Read Batak Dairi Jesaya 30 Bible Online

Jesaya 30 - Batak Dairi bible

Jesaya 30

¹Nina JAHOWA, “Merjaya mo pengulu-pengulu Juda kerna memberontak kalak i taba Aku. Iulaken kalak i ngo rencana siso rencanangKu. Ibahan kalak i ngo padan simeralo mi lemmo atèngKu. Nai mertinèncuk mo dosa kalak i.

²Laus kalak i mi Mesir oda lebbèen ikusoi aku. Culèndung taba Mesir ngo kalak i janah mengharapken pengurupin raja Mesir.

³Tapi terdehèrep ngo kalak i ibaing raja i, janah sondat ngo perculèndungen siniharapkenna i Mesir i nai.

⁴Kasi pè enggo soh utusen Juda mi kuta Soan dekket Hanes i Mesir,

⁵karina kalak i gabè mèla kumarna mengasangken bangsa siso merguna bai kalak i. Oda ngo peruntungen barang pengurupen dapet kalak i, tapi pengelèaen nola ngo.”

⁶Bagèèn ngo pendokken JAHOWA tersèngèt pinakan pinakan silot i selatan, “Ikebbasi utusen i ngo kalodè dekket unta kalak i merembah luah, nai ibellus kalak i mo nagerri dom mara sini-ianen singa, nipè merbisa dekket naga merkabeng. Luah i iberrèken kalak i taba sada bangsa siso terbaingsa mengurupi kalak i.

⁷Sia-sia sambing ngo pengurupi Mesir. Kernana i kubaing mo penggerarenken Mesir, ‘Naga siso merbahaya.’ ”

⁸Idokken JAHOWA ngo asa kusurat kejahaten bangsaNa ibas sada bukku mahan pernèngèten soh mi amman sumendah.

⁹Kumarna bangsa sidakdak memberontak ngo bangsa i taba Dèbata, perluap janah oda nung uè mendengkohken ajar JAHOWA.

¹⁰Nina kalak i ngo mbang nabi-nabi, “Sip ko! Ulang ranaken bai nami situhunna, tapi ranaken mo maing lolo kami mendengkoh. Belli kami dak tong merangan-angan.

¹¹Laus mo ko arap dalan sidèban. Ulang lolahi kami merkitè Dèbata simbadia Israel.”

¹²Kumarna i bagèèn ngo idokken Dèbata simbadia Israel, “Itulak kènè ngo katangKu janah mendersa dekket menipu ngo asang-asang ndènè.

¹³Kumernai salah ngo kènè. Tosè bagè dingding batu ndates ngo kènè, rettak i babo nai mi terruh; nai sintempu mo kènè merumpak.

¹⁴Mereppuk mo kènè bagè koden tanoh mpustak bana sarsar, gabè oda lot ceppik-ceppikna terbaing muat rara i ketaring nai barang menaku laè i bak nai.”

¹⁵JAHOWA sintèmbul i, Dèbata Israel Simbadia, mendokken taba ummatna, “Tobat mo kene janah menak mo kene, nai Kupaluah pe kene. Tok mo ukur ndènè baku ulang rembekbekken, nai kupetegguh pe kene.” Tapi oda kene uè.

¹⁶Gabè mertaki ngo kènè lako mperrus bai musuh nai merkitè memasang kuda mergegoh lojang. Selloh! Tuhu ngo kennah mperrus ngo kènè luas. Idokdok kè ngo pana enggo nderras perlojang kuda ndènè i, keppèken nderrasen dèng ngo simenjalang kènè.

¹⁷Seribu kalak mperrus kumarna asup sada kalak musuh, janah kumarna pengasup lima kalak, mperrus mo kè karina. Ibas soridadumu nai pellin sada tihang bendèra mo kessa tading i babondelleng.

¹⁸Kasi pè bagidi, dak ipèma-pèma dèng ngo ketikana lako pacidahken masèh atèna bai ndènè. Dak masèh ngo atèna midah kènè. Kerna Dèbata simemaing toko ngo JAHOWA i. Sayurntua ngo jelma simengharapkensa.

¹⁹Kènè alè simerian i Jerusalem, oda ngo dak terrus kènè tangis. Mermasèh atè ngo JAHOWA janah ndor ngo ialoi kènè mula tenggo-tenggo kènè mengido urup tabasa.

²⁰Iberrèken JAHOWA ngo bai ndènè tikki pengojien mbotong lako mengajari kènè. Tapi ukum bagèndari ia sendiri ngo mendengani kènè gabè iakapken kènè mo enggo rebbak kènè dekketsa.

²¹Mula menurimpang kènè arap dalan, mèter terdengkoh mo soraNa i podimu nai mendokken, “En ngo dalan; èkutken mo dalan èn.”

²²Karina gana-ganaen ndènè merlampis pirak dekket emmas, iambongken kènè mo bagè ceggah ninganna mendokken, “Laus ko bangku nai!”

²³Mula iardangken kènè bennih, mèter itenges JAHOWA mo udan asa turah bennih i janah menghasilken peranien mbuè kalon. Gagaten pinakanmu pè hantar mo jampalen mbellang.

²⁴Lembu jenggi dekket kalodè simembajak jumamu kipangan panganen pinakan simendèna kalon sienggo ipèmaken jaè-jaè.

²⁵Tupung ari bèntèng-bèntèng musuhmu ikubu janah ibunuh kalakna, mercikal mo laè i gennep delleng dekket uruk-uruk nai.

²⁶Bulan mercuhaya bagè mataniari, janah mataniari pitu kali lempit nterrangna ipas cemmalna nai kin, tosè bagè nterrang pitu ari ipepulung gabè sada. Masa ngo karina i tupung ibalut janah ipemalum JAHOWA ugah bangsaNa sienggo irotan.

²⁷Taridah mo i sindaoh nai kuasa dekket kehejien JAHOWA. Api dekket cèmber pertanda pungurNa. Mengerana ngo ia dekket kalak i, janah kata-kataNa menutung bagè api.

²⁸Ipasulak ngo angin solo-soloNa bagè laè mengeraja soh mi bergeng lako mengampuh karinana. Ibinasaken ngo bangsa-bangsa janah isondati taki-taki jahat kalak i.

²⁹Tapi ukum kènè bangsa Dèbata, mersampang atè mo janah merendè bagè tikan berngin pèsta agama. Mersampang atè mo kènè bagè kalak simerdalan merdengan sora sordam mendahi Bages JAHOWA, simenampati Israel.

³⁰Ipedengkohken JAHOWA mo soraNa simeheji i, janah gennep jelma mengakapken kuasaNa mahantu i. LagaNa maing roh api mengelekkup, udan gata-gutu, baho dekket kalisungsung.

³¹Gontar mo kalak Assur idengkoh kessa sora JAHOWA dekket mengerasaken hukumNa simbotong i.

³²Sinderrang igongken dèba pemaluNa ukum bangsa JAHOWA mersennang-sennang, mergenderrang bak merkucapi. Dèbata sendiri mo mergeraha mengalo kalak Assur.

³³Arnia nai ngo enggo ipèmaken bekkas menutung raja Assur. Mbages ngo bekkas i janah mbellang, sin sebban mertènjun. Iembusken JAHOWA mo kessahNa lako mengelakati, tosè bagè laè barèrang.