Read Batak Dairi Jesaya 39 Bible Online

Jesaya 39 - Batak Dairi bible

Jesaya 39

¹Sinderrangna idengkoh si Merodakh Baladan anak si Baladan raja Babel enggo malum iakap Raja Hizkia i sakitna nai. Nai ipasulak mo utusenna menaruhken surat dekket luah bai si Hizkia.

²Ihalopken si Hizkia mo pasulakken i ibagasen sampang atè janah ipacidah mo karina kinibèakna taba kalak i, imo emmas dekket pirak, rempah-rempah dekket minak baungkus, dekket karina perkekkas soridaduna. Oda lot nè barang kadè i istana bak i suberri kerajaenna siso ipacidah taba kalak i.

³Nai menghadep mo Nabi Jesaya taba Raja Hizkia lako mengkuso, “Idikè nai ngo kalak i? Kadè nina kalak i?” Ialoi si Hizkia mo, “I nagerri sindaoh nai ngo kalak i, imo Babel.”

⁴“Kadè tengennen kalak idi i istana?” nina si Jesaya mengkusoi. “Karinana,” nina si Hizkia mengaloi. “Oda lot simak kupacidah karina harta silot i istana taba kalak i.”

⁵Nai idokken si Jesaya mo mbang Raja i, “Nina JAHOWA Perkuasa,

⁶‘Roh mo tikkina karina kinibèak silot ibas istanamu, dekket sienggo ipedèmpu empungmu soh mi ari sidari èn, ibantun mi Babel. Oda lot nèngè tading.

⁷Ipas pinemparmu nai lot ngo iembah janah ibaing gabè naposo istana lako mengkebasi raja Babel.’ ”

⁸Ialoi Raja Hizkia mo, “Selloh ma ngo tennah JAHOWA sinisohkenmu bangku i.” Bagidi pè pengaloina, kerna kata pikirenna: “Asal mo giam dak mènak kerajaenku janah damè sidekkahku nggelluh.”