Read Batak Dairi Jesaya 46 Bible Online

Jesaya 46 - Batak Dairi bible

Jesaya 46

¹Bagèen ngo ujung sudah sembah-sembahen Babel; arnia mejan Bel dekket Nebo ngo isembah, tapi bagèndari ibaing i babo pinakan, gabè boban bai pinakan sienggo ledja.

²Oda ngo sanggup mèjan-mèjan i mengurupi simengosongsa, iembah mo i tosè bagè sitertaban. Bagidi mo ujung sudah kalak i.

³Dengkohken mo Aku, alè pinempar Jakob kènè karina sitadingna dèng ibas bangsangKu nai. Enggo ngo kupehèdu-hèdu kènè kessa nai tubuh kènè.

⁴Hot ngo aku Dèbata ndènè soh tua-tua kènè; janah dak tong menjamoti kènè soh ubanen kènè. Aku ngo menghanaken janah dak tong mermuduken kènè, kennah kuurupi janah kupaluah ngo kènè.

⁵Taba isè mo Aku ipecodi kènè? Lot ma ngo sindorok ipetosè bagè Aku?

⁶Iosari dèba ngo bagut-bagut janah mengorèken emmasna nai itimbang mo pirakna ipas dacing. Iupahi mo tukkang emmas lako meneppa gana-gana nai isembah gana-ganana siniteppana.

⁷Ilabangken mo gana-gana i janah ibaing mi bekkasna i sidi mo dak tong cender janah oda terbaingsa mompat. Mula mersodip kalak tabasa, oda ndorok ia mengaloi janah oda terpaluahsa ibas mara nai.

⁸Èngèt janah timbangi mo alè kènè jelma nandolak-ndalik!

⁹Èngèt mo simasa arnia, aku mo, Aku ngo JAHOWA, oda lot sidebakenna. Aku ngo Dèbata, janah oda lot codi bagè Aku.

¹⁰Imulana nai ngo Kubagahken tersèngèt podi ari, i sinderbi nai ngo Kuramalken kadè naing masa. NingKu ngo: Sienggo kudokken kennah saut, sura-surangKu pasti Kubahanken!

¹¹Kudiloi mo sada kalak raja i kebincaren nai roh mo ia bagè manuk-manuk melaga lako pesautken keputusenKu. Barang kadè sienggo Kuruapken pasti Kuulaken barang kadè sienggo Kuhendakken pasti Kubahanken.

¹²Dengkohken Aku, alè jelma jukkat idokdok kènè ngo magahken ndaoh dèng ngo kemenangen.

¹³Kupedor mo dapet ari keluahen, kinijuah sinaing Kuberèken oda tersondat nèngè. Kupaluah mo Jerusalem, janah Kuberèken kesangapen bai Israel.”