Read Batak Dairi Jesaya 37 Bible Online

Jesaya 37 - Batak Dairi bible

Jesaya 37

¹Idengkoh Raja Hizkia kessa mo su- kuten bai sitellu kalak i nai, iribaki mo olesna, ipakkè mo laklak tandana bonek, nai laus mo ia mi Bages JAHOWA.

²Nai ipasulak mo si Elyakim mi istana, bagi ma si Sebna sèkretaris kerajaen dekket imam-imam simerpangkat lako mendahi Nabi Jesaya, anak si Amos. Kalak idi pè memakè laklak ma ngo.

³Bagèen mo tennah si Hizkia sibagahenkenna taba si Jesaya, “Ari bonek atè ngo ari èn; ihukum ngo kita janah ilèai. Codi mo kita bagè daberru sirabisen, tapi enggo kerri gegoh.

⁴Enggo iutus Raja Assur pakalimana lako mengelèai Dèbata singgelluh i. Tah bakunè enggo idengkoh Dèbata JAHOWA pengelèaen i janah ihukum kalak simengeruapken i! Kumernana i mersodip mo ko taba JAHOWA lako mengkelini bangsanta singgelluhna dèng.”

⁵Enggo kessa soh tennah Raja Hizkia i,

⁶ipasulak si Jesaya mo utusen i lako magahken pengaloina bagèen, “Idokken JAHOWA ngo, ulang pella ringgodoren raja i mendengkoh rana hamba-hamba Raja Assur i mendokken oda nina terpaluah JAHOWA kita.

⁷Ipemasa JAHOWA ngo asa igermetken Raja Assur berita maniparpar asa mulak ia mi nagerrina, janah i sidi mo ia terbunuh.”

⁸Soh mo berita bai pakalima Assur i magahken enggo laus rajana i Lakhis nai janah sidang mergeraha mengalo kuta Libna, oda pella ndaoh i sidi nai. Nai laus mo ia mi sidi lako mendahi rajana i.

⁹Soh ma mo berita bai Raja Assur magahken enggo roh soridadu Mesir iuluken si Tirhaka i Sudan nai lako menjuhap kalak i. Kumarna i, itengesken Raja Assur mo suratna taba si Hizkia,

¹⁰raja Juda. Bagèen mo kata surat i, “Ulang tok kono mi bagah-bagah Dèbata siniasangken mi mendokken oda tertaban aku kono.

¹¹Enggo ngo idengkoh kono beritana karina kuta sinijuhap raja-raja Assur irabbatken ngo karinana. Ulang idok kono ndorok kono maluah.

¹²Tikan irabbatken empungku kuta Gozan, Haran dekket Rezef, bak memunuh jelma pengisi Eden simerian i Telasar, sada poda lot sembahen kalak i paluahkensa.

¹³Idikè ngo raja-raja kuta Hamat, Arpad, Sefarwaim, Hena dekket Iwa?”

¹⁴Ijalo si Hizkia ngo surat i bai utusen i nai janah ijaka mo. Nai laus mo ia mi Bages JAHOWA, ipekimbang mo surat i i hadeppen JAHOWA,

¹⁵nai mersodip mo ia, nina mo,

¹⁶“Alè JAHOWA Perkuasa siso lot codina, Dèbata kalak Israel, simerian i babo kerub, kono ngo kessa Dèbata simengkuasai karinana kerajaen i babo tanoh èn. Kono ngo menghanaken langit dekket tanoh èn.

¹⁷Alè JAHOWA, tengen mo karina sienggo sempa bai nami. Dengkohken mo karina pengelèai Sanherib i mbang kono alè Dèbata singgelluh i.

¹⁸Karina ngo kami memettoh alè JAHOWA, enggo mèduk bangsa iripasken Raja-raja Assur dekket nagerrina pè.

¹⁹Sembahen gana-gana kalak i pè ilekkup janah ilala ngo, kumarna cituk poda lot kuasa sembahenna i. Pellin gana-gana ipas kayu bak ipas batu sinigana jelma ngo kessa i.

