Read Batak Dairi Jesaya 3 Bible Online

Jesaya 3 - Batak Dairi bible

Jesaya 3

¹Situhuna naing ibuat JAHOWA Pergegoh Sisotercodi ngo i Jerusalem dekket i Juda nai pangaan dekket ènumen. Bagi ma bang jelma asang-asangna i:

²lubalang dekket balapergunggung, sigantung puhpuh, nabi peralamat, dekket pengajari,

³ekuten soridadu, simpantasniasè, sipandè memerèntah, guru-guru dekket pertendung.

⁴Ipebangkit JAHOWA mo anak-anak perana gabè pengulu, janah lemmo-lemmo atèna mo memerèntah.

⁵Mersitèndessen mo samah-samah jelma. Ilèai simengudana mo situa-tua, ilèai anak-anak mo simbelgah.

⁶Tupung ari i ipebangkit jelma mo sada kalak kadè-kadèna janah nina mbangsa, “Kono nai ngo kessa merpakèen selloh, kumarnanai mbangkit mo ko gabè èkuten nami i jaman sidom kesusahen èn.”

⁷Tapi ialoi mo, “Oda guru-guru aku! Aku pè oda ma ngo lot pangaan dekket pakkèen bangku. Ulang pebangkit kènè aku gabè huntun bangsa!”

⁸Tuhu ngo, enggo ndabuh ukum Jerusalem! Juda pè enggo merumpak! Kumarna karina kata dekket pengelako kalak i mengalo JAHOWA dekket mengasangi kuasaNa.

⁹Pengelako jukkat kalak idi ngo menuduhken keja- hatenna. Inakkati kalak i ngo merdosa bagè kalak Sodom arnia. Merjaya ngo kalak i! Kalak i ngo perohken jaya mi dirina sendiri.

¹⁰Idokken JAHOWA mo, “Bagahken mo taba kalak simenguèi Aku sayurntua ngo kalak i. Kalak i mo sikipangan sinikerisken panasna.

¹¹Tapi merjaya ngo jelma perjahat! Ibalesken mo taba kalak i tosè bagè pemaingna taba sidèban.

¹²Itèndes sipebungaken kèpèng mo bangsangku janah ipetcek simenepcep daroh. Ilalingken penguluna mo ummatku gabè oda nèngè ibettoh siapai dalan sikennah dalanenna.”

¹³Enggo mo kebbas JAHOWA lako mengerungguken dekket mengadili bangsana.

¹⁴JAHOWA ngo menghukumi èkuten bangsana. Èn mo Tukas JAHOWA taba kalak i: “Kènè ngo mengerampasi hasil pekken anggur; enggo dom bagesmu harta sinirampasenmu bai jelma ncor nai.

¹⁵Kasa itèndes kènè bangsangKu janah memerroh jelma ncor? Aku JAHOWA Pergegoh Sisotercodi ngo mendokken i.”

¹⁶Nai idokken JAHOWA mo: “Ntuit kalohon ngo berru Jerusalem! Galgalen ngo kalak i, dakdak mengkèrdeppi janah tetulihen merdalan. Ipesèol-sèol perdalanna, nai kumerincing mo sora gellang nèhèna.

¹⁷Tapi kuhukum mo kalak i; sap buruk i takalna janah icukkur.”

¹⁸Roh mo tikkina ibuati JAHOWA mo pakkèen emmas bai daberru Jerusalem nai sinièndèlken kalak i, imo emmas pakkèen i takal, gellang nèhè, cimata,

¹⁹gellang tangan, tudung abè,

²⁰saong, kajimat i betekken dekket tali abak,

²¹cincin, sangketten i pènggel,

²²pakkèen mbara-mbèrèng, oles perdabaitak, baju merapi-api,

²³pakkèen melèmus, borgot dekket baju nggeddang.

²⁴Bagèndari kalak i merminak baungkus, podin èn bau macik mo kalak i. Tali abak kalak i igancihi mo i dekket tinali nggenggeng. Takal kalak i simerbuk merandal kennah icukkur. Pakkèenna mbara-mbèrèng i kennah igancihi mo i dekket rombèngen. Bagèndari mberru kalak i; podin èn meroha mo rupa kalak i kumarna icap.

²⁵Anak laki simergegohna pè matè i i pergerahan.

²⁶I babah pèntu pengkeruhen kuta mo kalak i merhendem ninganna derru-derru, janah kuta i pè tosè bagè daberru ikelanjangi kundul i tanoh.