Read Batak Dairi Jesaya 32 Bible Online

Jesaya 32 - Batak Dairi bible

Jesaya 32

¹Tengen mo roh nè mo tikkina memerèntah sada kalak raja adil janah pengulu-pengulu bangsa pè mengulaken ketegerren.

²Karina kalak i tosè bagè bekkas culèndung ipas angin bak udan sapa-sipu nai. Tosè bagè laè marir mi padang gurun ngo kalak i, bagè batu mbelgah mahan perculèndungen i tanoh ndagal.

³Oda itutup mata kalak sindorok menengen, janah sin- dorok mendengkoh kennah memperatè-atèkensa.

⁴Kalak siradu-rudu tikala i gabè sobar janah idomi pengantusien. Jelma jèjèt pè gabè seppè mo mengerana.

⁵Jelma moto oda nè ma mo iètong mersangap janah jelma penipu oda nè ma mo iètong kalak bujur.

⁶Dak mengeruapken kemotoen ngo jelma moto janah menura-nurai kejahaten. Barang kadè sambing iulaken dekket iruapken merumangken pengelèaen taba Dèbata. Oda nung ia merèken mangan kalak simelèhè barang merrè mènum kalak simuasen.

⁷Salang kalak penipu memikiri janah mengulaken kejahaten. Dak itulusi ngo dalan lako mencilakaken kalak sincor merkitè kata luap janah menjagaken kalak i asa ulang lot hakna.

⁸Tapi ukum kalak simerpengelako bujur, dak menura-nurai kebujuren janah mengulaken simerandal.

⁹Dengkohken kènè mo alè daberru-daberru pernggelluh sennang, siso pendikèi ibas kesusahen!

¹⁰Bagèndari ndorok mo mènak iakap kènè, tapi kira-kira sitahun nai mendellè mo kènè, kumarna oda merbuah anggur, janah suan-suaen sidèban pè oda lot merbuah.

¹¹Soh bagèndari sennang ngo nggelluh ndènè, oda pendikèi ibas kesusahen. Tapi bagèndari menggirgir bana buradan mo kènè! Talkasi mo pakènmu janah abitken mo laklak mi abakmu.

¹²Tangisi mo tahumamu singgabur i dekket pekken-pekken anggurmu simerbuah rombang-rambing i,

¹³kumerna sap ngo turah dukut bak kopi-kopi i tanoh bangsangku. Uè, tangisi mo karina bagesmu bekkas jelma mersennang-sennang dekket kuta sidom oang-oang!

¹⁴Ai gabè itadingken mo istana janah gabè longo-longo mo kuta sabungen si rami kin. Uruk bak pantar perjaga enggo ipedos bak tanoh soh mi amman sumendah. Kalodè-kalodè simeriar dekket biri-biri nai ngo mentas janah menggagat i sidi.

¹⁵Tapi naing roh mo sikali nai Dèbata merdengan kuasaNa. Nai gabè nggabur nola mo gurun pasir kin, janah tosè bagè rambah mbellen mo idahen tahuma.

¹⁶Gabè lot mo ketègerren dekket keadilen i suberri aur.

¹⁷Gennep jelma mengulaken kadè bennar, maing gabè lot sampang atè dekket kemènaken soh mi amman sumendah.

¹⁸Maluah mo bangsa Dèbata i kesusahen nai janah nggelluh i bekkas mènak oda kadè kurang.

¹⁹Sondel mo sampang atè ndènè karinana kumerna enggo lot cukup laè mi suan-suanenmu, janah pinakanmu ndorok menggagat barang i dikè sambing oda mermara. Tapi ukum musuhmu tosè ngo bagè rambah itinggang baho janah kuta kalak i pè naing irumpakken.