²⁰Alè JAHOWA, Dèbata nami, paluah mo kami bai kalak Assur i nai, asa ibettoh suberri bangsa i dunia èn pellin kono ngo kessa JAHOWA.”

²¹Nai itennahken si Jesaya mo taba Raja Hizkia pengaloi sodip raja i,

²²nina JAHOWA, “Itaba-tabai janah ipekia-kia Jerusalem mo ko alè Sanherib!

²³Ibettoh kono ngo barang isè sinisumpahen dekket sinilèaennmu? Aku, Dèbata kalak Israel, Dèbata simbadia i ngo.

²⁴Ipasulak kono ngo utusenmu lako merkata tunggang, nimu merkitè buè kurèta perangmu ipetunduk kono ngo delleng-delleng sindatesna i Libanon. Gabè imanggangken kono ngo enggo itabahi kono kayu arèsna singgeddangna kalohon janah sitermendèna, ninganna menekkat rambah siuto-utoenna.

²⁵Ièndèlken kono ma ngo ikurak kono sumur dekket mengènum laè i nagerri sidèban dekket soridadumu mengelucak batang Laè Nil sanga ngkerrah.

²⁶Oda ngo nung idengkoh kono, karinana idi sienggo kudokken kin ngo i mulai arnia nai? Janah bagèndari kupesaut mo. Aku ngo memerrèken kuasa bamu lako mengelala karina kuta gotting i gabè empak-empak sompar-baèr.

²⁷Jelma simerian i sidi mak mergoldè; tersengget mo kalak i janah gontar buradan. Tosè bagè alah-alah i jampalen mo kalak i barang bagè dukut siturah i saong bages, gabè mperra mula isempul angin nggara i kebincaren nai.

²⁸Tapi kubettoh ngo karinana tersèngèt dirimu. Kubettoh ngo ulah-ulahmu dekket barang pak dikè kono laus. Kubettoh ngo melaga kalohon kono bangku,

²⁹janah enggo kudengkoh tersèngèt laga bak kejukkatenmu i. Bagèndari pè kuingkir-ingkir mo ègungmu janah kukontam babahmu, asa kuiring kono balik arap dalan sinibellusmu tikan roh i kin kono.”

³⁰Itennahken si Jesaya dèng ma ngo bak rana èn taba si Hizkia, “Enda mo gabè tanda-tanda bamu. Tahun èn dekket tahun siroh kipangan hasil pagè turahken bana mo kalak. Tapi enggo kessa i ndorok mo kalak i mardang dekket menuan anggur janah kipangan hasilna.

³¹Nduma mo kalak Juda singgelluhna dèng tosè bagè suan-suaen mbages kalohon uratna janah merbuahi.

³²Lot ngo jelma njuah-njuah i Jerusalem dekket i babo delleng Sion, kumarna JAHOWA Perkuasa Sitermurmur i ngo enggo menentuken kennah masa bagidi.

³³Bagèen ngo pendokken JAHOWA tersèngèt raja Assur: ‘Oda ndorok mbengket ia mi Jerusalem barang pè menèmbakken panah mi kuta i. Soridadu simertambeng pè oda ndorok mendessingi kuta i, janah oda ndorok ibahan palas pengepungen.

³⁴Kennah balik raja Assur arap dalan sinibellusna tikan roh i, janah oda terbengketensa kuta i. Aku JAHOWA ngo mengeruapken i.

³⁵Kukelini janah kujamoti ngo kuta Jerusalem kumernaken gerarku sendiri dekket kumerna padanku dekket naposongku si Daud.’ ”

³⁶Bernginkenna i ma susur mo malaèkat JAHOWA mi perundung-undungen kalak Assur, janah memunuh 185.000 kalak soridadu. Njengkas sibarembenkenna mergamparen mo bangkè kalak i.

³⁷Nai sondar mo si Sanherib raja Assur janah balik mi Niniwe.

³⁸Tikan sidari sinderrang mersembah ia i bages sembahen Nisrokh, ibunuh dukak-dukakna si Adramelekh dekket si Sarezer mo ia merkitè peddang. Enggo kessa i mperrus mo kalak i mi delleng Ararat. Nai mbangkit raja mo anakna si Esarhadon ancihna.