Read Batak Dairi Jesaya 33 Bible Online

Jesaya 33 - Batak Dairi bible

Jesaya 33

¹Merjaya mo karina musuhta! Menamun ngo kalak i, kasi pè oda isamun dèba, janah menelbuh ngo kalak i, kasi pè oda iselbuh dèba. Tapi enggo kessa menamun bak menelbuh gabè mengenna nola mo taba kalak i penamun dekket penelbuhna i.

²Ialè JAHOWA masèh mo atèmu bai na- mi. Kono ngo kessa kuharapken kami. Ja- moti mo kami i ari nai mi ari janah paluah mo kami tikan tersessak.

³Mula kèkè kono ninganna pedengkohken soraMu merginoling, mperrus janah sompar-baèr mo karina bangsa.

⁴Tosè bagè nuhnuhen balang mo kalak mengayaki bak memangus harta kalak i.

⁵Meheji kalohon ngo JAHOWA; Ia ngo sidasa karinana silot. Ipecèndek mo hukum dekket ketègerren i Jerusalem

⁶janah memerèken kemènaken bai bangsaNa. Harta sipaluahken kalak i imo kebijaken dekket perbinettohen bak pesangapken JAHOWA.

⁷Jelma mergegoh janah berani dilo-dilo mengido urup; pasulakken simengusahaken perdamèen tangis semep-semep.

⁸Dalan-dalan mbellen sondel mermara dungna gabè melongo; oda lot nèngè jelma mentas i sidi. Padan pè ilausken janah sienggo iuèi kin pè gabè imadaken. Oda lot nèngè isarihken.

⁹Lebbuhna itadingken gabè melongo. Rambah uto-utoen Libanon gabè icubelli janah Napa Saron singgabur i kin gabè tanoh dakkir. Merurus mo karina bulung i Basan bak i Delleng Karmel.

¹⁰Idoken JAHOWA mo mbang bangsa i, “Kèkè mo Aku bagèndari janah kupacidah mo kuasangKu.

¹¹Sia-sia karina sura-suramu, janah karina sinibaingmu i oda lot gunana. Lagamu i tosè bagè api mengelekkup dirimu sendiri.

¹²Tosè mo kènè bagè batu karang sinitutung mahan kapur; bagè rambah dori sinirabi bak itutung mi api.

¹³Asa karina kalak sindessing bak sindaoh mendengkoh tersèngèt pemaingKu i janah mengakui kuasangKu.”

¹⁴Kalak simerdosa i Sion buradan janah menggirgir. Nina kalak i mo, “Tosè bagè api mergollah-gollah soh mi amman sumendah ngo keputusen Dèbata. Lot ngo ndia kalak ndorok menggongken ibagasen api simengelettup kerri i?”

¹⁵Tergongken kènè ngo i mula ntèger ngo rana bak pengelako ndènè. Ulang buat kènè laba merkitè mengkilang kalak sincor, janah ulang jalo kèpèng sisip. Ulang dengani kalak simertaki memunuh barang kejahaten sidèbanna i.

¹⁶Nai terjamoten mo kènè janah mènak, tosè bagè merian ibas bèntèng ntegguh. Mèma mo bamu pangaen bak ènumen.

¹⁷Roh mo tikkina idah kènè mo sada kalak raja memerèntah ibagasen sampang atè i nagerri arur mi Dèsa siualuh i.

¹⁸Buradanmu sienggona kin midah kalak pertunggu cokè, pengulu dekket mandur, pellin bagè sukut-sukuten nai ngo kessa i.

¹⁹Oda nèngè mo idahen ndènè kalak sidèban siso meradat mengerana ibas kata siso niantusen ndènè.

²⁰Tatap mo kuta Sion, bekkasta mengerayaken pèsta-pèsta agama. Tatap mo Jerusalem! Sondel kinimènak ngo bekkas i mahan ianen, tosè bagè undung-undung siso nung ilompat, patokna oda nung iberkat janah èkètna oda nung nggettap.

²¹Ipacidah JAHOWA mo kehejienNa banta. Merian janah nggelluh i biding laè mbellang mo kita, siso ndorok ilayari keppel musuh.

²²Karina perkekkas keppel kalak i oda lot kasèana; layar-layarna oda ndorok ipekimbang! Karina harta soridadu musuh sirampasi, janah oda lang-lang buèna, kalak sipangpangen pè terolih.

²³JAHOWA sendiri mo gabè rajanta; Ia mo memerèntah, pecèndekken hukum dekket paluahken kita bai musuhta nai.

²⁴Sada kalak nè poda lot mendeherreng i nagerrinta kumarna sakit, janah karina dosa ngo iampuni.