Read Batak Dairi Jesaya 47 Bible Online

Jesaya 47 - Batak Dairi bible

Jesaya 47

¹Idokken JAHOWA, “Alè Babel susur mo ko i tahtamu nai, janah kundul i babo abu i. Ai oda nèngè kono sengsengen bak mberru bagè arnia.

²Giling mo nditak merkitè batu buka mo sangkem abèmu sintak mo abitmu mi babo soh taridah bitismu, janah suberrangi mo karina laè.

³Idah dèba mo kono lubus, ilèai janah ipemèla. Kubalesken mo dendam bamu, sada poda maluah Kubaing.”

⁴Dèbata simbadia Israel ngo paluahken kita, JAHOWA Pergegoh Sisotercodi ngo gerarna.

⁵Idokken JAHOWA taba Babel, “Sip ko, janah mbengket mi bagasen sigellap. Oda nèngè kono idokken ‘Bindohara kerajaen-kerajaen.’

⁶Arnia ngo melaga Aku taba bangsangKu, sanga oda nè Kuètong kalak i milikKu. Nai Kusohken mo kalak i bamu, janah oda mermasèh atè ko taba kalak i, balikna ngo, situa-tua pè ntengam ngo penèndesmu.

⁷Idokdok kono ngo gabè bindohara ko soh mi amman sumendah janah oda satdar barang memikirken kenggonna.

⁸Kumara i, dengkohken mo Aku, kono alè silolo mengayaki kesennangen! Idokdok kono mènak nggelluhmu janah oda lot nèngè sibagè kono. Dok atèmu oda nggèut mebalu kono bang pinemparmu pè oda binasa.

⁹Tapi sigejap sambing, ibagasen sidari duana i rebbakken sempa. Kasi pè ibaing kono kajimat bak tabas-tabas, isintakken ngo sinibalè bak dukakmu.

¹⁰Mènak ngo ko dok atèmu ibagasen kejahatenmu dok atèmu pengelakomu oda iperdatèken. Ilalingken kebijaken bak perbinettohenmu ngo kono idokdok kono oda lot nèngè sibagè kono.

¹¹Tapi sempa mo bamu olpek oda terilakken kajimatmu idi. Roh mo bamu mara bak jaya, janah oda ndorok terpesiding ko. Sintempu mo sempa kemagoen, janah oda èdepmu kin i.

¹²Nunuti sambing mo merkitè karina tabas bak ilmu sihirmu memaing ko kumasèngkor mulai kèdèkmu nai. Isè bettoh-bettohen merguna i bamu, mencubiar-cubiari musuhmu.

¹³Ledja mo ko kumarna buèna peddah. Dokken mo pengeramal-pengeramal paluahken kono; kalaki sienggo memereso karinana simasa i langit bak memperdatèken bintang-bintang dekket gennep bulan peltak simengalamatken bakunè nasipmu.

¹⁴Tengen, bagè ronci ilekkup api ngo kalak i; oda terpaluahsa dirina sendiri! Nggarasu ngo dilah api i bai kalak i, ai oda ngo api mpeddas perciduduen.

¹⁵Idi mo guna pengeramal bamu simaing ko kumasèngkor mulai kèdèkmu nai, laus-laus sada mo kalak i menadingken kono; oda lot roh kalak mengurupi kono.”