Read Batak Dairi Jesaya 44 Bible Online

Jesaya 44 - Batak Dairi bible

Jesaya 44

¹Nina JAHOWA, “Dengkohken mo alè Jakob, naposongKu, alè Israel sikupilih i!

²Aku ngo JAHOWA situmempa ko, simenghanaken kono mungkah i kurungen manik nai, dekket simengurupi kono. Ulang mbiar, naposongKu ngo kono, bangsa siKupilih, kekelengenKu.

³Kumarna naing Kucurahken ngono laè mi tanoh ngkerrah, janah mengarirken laè mi tanoh dakkir. Kuberrèken mo kuasangKu bai pinemparmu, janah kupasu-pasu pemparenmu.

⁴Ndeppur mbellen mo kalak i bagè dukut i gembar laè, tosè bagè kayu ara i biding batang laè.

⁵Rohroh sada mengaku dirina milikKu, janah roh gabè rebbak dekket pemparen si Jakob. Karina menuratken ipas tanganna: Milik JAHOWA, janah mendokken dirina bilangen bangsa Dèbata.”

⁶Bagèen ngo pendokken JAHOWA Perkuasa, Raja janah simenjamotken Israel, “Aku ngo kessa Dèbata, perlebbè janah perpodi.

⁷Isè lot tosè bagè Aku? Dokken mo ia mengaku! Ibagahken janah ipacidah mo tandana bangKu! Isè nung mengeramalken sinaing roh, i mulana nai soh mi ari kiamat?

⁸Alè bangsangKu, ulang mbiar barang tersengget, otang arnia nai soh bagèndari enggo Kuramalken kadè sinaing masa? Kènè ngo saksi-saksingKu. Penjamoti sidèban oda ngo lot janah oda Kutandai.”

⁹Oda lot gunana jelma simemahan gana-gana i, janah sembahen sinisembah kalak idi pè oda merlapaten. Pètung ngo kalak simenembah gana-gana i janah oda satdar barang kadè, kumernana i gabè termèla mo kalak i.

¹⁰Sia-sia ngo menggana perselihi sinituang janah menembahsa!

¹¹Tuhu-tuhu ngo termèla karina jelma simenembah gana-gana. Jelma keteremmen ngo kalak simemahan gana-gana i. Dokken mo roh kalak i rebbakken; pasti mbiar kalak i janah malu.

¹²Pandè bessi memuat sada logam, nai igaraken mo mi api, janah iteppa dekket tokkok. Ibahan ngo merkitè gegoh silot bana. Ninganna meneppai, melèhè mo iakap, muasen dekket ledja.

¹³Tukkang kayu menibar kayu. Ibahan gambar codien merkitè kapur, iokir mo merkitè perkekkasna janah igana mo mèjan niperjelma maholi idahen, nai ibaing mo mi bagasen sapona.

¹⁴Nggèut ngo kayu siniokirna i ipas kayu sempènur nai, kayu nggetcih barang kayu mèang koning i itabah i rambah nai. Lot ma ngo isuan kayu lemmas, nai ipèma mo lebbè roh udan asa turah.

¹⁵Dèba ipas kayu i nai ibaing gabè sebban mahan ciduduen dekket memanggang roti dekket gulè, nai puas mo iakap. Ninganna cidudu idokken mo, “Inang, merasana i janah mpeddas! Soh mo seddapna i gembar api èn!” Iba-iba kayu i ibahan mo gana-gana. Tungkuk mo ia mersembah ninganna mersodip, “Kono ngo JAHOWAku, paluah mo aku!”

¹⁸Moto kalohon ngo kalak sibagidi! Itutup kalak i ngo mata bak ukurna, memaing gabè maknè iarusi barang kadè.

¹⁹Oda soh ipikiri simemahan gana-gana i, “Kututung ngo dèba kayu i, nai rarana kupakkè memanggang roti dekket gulè mahan panganenku. Nai iba-iba kayu i kubahan gana-gana. Keppè bagèndari kusembah nola simpontong kayu!”

²⁰Tosè ngo kipangan cirabun ulah-ulah sibagidi. Ilalingken pikiren motona ngo jelma sibagidi, gabè oda nè terurupen. Oda uè kalak i mempertuhu, pellin perkilangen ngo gana-gana sinitanganna i.

²¹Idokken JAHOWA, “Engèt mo karinana èn alè bangsa Israel, kumarna naposongKu kono. Aku ngo menempa kono, janah naposongKu ngo kono. Alè Israel, oda lupa aku bamu!

²²Kupesisi ngo kesalahenmu bagè hembun, dosamu Kupelaus bagè remmang. Mulak mo kono mendahi Aku, kumerna enggo kupaluah kono!”

²³Mersurak sampang atè mo ko alè langit, meroang-oang mo alè pengisi tanoh èn! Meria-ia mo ko alè delleng! bagi ma rambah bak karina kayu sinibagasenna! Kumarna enggo ipacidah JAHOWA kemulianNa merkitè menebbus Israel bangsaNa.

²⁴Bagèen ngo pendokken JAHOWA sipaluahken ko sipehèdu-hèduken kono mungkah i kurungen manik nai, “Aku ngo JAHOWA simenghanaken karina silot sadaku ngo pekimbangken langit, janah oda lot mengurupi menghanaken dunia.

²⁵Aku ngo menondati ramalen pengeramal, dekket menggait-gaitken pertendung. Kualo ngo rana kalak simpantas gabè kemotoen ngo kubaing kebijaken kalak i.

²⁶Aku ngo maing merseppuh rana naposongKu, dekket pesautken rencana sienggo ibagahken utusenKu, kudokken kennah iiani nola mo Jerusalem, kuta si lot i Juda pè Kupelias nola mengolihi; sienggo merumpak kennah ipekadè.

²⁷Aku ngo mendokken taba dangaen laut; Surut mo! Naing kuarsaki ngo batang laèmu.

²⁸Aku ngo mendokken taba si Kores, ‘Kono mo Kubaing memerèntah, dekket pesautken karina sura-surangKu. Perèntahken mo asa ipelias nola Jerusalem, janah ibahan dangaen Bages JAHOWA.’ ”