Read Batak Dairi Jesaya 36 Bible Online

Jesaya 36 - Batak Dairi bible

Jesaya 36

¹Ibas tahun pesipuluhempatken pe- merèntahen si Hizkia raja Juda, ijuhap janah italuken si Sanherib, raja Assur mo kuta simerbèntèng silot i Judea.

²Enggo kessa i ipasulak mo pakalimana i Lakhis nai mi Jerusalem merdengan lahlah soridadu lako mendokken asa menerrah Raja Hizkia. Soh mo kalak i mi kuta i janah memuat bekkas i juma sinigeraren Juma Perrabit, i gembar baruren simengarirken laè bendar sikan uruk.

³Nai roh mo tellu kalak pugabè si Hizkia menjumpai pakalima Assur i. Sitellu kalak pugabè i imo si Eliakim anak si Hilkia èkuten perkebbas istana, si Sebna krani kerajaen, dekket si Joah anak si Asap, krani istana.

⁴Nina pakalima Assur i mo taba kalak i, “Sohken mo rana raja Assur èn mbang si Hizkia, ‘Kasa mahantu ko dok atèmu?

⁵Idok ko ngo ndorok pellin rana sambing menggancihken siasat dekket gegoh tenterra? Isè iasangken ko asa pang ko mengalo Assur?

⁶Pengurupien Mesir ngo iharapken ko, tapi tosè bagè mertongketken sanggar ngo ukum i; — mbohok mo nahan tongketmi janah gabè ijuluk mo tanganmu. Bagidi mo raja Mesir bai karina kalak simengharapkensa.’ ”

⁷Nai idokken pakalima Assur i dèng ma, “Barang tah dok atèmu mengharapken Dèbata JAHOWA ngo kènè? Otang tikan iperèntahken si Hizkia taba kalak Juda dekket taba kalak Jerusalem asa pellin i hadeppen langgaten i Jerusalem ngo kessa mersembah, keppèken langgaten sinicèdakenna i bekkas mersembah JAHOWA sendiri?

⁸Bagèndari aku pang mertaruh merkitè gerar raja Assur, mula pè iberrèken bai ndènè dua ribu kuda, pasti oda nè lot cukup kalakna lako memasang.

⁹Lako mengalo èkuten soridadu Assur siperteruhna sambing pè oda lot sandingna bai ndènè nai. Tapi kasi pè bagi dak iharapken kènè dèng ngo Mesir pasulakken pengurupi imo kurèta perang dekket tenterra merkuda!

¹⁰Tah idok kènè ngo oda merdenganken JAHOWA kami lako mengalo bak menaluken kènè? JAHOWA ngo peberkatken kami lako menjuhap dekket mengelalasa.”

¹¹Nai nina si Eliakim, si Sebna dekket si Joah mo taba pakalima Assur i, “Alè Tuan, merkata Aram mo kènè taba kami, ai kuantusi kami ngo. Ulang mo kènè merkata Heber, asa ulang pella iarti ginemgem sinibabo pagar batu kuta idi.”

¹²Ialoi pakalima Assur idi mo, “Idokdok kènè ngo pana pellin taba kènè dekket bai raja ndènè sambing kessa aku iutus raja Assur lako pesakatken èn karinana? Oda! Dekket ngo bai ginemgem sikundul rebbak dekket kènè i babo pagar batu i aku mengerana, imo sinaing kipangan ceggahna sendiri dekket mengènum laè niènumna sendiri.”

¹³Nai cènder mo pakalima i janah mendiloken ibas kata Heber, “Dengkohken kènè mo bakunè pendokken raja Assur,

¹⁴‘Ulang kènè uè ioto-otoi si Hizkia! Oda terpaluahsa kènè!

¹⁵Ulang dengkohken kata-katana lako mengharap taba JAHOWA. Ulang dok atèmu ipaluah JAHOWA kènè barang menggerra soridadu Assur lako menaban kuta ndènè.

¹⁶Ulang dengkohken si Hizkia! Aku, raja Assur mendokken, asa karuar kènè i kuta nai janah menerrah. Asa mènak kènè kipa- ngan buah anggur i pekken ndènè sendiri nai janah mengakapken kinitaboh buah terutung sinisuanmu sendiri, janah mengènum laè i telagamu nai,

¹⁷mèma kulompat kènè mi sada nagerri tosè bagè nagerri ndènè èn. Lot ngono i sidi pekken anggur menghasilken anggur bai ndènè dekket juma pagè lako menghasilken nditak panganen ndènè.

¹⁸Ulang dengkohken si Hizkia! Pellin lako mengoto-ngotoi kènè ngo ia merkitè katana JAHOWA nina paluahken kènè. Nung ngo idah kènè sembahen bangsa sidèban i paluahken nagerrina ibas kuasangku nai?

¹⁹Idikè ngo sembahen nagerri Hamat dekket Arpad? Idikè ngo sembahen Sefarwaim?

²⁰Lot ngo roh paluahken Samaria? Sembahen siapaina nung paluahken nagerrina ibas kuasangku nai? Oda terpaluah JAHOWA Jerusalem!’ ”

²¹Mendengkoh i, sip ngo karina pengisi Jerusalem, kumarna enggo iperèntahken Raja Hizkia asa sip sambing kalak i.

²²Nai iribakken si Eliakim, si Sebna dekket si Joah mo olesna kumarna bonekna, nai laus mo kalak i memagahken taba raja i, karina siniruapken pakalima Assur i.