Read Batak Dairi Jesaya 48 Bible Online

Jesaya 48 - Batak Dairi bible

Jesaya 48

¹Dengkohken mo, alè pinempar si Jakob, pinempar Juda simemakkè gerar Israel, nimu iakui kono ngo Dèbata Israel, janah mersumpah merkitè gerar JAHOWA. Tapi oda i ukurmu nai ranamu idi.

²Tukasi pè bagi gegah ngo ko mengakui pengisi kuta simbadia kono nimu; janah tunandè bai Dèbata Israel kono nimu sinigeraren JAHOWA Perkuasa.

³Idokken JAHOWA, “Dengkohken mo alè Israel! Kadè simasa arnia, enggo ndekkah i Kubagahken; kadè siKudokken, sintempu ngo i Kupesaut, janah Kubaing merketeridahen.

⁴Kubettoh ngo perukur sada kono, jèngèng bak perkata sada.

⁵Asa arnia nai ngo enggo kuramalken; tikan madèng masa, enggo kubagahken, asa ulang idokken kono, idi sinibaing gana-gana sembahenmu.

⁶Karina siKuberitaken sinidengkohmu enggo saut kennah akkunmu tuhu ngo katangKu. Bagèndari Kubagahken mo tersèngèt sirembaru, rusia-rusia simadèng nibettohmu.

⁷Bagèndari dèng ngo i Kuhanaken, oda arnia; oda nung dèng idengkoh kono i, asa oda terdokken kono, sienggo ibettoh kono karinana idi.

⁸Kubettoh ngo oda kettoken kono, arnia nai termurmur ngo kono pendurhaka. Kumarnana i mo oda satdar kono singkebabah rana poda soh mi pènggelmu.

⁹Kubekkem ngo lagangKu asa isarken gerarKu. Kukemkemmi ngo tupung kono asa ulang iripasken kono.

¹⁰Kuoji ngo kono ibas api kinidersa bagè pirak itingtingi i api pengumbaken.

¹¹Kuruapken i kumerna kedirinKu sendiri, kumarna oda Kubelli ilèai gerarKu; oda Kupella kemuliaenKu barang bai isè pè.”

¹²Nina JAHOWA, “Dengkohken mo alè Israel bangsa siKudiloi, Aku ngo tettap Dèbatamu. Aku ngo perlebbè janah Aku ma ngo perpodi.

¹³TanganKu ngo maing danganen tanoh èn janah pekimbangken perlangiten. Mula Kudilo gerarna mèter ndor ngo kalak i roh.

¹⁴Tumpu mo kènè karina janah dengkohken mo! Oda lot ibas semabahen-sembahen nai simengeramalken kalak siKupilih naing menjuhap Babel; ia ngo pesautken karina siKupergeddo.

¹⁵Aku ngo mendokken bak mendilosa, simemernoisa, soh merhasil ia.

¹⁶Roh mo ko ndessing bangKu janah dengkohken mo, arnia nai oda lot merboni-boni ranangKu, janah dak saut ngo siKudokken.” Bagèndari iutus Dèbata JAHOWA ngo aku janah iberèken kuasaNa sendiri bangku.

¹⁷Nina JAHOWA Simbadia Israel, sipaluahken kono, “Aku ngo JAHOWA Dèbatamu, simengajarken taba kono kadè simerguna bamu, dekket simenegu kono i dalan sikennah bellusenmu.

¹⁸Mula iperdatèken kono perèntah-perèntahKu, nai tosè bagè laè oda nung marsak mo kedamèenmu, janah rejekimu pè tosè bagè galombang i laut; siso nung maradi-adi.

¹⁹Pinemparmu bagè buè kersik i biding laut; kujamin oda ibinasaken dèba kalak idi.”

²⁰Laus mo kènè janah mperrus i Babel nai sarken mo barita i mi suberri aur. Bagahken ibagasen surak oang-oang; “Enggo ipaluah JAHOWA kalak Israel, naposoNa i!

²¹Tikan iarak kalak i memellus padang gurun, oda ndersa iakap kalak i muasen. Ibellah JAHOWA ngo delleng batu lako mengarirken laè, merdeggar ngo laè i batu nai ibaing lako bai kalak i.

²²Oda lot keluahen bai jelma perjahat,” nina JAHOWA.