Read Batak Dairi Jesaya 35 Bible Online

Jesaya 35 - Batak Dairi bible

Jesaya 35

¹Padang gurun bak tanoh ngkerrah gabè meroang-oang nola, bunga-bunga merkèrbangen i rambah lunglang.

²Padang gurun rarat muat bellangna, janah merdèmbas merkitè endè lolo-atè. Kinimendèna tosè bagè Delleng Libanon rupana tosè bagè Napa Karmel bak Saron. Nai karina jelma mo mengidah kuasa JAHOWA bak kehejien kuasa Dèbatanta.

³Petegguh mo tangan sièangen janah petegguh tèun kalak simerongkah.

⁴Dokken mo taba kalak perukur ndotè, “Pos atèmu, mada mbiar, Roh mo Dèbatamu lako menghukum musuh, roh ngo Ia lako paluahken kènè.”

⁵Sinderrang permasana i, gabè merpendidah mo kalak sipètung, janah merpendengkoh kalak sitongkik.

⁶Mangkat-mangkat mo bagè balkih kalak sipang-pangen, lolo mersurak-surak kalak sipekkak. Kumarna mercikal-cikal mo laè mata-mata i gurun pasir, batang laè menjarir i rambah kelongoen.

⁷Kersik nggara kin gabè bendar mornak-ornak tanoh dakkir kin gabè takal laè. Bekkas siniianen sorigala kin, gabè merturahen nola arngo bak pandan.

⁸Lot nola mo i sidi dalan mbellen, “Dalan mi keluahen” gerarna. Jelma perdosa oda ndorok mentas i sidi, jelma moto oda nè mengelalingken jelma mentas nisidi.

⁹I bekkas i oda lot nèngè singa barang binatang pengago sidèbanna. Jelma sinipaluah JAHOWA ngo kessa merdalan i sidi.

¹⁰Molih mo karina jelma sinipaluah JAHOWA ibengketti kalak i mo Jerusalem ninganna meroang-oang abè kalak i pè mbinar kumarna tettap merukur sennang. Mersampang atè mo kalak i janah merèah-èah; bonek bak kekelsohen enggo mersep janah sudah.