Read Batak Dairi Jesaya 42 Bible Online

Jesaya 42 - Batak Dairi bible

Jesaya 42

¹Nina JAHOWA mo, “En ngo naposongKu lemmo-lemmongKu, siKupilih pesampangken atèngKu. Enggo Kuberèken kuasangKu bana, lako merembahken adil bai karina bangsa.

²Oda ngo mersurak barang nggang dilo-dilona oda terdengkoh i dalan sorana.

³Oda ngo ipenggelken buluh sienggo merlènuk oda ngo iènteppi pelita simèlep-èlep i. Setia ngo ia mengindangken kebenaren,

⁴oda bimbang barang mendellè, soh ipecèndek ketegerren i tanoh èn. Nagerri-nagerri sindaoh mengketedohken peddahna.”

⁵Dèbata JAHOWA ngo menghanaken dekket pekimbangken langit; Ia ngo menempa tanoh èn bak karinana siturah i babona. Ia memerèken tendi kenggeluhen bak kessah bai jelma. Ia ngo pesakatken tennah èn bai naposoNa,

⁶“Aku, JAHOWA, mendilo dekket mendokken ulaenkenmu lako mendalanken ketègerren. Kuteggu-teggu ngo kono janah kupehèdu-hèdu ma mahan perpadanen bai jelma manusia, janah cuhaya bai karina bangsa.

⁷Lako memuka mata kalak pètung, dekket paluahken jelma i sigellap kurungen nai.

⁸Aku ngo JAHOWA, idi mo gerarKu; oda Kuberèken barang bai isè kehejinKu; oda Kusohken bai gana-gana ketermurmurenKu.

⁹Enggo saut begèndari siKuramalken; tersèngèt sirimbaru pè naing ngo kubagahken; tikan madèng masa i, enggo bamu Kubagahken.”

¹⁰Endèken mo endè sirembaru bai JAHOWA poji mo Ia, alè suberri dunia! Merdengung mo ko alè laut dekket karina sinna, nagerri-nagerri sindaoh bak karina simengianisa!

¹¹Karina gurun pasir bak kutana memoji JAHOWA, selloh ngo pengisi Kedar memojisa! Karina pengisi kuta Sela meroang-oang, janah maria-ia i pucuk delleng nai!

¹²Selloh ngo isembah kalak i JAHOWA janah menukutkensa i nagerri sindaoh.

¹³JAHOWA ngo laus mergeraha bagè lubalang, tosè bagè soridadu dom nggasang lako perang. Idiungken ngo surak perjuhapen, janah pacidahken kelebihenNa taba imbang.

¹⁴Nina Dèbata, “Enggo ndekkah dak sip Aku; dak nono janah kuhempek diringku. Bagèndari dapet katikana lako kebbas naing mersurak ngo Aku bagè daberru naing ketaring.

¹⁵Delleng bak uruk naing Kubaing ndagal, karina suan-suanna males Kubaing. Lembeng penjariren laè Kuobah gabè gurun pasir, karina tao ngkerrah Kubakin.

¹⁶Kuteggu mo bangsangKu sipètung i arap dalan siso ibettoh; kurabih mo kalak i i dalan siso itandai. Sigellap tuiten Kubaing gabè ncihur bai kalak i janah dalan menangkeng mengencuah Kupedèas. Idi mo Kubaing bai kalak i janah pasti Kupesaut bagidi.

¹⁷Kalak sipercaya taba gana-gana perselihi janah iaku mahan dèbatana kennah ilèai janah ipemèla.”

¹⁸Idokken JAHOWA, “Dengkohken mo alè jelma tongkik! Tengen mo alè kènè jelma pètung!

¹⁹Isè ngo pètungen daripada Israel naposongKu i? Isè ngo tongkiken daripada utusenKu idi?

²⁰Alè Israel, merbagè-bagè ngo idah kono, tapi oda iperdatèken kono, ncingir ngo pènggelmu, tapi oda idengkohken kono.”

²¹Uè ngo JAHOWA paluahken; ipergeddo ngo asa ihormati janah iulaken patinna.

²²Tapi bangsa idi enggo kerri isamun; ikurung ngo kalak i ibas bilik-bilik i terruh tanoh janah ipemasuk mi kurungen. Kalak i ngo gabè iendesken penamun, janah oda lot roh merrèken pengurupen.

²³Isè bai ndènè nai uè mendengkohken èn, ninganna memperatè-atèkensa soh mi podi ari?

²⁴Isè simenohken Israel lako isamun? Otang JAHOWA sendiri ngo? Tabasa ngo kita merdosa, oda mengèkutken perèntahNa sibaing nggelluhta janah oda mengèkutken peddahNa.

²⁵Nai gabè terasa mo kita pungurNa janah sigongken simpersuk kumarna mahantu geraha. Mengelekkup bagè api ngo pungurna bai Israel tapi laju oda satdar kita janah oda uè merguru ibas karina sienggo sibellus.