Read Batak Dairi Jesaya 31 Bible Online

Jesaya 31 - Batak Dairi bible

Jesaya 31

¹Merjaya ngo kalak si laus mi Mesir lako mengido pengurupien! Iasangken kalak i ngo gegoh tenterra Mesir dekket tenterra merkuda dekket kuda simergegoh i bak kurètana simbuè i. Tapi oda percaya kalak i bai JAHOWA Dèbata Simbadia Israel janah oda ipido pengurupiNa.

²Ai bijak ngo JAHOWA janah ibettoh ngo kadè sipatut bahanenna. Ipemasa ngo olpek janah ipesaut ngo asupNa lako menghukum kalak perjahat dekket kalak simengurupi kalak i.

³Ai jelma ngo kessa kalak Mesir i, oda ngo Dèbata. Pinakan kalak i pè pinakan biasa ngo, oda ngo lot kedèbatanna. Kessa kin ngo memalesken JAHOWA terhantuk mo bangsa pengurupi i janah geppah mo bangsa siniurupenNa i. Nai binasa mo kacimbang-mbellahna.

⁴Idokken JAHOWA ngo bangku, “Tosè bagè singa merngengngeng mempertahanken jinerngemna, oda ikebiari surak pulungen permakan siroh lako mengalosa, bagi ma ngo Aku juhap mempertahanken Uruk Sion.

⁵Tosè bagè sada manuk-manuk mengkurpas- kurpasken kabengna i babo asarna, bagi ngo Aku JAHOWA Pergegoh Sisotercodi lako mengelègenni, mempertahanken dekket paluahken Jerusalem.”

⁶Idokken JAHOWA, “Alè bangsa Israel, enggo ialo kènè Aku janah enggo merdosa kènè taba Aku. Tapi balik mo kènè bagèndari taba Aku!

⁷Dapet mo tikkina karinana mo kènè mematakken gana-gana pirak bak emmas sinigana ndènè sendiri ibagasen dom dosa.

⁸Assur pè ibinasaken ngo tikan geraha, tapi oda merkitè gegoh jelma. Mperrus mo kalak Assur i perjuhapen nai, janah siposona dèng kalak i ibaing mo gabè hamba.

⁹Mperrus mo raja kalak i kumerna buradan. Lubalangna pè tersengget mo, nai itadingken kalak i mo pertanda geraha.” JAHOWA ngo mendokken i. JAHOWA sinisembah janah ipesangap merkitè pèlèen situtungen i Jerusalem.