Read Batak Dairi Jesaya 43 Bible Online

Jesaya 43 - Batak Dairi bible

Jesaya 43

¹Alè Israel, bagèen ngo pendokken JAHOWA, “Aku ngo menghanaken bak menempa kono, ulang mbiar, Kupaluah ngo kono! Enggo kudiloi gerarmu, aku sidasa kono.

²Mula mengelausi laè kono, kudengani pè kono oda terneknek kono mula pè tersessak kono. Mula memellus api, oda ngo messeng kono mula pè roh pengojien mbotong oda pella mencilakai kono.

³Kumarna Aku ngo JAHOWA Dèbatamu, Dèbata simbadia Israel, sipaluahken kono. Mesir ngo kubaing gabè penebbusmu. Sudan dekket Syeba gabè gancihmu.

⁴Maharga ngo kono i matangKu, ukum kono kukelini janah masèh ngo atèngku; nai Kusingkatken mo jelma gabè gancihmu, bangsa-bangsa mo gabè ali kessahmu.

⁵Ulang ko mbiar, kerna Aku ngo menjamoti ko. Ikesunduten bak i kebincaren nai Kupasulak asa merrohen pinemparmu merpulung.

⁶Kuperèntahken taba utara bak selatan, asa ndor kalak i ipaluah. Merrohen mo dukak-dukakmu i sindaoh nai, janah berrumu merrohen i punca tanoh èn nai.

⁷Kumarna enggo idilo kalak i karina merkitè gerarKu Kutempa ngo kalak i lako memoji Aku.”

⁸Idokken Dèbata, “Pasulak mo roh mi lebbè bangsangKu sipètung i, kasi pè lot matana; sitongkik i, kasi pè lot penggelna.

⁹Dokken mo pulung karina bangsa janah tumpu karina marga. Isè ipas dèbata sembahen kalak i nai sienggo memagahken kadè si masa bagèndari? Isè bana nai sindorok mengeramalken simasa i podi ari? Cender mo lebbè saksi-saksi kalak i janah ibuktiken mo mula tuhu ma kalak i asa karina si mendengkohken kalak i mendokken tuhuna ngo bagidi!

¹⁰Alè bangsangKu, kènè ngo gabè saksi-saksingKu kènè ngo Kupilih gabè naposongKu, asa itandai kènè Aku janah percaya taba Aku janah asa ibettoh kènè, Aku ngo JAHOWA. Pellin sadaKu ngo kessa Dèbata, oda lot sidèban perlebbè bangKu nai bak i podingku nola pè.

¹¹Aku sambing ngo JAHOWA laènken Aku oda lot nèngè sipaluahken.

¹²Enggo kubagahken i bai ndènè Aku ngo paluahken kènè, janah oda ngo dèbata sidèban silot i tengah-tengah ndènè; kènè ngo gabè saksi-saksingKu. Janah Aku, Aku èn ngo Dèbata,

¹³soh mi amman sumendah ngo Aku Dèbata. Oda lot maluah ibas kuasangKu nai barang menondati sura-surangKu.”

¹⁴JAHOWA sipaluahken kono, Simbadia Israel, mendokken, “Kumernaken kènè, kupasulak ngo soridadungku mi Babel, janah kucuakken gerruk-gerruk pèntu kurungen; oang-oang kalak Kasdim Kuobah gabè derru-derru.

¹⁵Aku ngo JAHOWA, Dèbata simbadia, Rajamu simenghanaken kono, alè Israel!”

¹⁶Enggo ibahan JAHOWA sada dalan memartes laut, arap laè mergaduha.

¹⁷Ipasulak ngo soridadu bak pakalimana mergeraha janah kebbas ngo kalak i merkurèta merkuda. Tapi geppah ngo kalak i, oda terbaingsa nè kèkè, matè mo kalak i, tosè bagè cumbu mèntep.

¹⁸Nina JAHOWA, “Oda lot gunana mengèngèt siarnia, sia-sia ngo menerèngèti sienggo salpun.

¹⁹Peratè-atèken mo, Kubahanken mo sirembaru; enggo kutebennai bagèndari, oda ngo idah kono i? Kupelias mo dalan i padang gurun, dekket batang laè i rambah kelongoen.

²⁰Binatang rambah naing pesangapken aku; sorigala dekket uo naing memoji aku, kumarna kupejarir laè i gurun pasir dekket batang laè i rambah kelongoen, mahan ènumen bangsa sikupilih i.

²¹Kalak i ngo bangsa sikuteddo bangku, asa lot memeritaken pemojien bangku.”

²²Idokken JAHOWA, “Tapi ukum kono alè Israel, oda isembah kono Aku, janah oda nèngè merpenguèi taba Aku.

²³Oda iembah kono biri-biri mahan pèlèen situtungenmu, oda ipesangap kono Aku merkitè pèlèenmu. Padahal oda kubobani kono merkitè pèlèen barang menusahi kono merkitè mengido kemenjen.

²⁴Oda itokor kono dahupa baungkus lako bangku oda ipepulak kono Aku merkitè pessoh pèlèen sinisembellihmu. Sungkarna nola ibobani kono ngo Aku merkitè dosa-dosamu, kuampuni kono kumarna bagidi bakkongku; oda nè kupèngèt-èngèt dosamu.

²⁵Bagidi pè Aku Dèbata ngo menasa dosamu, kuampuni ngo ko kerna bagidi ngo bakkongKu; oda kupèngèt-èngèt dosamu.

²⁶Pesèngèt mo Aku, ita mo rasken mi pengadilen, aduken mo perkaramu asa ntarar kono ntèger.

²⁷Empungmu siperlebbè, enggo merdosa pengulu-pengulumu enggo mengalo taba Aku,

²⁸imam-imammu pè enggo mengelamuni BagesKu. Nai Kusohken mo Israel asa ilèai, Kubelli mo pemparen si Jakob irabbatken.”