Read Batak Dairi Jesaya 40 Bible Online

Jesaya 40 - Batak Dairi bible

Jesaya 40

¹Bagèen ngo pendokken Dèbatamu, “Apoi, apoi kènè mo bangsangKu!

²Pemènak kènè mo ukur pengisi Jerusalem, bagahken mo enggo salpun tikkina ia iperhamba. Kesalahen kalak i pè enggo Kuampuni, dosa-dosa kalak i pè enggo Kuhukum dua kali lempit.”

³Lot ngo sora dilo-dilo “Pekadè mo dalan i kelongoen bai JAHOWA. Pepènter mo dalan lubungen i rambah lunglang bai Dèbatanta!

⁴Kennah tanohen nasa lembeng-lembeng kennah cocoen karina uruk bak delleng. Asa gabè kendet tanoh uruk-uruk janah ipedèas tanoh dakkal-dukkul.

⁵Nai taridah mo kemuliaen JAHOWA suberri jelma mo mengidahsa. Tuhu ngo, JAHOWA sendiri ngo memperbagah i!”

⁶Lot ngo sora mendokken, “Sukutken mo!” Kukuso mo, “Kadè ngo sukutenkenku?” “Sukutken mo, dosken dukut-dukut ngo jelma, dosken bunga pellin sinempas ngo kinimerandalna.

⁷Mperra mo dukut i janah males mo bunga iembusken JAHOWA kessa mo angin nggara. Tuhu ngo, dosken dukut-dukut ngo karina bangsa.

⁸Mperra mo dukut i janah males mo bunga tapi ukum kata Dèbatanta hot ngo soh mi sidekkah-dekkahna.”

⁹Nangkengi mo delleng ndates sukutken mo sukuten keluahen bai Jerusalem! Nggang mo diungken, tingtingken mo sukuten keluahen bai Sion! Bagahken mo bai karina kuta i Juda roh nè mo Dèbatana!

¹⁰Tengen mo, roh mo Dèbata JAHOWA merdengan kuasana lako memales merkitè kuasana. Rebbak mo ia dekket karina jelma sienggo nipaluahNa.

¹¹Bagè sada kalak permakan ngo, Ia pehèduken lunggukenNa; Ia sendiri pepulungken kalak i karina. Iabing mo anak biri-biriNa, melamlam ngo Ia mengiring perinanNa.

¹²Isè menukat laut merkitè tapap tanganna, barang menibar langit dekket jengkalna? Isè menukati tanoh èn merkitè sellup barang menimbang delleng bak uruk merkitè dacing?

¹³Isè nung mendahi JAHOWA, barang memernoisa gabè pemeddahiNa?

¹⁴Taba isè nung mengkuso JAHOWA asa terolih pengantusien dekket perbinettohen? Isè merèken codien baNa asa seppè pemaingna?

¹⁵Dosken sintektek laè ibas taku-taku ngo jelma i ukum bai JAHOWA dosken sada abu ipas timbangen; karina pulo dos botongna dekket abu melemet.

¹⁶Karina binatang silot i rambah Libanon oda bias baingenken gabè pèlèen situtungen; karina kayuna cituksu baingenken mahan sebbanna.

¹⁷Karina bangsa oda merlapaten baNa, kira siso mada ngo i hadeppenNa.

¹⁸Taba isè ngo pecodienmu Dèbata? Isè dok atèmu dos dekketsa?

¹⁹Oda ngo bagè gana-gana sinibahan tukkang Ia, gana-gana simerlampis emmas bak meralas pirak.

²⁰Kalak siso sanggup menokor emmas bak pirak, memilih kayu simahal buruk. Itulusi mo tukkang sipandèna lako mahan gana-gana simahal dumegger.

²¹Mèter oda mo ibettoh bak idengkoh kono, dekket oda ibagahken bamu i sinderbi nai? Mèter oda mo iarti kono i mulana nai bakunè hanana dunia?

²²Situmempasa merian i babo dunia singkibul i, pengisina kètèk nai ngo teridah bagè balang. Ipekimbang ngo langit bagè kaèn janah ibaing bagè undung-undung mahan ianen.

²³Oda mergoldè ibaing karina perkuasa janah kalak mersangap kemagoen kuasana.

²⁴Tosè mo kalak i bagè suan-suanen menguda ideng tubenna turah uratna. Mula isempulken JAHOWA angin mperra mo ia janah ikabangken bagè ronci.

²⁵Isè dok atèmu dos dekket Dèbata Simbadia kalohon i? Taba kadè petosènmu Ia?

²⁶Tarè mo mi langit, janah perdatèken mo! Isè ngo menghanaken karina bintang? Ia ngo mengatur kalak i codi bagè soridadu, ibettoh ngo bilangenna karina janah karina idilo mengèkutken gerarna. Sada potang i mbalang kumarna mbelgahna kuasa JAHOWA!

²⁷Jadi, kasa kekelsohen kono alè Israel, bagè cara oda ibettoh JAHOWA Dèbatamu kono susah? Bagè cara oda isarihken perejekienmu, janah bagè oda iperdatèken hakmu?

²⁸Mèter oda mo ibettoh bak idengkoh kono? JAHOWA ngo Dèbata simenettap, situmempa suberri dunia. Oda nung ia ledja barang ndalmeh pikirenNa oda terasak.

²⁹Ipergegohi ngo kalak siledja, iberrèken ngo harapen taba kalak sindotè.

³⁰Kalak simengudana dagingna gabè ledja bak ndalmeh anak-anak bajar geppah terdengdeng.

³¹Tapi kalak simengasangken JAHOWA dak terolih gegoh rembaru. Tosè bagè manuk-manuk rajawali ngo kalak i ngkabang ndates merkitè gegoh kabengna sendiri. Lojang kalak i oda merkeleja-lejaen merdalan kalak i oda merkebias-biasen.