Read Batak Dairi Jesaya 41 Bible Online

Jesaya 41 - Batak Dairi bible

Jesaya 41

¹Idokken JAHOWA, “Nono mo janah dengkohken Aku, kènè alè pengisi nagerri sindaoh. Kebbas mo lako mi perhukumen langkahken mo janah aduken perkaramu. Roh mo kènè asa rasken runggu kita lako memutusken isè bennar isè salah.

²Isè ngo menggerekken perkuasa i kebincaren nai, dekket dak merrèken bana kemenangen? Isè ngo memaingsa menaluken bangsa-bangsa, dekket pepatuken raja-raja bana? Peddangna maing mambur mèrap kalak i bagè abu, panahna menghamburken kalak i bagè ronci ikabangken angin.

³Dak iletlet ngo janah ijalang oda lot halangen nèhèna ngkasting, bagè siso idedoh dalan.

⁴Isè ngo memaing i karina? Isè menettahken simasa? Aku, JAHOWA, aku ngo bennana janah tettap soh mi puncana.

⁵Pengisi nagerri sindaoh mengidah kadè sienggo Kubahanken. Tersengget mo kalak i janah menggirgir buradan, nai merpulung mo janah rebbak roh.

⁶Karina jelma dak mersiurupen janah dak mersipeposken atè.

⁷Tukkang kayu petegguhken ukur peneppa emmas kalak simemihpihken tembaga merkitè tokkok memoji kalak simeneppa i babo nanggar. Nina, ‘Selloh kalohon ngo sinibahanmu’; nai ilabang mo asa ulang dumegger.

⁸Tapi kono, alè Israel, naposongKu, bangsa sinipilihKu; kono ngo pemparen si Abraham supan-supanKu.

⁹Enggo kualengi kono i punca tanoh èn nai, kutenggoi i bekkas sindaoh nai. NingKu ngo, ‘kono ngo naposongKu; oda Kutulak sinipilihKu.’

¹⁰Ulang kono mbiar kerna Aku ngo denganmu, ulang rembekbekken, kerna Aku ngo Dèbatamu. Kupetegguh pè kono janah kuurupi Kuteggu merkitè tanganKu simergegoh i.

¹¹Tengen mo, karina kalak simelaga bamu, kennah italuken janah termalu. Kalak simengalo kono, kennah binasa janah kerri ibantun.

¹²Itulusi kono mo kalak simengalo kono, tapi oda nè idah kono. Kalak simergeraha dekket kono enggo mo bennè bana mersep bagèndari.

¹³Kumerna Aku JAHOWA, Dèbatamu, menjemak tangan kamuhunmu; ningKu ngo, ‘Ulang mbiar, aku ngo mengurupi kono.’ ”

¹⁴Nina JAHOWA, “Ulang mbiar, alè Israel, kasi pè kono cituk janah oda mergegoh. Aku JAHOWA ngo mengurupi kono, Simbadia kalohon, Dèbata kalak Israel ngo sipaluahken ko.

¹⁵Tengen mo, kubaing mo ko bagè rimpi pengerriken rembaru, ntajem janah merdori dua mbaris. Ierrik kono mo delleng-delleng bak mengelalasa; uruk-uruk pè ibaing kono mo tosè ronci.

¹⁶Itapi kono mo kalak i nai ikabangken angin mo kalak i bak ipuyu kalisungsung. Sampang mo atèmu kumarna Aku JAHOWA, janah gegah kumarna Aku, Dèbata Israel.

¹⁷Mula itulusi bangsangKu simalang i laè, janah ngkerrah kerahongna kerna muasen, nai Aku JAHOWA mo mengaloi sodip kalak i; Dèbata Israel oda menadingken bangsaNa.

¹⁸Kubaing menjarir batang laè i uruk-uruk batu, merbual-bual mo laè mata-mata i singkendet. Gurun pasir Kubaing gabè telaga; mercikal mo laè i tanoh ngkerrah nai.

¹⁹Kusuani sempènur mo gurun pasir, kayu zaitun, sampula dekket kayu mpiangi. Jampalen kin pè Kubaing gabè rambah mbellen, rambah èru, engul dekket arès.

²⁰Nai karina mo kalak mengidah janah memettoh Aku JAHOWA ngo menghanakensa. Iperatè-atèken kalak i mo janah iarusi. Dèbata simbadia Israel ngo memaing hana i.”

²¹Idokken JAHOWA raja Israel mo taba sembah-sembahen, “Bagahken mo simasa bamu, janah ranaken kadè kulih sebabna!

²²Roh mo ko, janah ramalken mo sinaing masa, asa kubettoh kami ujung sudahna. Bagahken mo simasa arnia peterrang artina asa kugermetken kami.

²³Ranaken mo kadè sinaing masa, asa kubettoh kami tuhu-tuhu kono dèbata sembahen. Bahanken mo simaing laba olih barang mengerogiken asa lengang kami mengidahsa.

²⁴Situhuna, oda ngo lot kono bang sinibahanmu pè dekket simenembah kono maing moyang atè.

²⁵Enggo kupasulak sada kalak i kebincaren nai; Kudiloi ia lako menjuhap i utara nai. Ilutak mo perkuasa tosè bagè kubang, bagè pandè koden mengelucak tanoh dendang.

²⁶Isè bai ndènè nai sienggo nung memahankensa asa ndorok kutuhu-tuhui kami ia? Tapi isè poda kènè lot memagahkensa oda lot mendengkohken kènè mengerana.

²⁷Aku, JAHOWA ngo perlebbè memagahken taba Sion; Aku pasulakken merembah sukuten keluahen mi Jerusalem.

²⁸Nderrang Kutulusi i tengah-tengah sembah-sembahen, sada poda terbaingsa memerèken tanda-tanda, oda lot sindorok mengaloi.

²⁹Situhuna, oda lot guna sembah-sembahen i, pellin gana-gana tuangen siso mergoldè ngo i janah oda terbahansa barang kadè pè i.”