè i.

¹⁸Padan ndènè dekket kemagoen bak persada kataen ndènè dekket bekkas kalak simatè kennah isondati, asa mula roh kessa olpek, merengep mo kènè idedohi.

¹⁹Dak isempa kemalangen mo kènè pukpuk, janah kennah igongken kènè mo i gennep ari, siceggen, rasari dekket berngin. Menggirgir mo kènè buradan, mula iarusi kènè tennah Dèbata.

²⁰Bagè jelma sinaing meddem ibas perratas kurang nggeddang mo kènè mahan bekkas pegalèken diri. Cabingna pè kurang mbellang menangkemmi daging ndènè.

²¹Kèkè mo JAHOWA tosè bagè i Delleng Perasim. Juhap mo ia tosè bagè i Napa Gibeon lako pesautken takiNa, imo taki kelengangen bai jelma! Ipesaut mo pemaingNa kelengangen i.

²²Enggo kudengkoh keputusen JAHOWA Pergegoh Sisotercodi membinasaken suberri aur. Ulang lèas ukurmu mendengkoh kata sikupesoh èn, asa ulang makin mahal iakap ko lako paluahken dirimu!

²³Dengkohken mo ranangku, peratè-atèken tennahku.

²⁴Sada kalak peruma-uma oda ngo dakdak terrus membajak, memangkur deket mengelotok tanohna lako isuani.

²⁵Mula enggo madam tanohna i, isaburken mo benihna, tah lenga barang daba. Iardangken mo dua bagè benih cingkerru merbaris-baris janah isuan mo i bidingna i suan-suaen sidèban.

²⁶Ibettoh ngo bakunè cara mengula, kumarna enggo iajari Dèbatana.

²⁷Oda ngo pengerrik ruah-ruahen i pakkè lako mengerrik lenga barang daling-daling pedati lako mengerrik daba. Palu-palu menahang ngo ipakkè.

²⁸Tikan mengerrik pagè, oda ngo dakdak ipalui nola gabè mereppuk. Oda! Ibettoh ngo bakunè carana mengerrik simendèna asa ulang mereppuk buah pagè i.

²⁹Kebijaken sibagidi bai JAHOWA Pergegoh Sisotercodi nai ngo rohna. Karina rencana JAHOWA, bijak ngo janah dak saut.