Read Batak Dairi Jesaya 38 Bible Online

Jesaya 38 - Batak Dairi bible

Jesaya 38

¹Oda pella ndekkah i simasa i nai, cioen mo si Hizkia janah enggo naing-naing matè. Nai idahi nabi Jesaya anak si Amos mo ia janah mendokken, “Nina JAHOWA, asa ipeseppè Rajai karina urusen kumarna oda nèngè malum iakap Rajai. Oda ndekkah nèngè matè mo Rajai.”

²Nai kumessing mo si Hizkia mi dingding, mersodip mo ia,

³“Alè JAHOWA, èngèt mo enggo kuuèi kono ibas nasa pusuh peratèenku nai janah setia. Dak kuusahaken ngo menguèi karina lemmo atèmu.” Nai dak semep-semep mo si Hizkia.

⁴Laus kessa mo si Jesaya, ipasulak JAHOWA nola mo ia

⁵balik mendahi si Hizkia lako magahken tennah èn, “Aku, Dèbata JAHOWA sinisembah si Daud empungmu i, enggo mendengkoh sodipmu i janah mengidah èluhmu. Kutambahi mo umurmu sipuluh lima tahun nai.

⁶Kukelini mo ko dekket kuta Jerusalem bai raja Assur nai. Dak kujamoti mo kuta èn.” Nai idokken si Jesaya mo serrèaenna mengelèmetken buah kayu ara janah idalkepken mo mi baroh si Hizkia asa malum iakap. Mengkuso mo raja Hizkia, “Kadè ngo tandana naing ipemalum JAHOWA aku janah magahken ndorok dèng aku laus mi Bages JAHOWA?”

⁷Ialoi si Jesaya mo, “Èn mo tandana ibaing JAHOWA bai Raja i magahken tuhu ngo jandiNa idi.

⁸Sondar mo tuduh-tuduh jam mataniari sinibahan Raja Ahas i ibaing JAHOWA sipuluh garis mi podi.” Nai sondar mo lèndung i sipuluh garis.

⁹Enggo kessa malum iakap si Hizkia, isurat mo nangen pemojien èn:

¹⁰“Ningku mo, kennah laus ngo aku kasi pè sitengah umur dèng, menalpuni nggelluhku i dunia kalak simatè.

¹¹Ningku dèng ma, oda nè kuidah JAHOWA i tanoh èn barang mengidah jelma sinidunia èn.

¹²Mpostep kessahku, dapet mo ajalku bagè sapo-sapo permakan sinirumpakken; bagè oles sinigettap i pertenunen nai; kudokdok ngo igettap JAHOWA kessahku.

¹³Suntuk berngin mendeherreng aku kumarna mpiahna, nidokdok tulan-tulanku iperngas sada singa; kudokdok ngo igettap Dèbata kessahku.

¹⁴Sorangku makin hanjar bana mersep bagè manuk-manuk bajar ngo aku kekelsohen. Ledja matangku kerna longgah mi langit, alè JAHOWA, paluah mo aku i kepersahen èn nai.

¹⁵Kadè mo terdokken aku? JAHOWA ngo merulah; oda terpeddem aku kumarna bonek.

¹⁶Alè JAHOWA paduè mo aku nggelluh merkitè kata bak pemaingMu, belli mo aku nggelluh pellin bamu.

¹⁷Mobah mo kepersuken gabè kiniduma ipaluah kono ngo aku i mara nai dosa-dosangku iampuni kono karinana.

¹⁸I napa kematèen oda lot memoji gerarmu kalak simatè maknè mengharapken masèh atèMu.

¹⁹Pellin jelma nggelluh ngo memoji gerarmu bagè sikubahanken ari èn. Partua-partua menukutken taba dukakna sondel mo setiamu alè JAHOWA.

²⁰Alè JAHOWA enggo ipemalum kono aku, nai kuendèken kami pemoji-mojien i BagesMu merkitè menggerrit kucapi sidekkah nggelluh nami.”