Read Batak Dairi Jesaya 29 Bible Online

Jesaya 29 - Batak Dairi bible

Jesaya 29

¹Merjaya mo Jerusalem sitergerar langgaten Dèbata! Merjaya mo kuta bekkas si Daud merundung-undung! Belli mo tahun i dak mergancih-gancih dekket pèsta-pèstana.

²Tapi roh mo tulbang mi kuta i ibaing Dèbata, gabè mendeherreng mo jelma janah meronangè. Selli kuta i merumang langgaten merlapu daroh.

³Ijuhap Dèbata mo kuta i janah ikubu kuliling.

⁴Tosè bagè bègu ngo Jerusalem dak pedengkohken sorana i terruh tanoh nai sora mali-ali ipas abu nai.

⁵Tapi karina jelma sidèban sikejam i mersep bagè cirabun barang abu ikabangken angin, sintempu ngo masa i janah oda èdep.

⁶Ipaluah JAHOWA Pergegoh Sisotercodi mo kuta i merkitè topan dekket rènur mahantu. Roh mo ibaing mengamuk topan dekket api.

⁷Nai galip mo karina soridadu simenjuhap dekket simengkubu kuta Jerusalem, kuta langgaten Dèbata, tosè bagè nipi berngin.

⁸Bangsa-bangsa simerpulung naing menjuhap Jerusalem, tosè bagè kalak melèhè, tapi ibas nipina mangan ia idah, nai ndungo mo ia keppè beltekna melèhè. Barang bagè kalak simuasen tapi ipas nipina mènum ia idah, nai ndungo mo ia tapi ngkerrah bergengna.

⁹Terrusken mo lengang dekket mètut ma- ta bagè kalak sipètung! Mabuk mo, tapi oda kumarna mènum anggur. Jumèbè-jèbè mo merdalan, tapi oda kumarna mènum simperngis.

¹⁰Tertunduh mo kènè ibaing JAHOWA janah lènek terpeddem. Ibalut mo mata nabi-nabi janah isangkemmi abè simerpendidah.

¹¹Mboni mo lapaten alamat bai ndènè nai tosè bagè bukku sinisègèl. Mula iembah bukku i taba sada kalak sipandè menjaka asa ijakaken bamu, dokenkenna mo, oda terbakinsa, kumerna isègèl ngo bukku i.

¹²Mula iembah taba siso mettoh surat, ialoi mo, oda ibettoh menjaka.

¹³Idokken JAHOWA, “Pellin kata ngo kessa kalak i menembah Aku, ukum ukurna ndaoh ngo bangku nai. Agama kalak i pè pellin hatoren jelma siniapilken ngo kessa.

¹⁴Kumerna i tersengget mo kubaing kalak i merkitè pukpuk kupalui. Gabè moto mo kalak simpantas janah karina kepantasen kalak i oda merguna.”

¹⁵Merjaya ngo jelma simemoni-moniken sura-surana bai JAHOWA nai! Sipsip ngo ibahanken kalak i, dok atèna sada kalak poda mengidah barang memettoh kadè siniulaken kalak i.

¹⁶Ipebalik-balik kalak i ngo karinana. Paina ngo perluen, tukkang koden ngo barang tanoh dendang? Ndorok ngo ndia terdokken siniteppa taba peneppana, “Oda ko meneppa aku”? Barang ndorok ngo ndia idokken siniteppa i tabasa, “Oda lot kadè terbaing ko?”

¹⁷Lot ngo umpama mendokken, “Oda ndekkah nèngè rambah gabè juma, janah juma mulak kembali rambah.”

¹⁸Tikan ari i kalak sitongkik pè mendengkoh kata ibas sada bukku sinijakaken, janah kalak sipètung sapatna èn nggelluh ibas gellap gabè merpendidah.

¹⁹Kalak ncor dekket merlèa mengolihi ndorok mengakapken kesennangen siniberrèken Dèbata Simbadia Israel.

²⁰Idi mo perpodi kalak simenèndes jelma sidèban bak mengelèai Dèbata. Ibinasaken Dèbata mo karina jelma perdosa i,

²¹jelma simendokken siso tuhu, jelma simenggera ihukum jelma perjahat, dekket kalak sipesarken berita-berita luap, asa ulang terolih ketègerren jelma bujur.

²²Kumarna i ngo asa ipaluah JAHOWA Dèbata Israel si Abraham, bagèndari idokken, “Alè bangsangKu, oda nè ilèai kènè, janah abè ndènè pè oda nè melangan kumarna mèla.

²³Kerna idah kè kessa mo dukak-dukak ndènè siKuberrèken bai ndènè, nai iakui kènè mo, aku ngo Dèbata simbadia Israel. Ipesangap kènè mo Aku janah merkebiaren bangKu.

²⁴Kalak simoto merguru mo mengarusi janah jelma sidakdak ngut-nguten gabè lolo iajari.”