Read Batak Dairi Jesaya 45 Bible Online

Jesaya 45 - Batak Dairi bible

Jesaya 45

¹Enggo ipilih JAHOWA si Kores gabè raja; ipebangkit ngo ia menaluken bangsa-bangsa, dekket petadiken kuasa raja-raja. JAHOWA ngo memuka pèntu kuta bana, sada poda lot nè tergerruk. Bana ngo idokken JAHOWA,

²“Kupelias mo dalan bamu, kupedèas mo delleng dekket uruk-uruk, kutakai mo pèntu tembaga janah kupenggel gerruk-gerruk bessi.

³Nai kuberrèken mo bamu harta kinibèak siniboniken asa ibettoh kono, Aku ngo Dèbata JAHOWA kalak Israel, sienggo mendilo kono merkitè gerarmu.

⁴Kudilo kono janah Kuberrèken gerar tukasi pè oda itandai kono Aku. Kubaing ko mengurupi Israel naposongKu, kumarna bangsa siKupilih ngo kalak i.

⁵Aku ngo JAHOWA, oda lot nè sidèban pellin Sadaku ngo kessa Dèbata. Enggo Kupersenjatai kono, tukasi pè oda itandai kono Aku.

⁶Kubaing pè bagidi asa i kebincaren nai mi kesunduten suberri jelma memettoh, Aku ngo JAHOWA oda lot tuhan laènken Aku.

⁷Aku ngo menghanaken nterrang bak gellap, aku ngo merrèken pasu-pasu bang olpek. Aku JAHOWA ngo memaing karinana i.

⁸Roh i langit nai kubaing kemenangen bagè udan, tagak mo tanoh èn lako menjalosa, nai ipeturah mo kinijuah dekket keluahen; aku JAHOWA ngo maingken masa i.”

⁹Merjaya ngo kalak simersiroi dekket Simenghanakensa; tosè bagè koden mengalo simenempasa. Bakunè mo tanoh dendang mengkuso taba tukkang koden, “Merkadè ngo kono?” Bakunè mo cara koden mengkelsohken oda pandè simemahansa?

¹⁰Merjaya ngo kalak simendokken taba partuana, “Kasa bagèen aku itubuhken?”

¹¹JAHOWA, Dèbata simbadia Israel mendokken, “Kusoi mo Aku tersèngèt sinaing masa i podi ari. Tapi ulang kusoi tersèngèt dukak-dukakKu, barang mendokken asa kubahanken barang kadè.

¹²Aku JAHOWA ngo menghanaken tanoh èn, dekket menempa jelma lako mengianisa. Merkitè kuasangKu Kupekimbang langit, dekket memerèntahken mataniari bulan bak karina bintang.

¹³Aku ngo pasulakken si Kores lako pesautken harkatKu dekket pecèndekken kesèntèngen. Kupedèas mo karina dalan sibellusenna. Ia mo mengolihi peliasken kutangKu Jerusalem janah paluahken bangsangKu sitertaban i, oda pella menisip bak oda pella gararen.” JAHOWA Perkuasa sitermurmur ingo mendokken bagidi.

¹⁴Nina JAHOWA mo taba Israel, “Bamu mo hasil tanoh Mesir dekket laba Sudan. Kalak Syeba simergegoh gabè milikmu; terèkèt mo kalak i merdalan i podimu. Mersembah ninganna mengaku mo kalak i, ‘Tuhu-tuhu ngo i tengah-tengah ndènè Dèbata oda lot nè tuhan laènken Ia!

¹⁵Dèbata simenjamoti Israel imo Dèbata simemoniken dirina.

¹⁶Karina kalak simemahan gana-gana sembahen; kennah ipemèla janah ilèai.

¹⁷Tapi ukum Israel, ijamoti JAHOWA ngo mergong ngo kinijuahna i. Oda ngo kènè ipemèla barang ilèai soh mi amman sumendah.’ ”

¹⁸JAHOWA ngo menghanaken langit, Ia ngo Dèbata! Ia ngo menempa bak memahan tanoh èn, memaingken ntegguh janah hot jengjeng. Oda ngo gabè ibaing bekkas melongo, tapi bekkas lako iiani ngo. Ia ngo simendokken, “Aku ngo JAHOWA, janah oda lot nè laènkenna.

¹⁹Oda ngo mboni-mboni aku mengerana barang cara rusia. Oda ngo kupasulak bangsangKu Israel sia-sia menulusi Aku. Aku JAHOWA mengeruapken situhuna janah memagahken kadè bennar.”

²⁰Nina JAHOWA mo, “Pulung mo janah rebbakken mo kènè roh karina kènè simaluah i tengah-tengah bangsa nai! Moto ngo jelma simengarak gana-gana kayu, bana mersodip taba sembahen siso ndorok paluahken.

²¹Aduken perkaramu, bagahken buktina, uè, paduè mo kalak i rebbak merarih. Isè ngo menukutken i janah memagahken i arnia nai? Otang Aku ngo JAHOWA? Oda lot nè tuhan laènken Aku. Aku ngo JAHOWA ntèger bak Sipaluahken, oda lot nè sidèban laènken Aku!

²²Alè kènè karina jelma simengiani tanoh èn, tumulih mo kènè taba Aku, asa ipaluah kènè, kumarna pellin Aku ngo kessa JAHOWA, oda lot nè sidèban!

²³Enggo merpadan Aku, janah oda sondat padanKu; kumernaken Aku sendiri Aku mersumpah. Suberri jelma kennah mersembah i hadeppenKu, janah ibas katana sendiri merpadan setia bangKu.

²⁴Meduk mo jelma mendokken, ‘Pellin bai JAHOWA nai ngo roh ketegerren bak gegoh!’ Karina kalak simergogo atè bangKu kennah roh mendahi Aku janah terolih malu.

²⁵Tapi ipaluah ngo ukum pemparen si Jakob, janah ipoji kalak i mo Aku, JAHOWA.