Read Batak Dairi Jesaya 34 Bible Online

Jesaya 34 - Batak Dairi bible

Jesaya 34

¹Roh mo kènè pulung, alè karina bangsa, janah dengkohken mo. Suberri dunia bak karina singgelluh ibagasenna mo roh lako mendengkohken.

²Melaga ngo JAHOWA taba karina bangsa bak taba soridadu kalak i. Ihukum mo kalak i janah ibinasaken.

³Karina bangkè kalak i pè oda nè itanem, tapi ibelli sambing mo bagi macik janah mbau. Delleng-delleng pè gabè mbara kumarna sap daroh kalak i.

⁴Mataniari, bulan dekket bintang-bintang gabè melala. Langit pè ibalun bagè balunen kertas. Bintang i pè merdabuhen tosè bagè bulung kayu merurus.

⁵Enggo ipèmaken JAHOWA pedangNa i sorga, janah bagèndari mo pedang i naing mengenna taba bangsa Edom sienggo idabuh bana hukum janah naing iripasken.

⁶Merguyu daroh bak pessoh kalak i mo pedang JAHOWA tosè bagè daroh bak pessoh pinakan pèlèenken. Kumara ipèmaken JAHOWA ngo pèlèen i Bozra janah mengeradasken nterrem kalohon i tanoh Edom.

⁷Mermatèen mo jelma bagè lembu meriar dekket lembu bajar. Mbara mo nagerri kalak i kumarna daroh bak dom pessoh-pessoh.

⁸Idi mo tikkina ibèla JAHOWA kuta Sion janah memales dendam taba musuh-musuhNa.

⁹Batang laè silot i Edom mobah mo gabè tèr, janah tanohna gabè balerang. Dungna lakat mo karina nagerri i bage tèr.

¹⁰Mahar ari berngin oda mèntep simergollah i, janah mercèmpul mo cèmber bana nai soh mi amman sumendah. Itadingken mo rumar janah ngkerrah-kerring tanoh i mercundut-cundut, sada kalak poda lot nèngè mentas i sidi.

¹¹Sibongkel dekket ndoriin mo mengiani, lengkupa dekket kak mo merian i sidi. JAHOWA ngo maing tanoh i gulut janah numar tosè bagè sinderrang makdèng ihanaken.

¹²Oda lot raja memerèntah nagerri i, janah enggo mersep karina penguluna.

¹³Pengkeruhen dekket kutana sigotting i gabè dom mo dori dekket dukut merturahen, janah biang rambah nai ngo merian i sidi dekket sibongkel.

¹⁴Binatang pengago mo kumetcaho ibagasenna; bègu mersialo-aloen, janah bègu berngin menulusi bekkas mentadi.

¹⁵I sidi ma mo nipè merbisa memahan bekkasna, menaruh, meddemken, dekket memiara anakna. Kalompinis pè merpulung rebbak dekket denganna gennep.

¹⁶Siahi janah jakai mo ibas Lapihen JAHOWA: Sada potang ibas karina simenggormit sinihanaken i nai mersep-mersep bagi barang mak lot denganna.

¹⁷JAHOWA ngo simemellaken nagerri i bai kalak i, janah karinana ngo menjalo perbagien olihna. Merian i sidi mo kalak i soh seggen janah gabè milik kalak i mo tanoh i turun-tumurun.