Read Batak Dairi Jesaya 49 Bible Online

Jesaya 49 - Batak Dairi bible

Jesaya 49

¹Dengkohken aku, alè kènè nagerri sindaoh peratè-atèken mo katangku. Enggo idiloi JAHOWA aku sinderrang oda dèng tubuh, ipilih ngo aku mulai i kurungen manik nai.

²Ibaing ngo ranangku merseppuh bagè peddang ntajem, ilègenni ngo aku merkitè tanganNa sendiri. Ibaingken ngo aku bagè anak panah sienggo igarut, janah ipennep ibas ucang asa kebbas lako ipakkè.

³Nina ngo mbang aku, “NaposongKu ngo kono; ipesangap mo aku kumernaken kono.”

⁴Tapi ningku mo, “Sia-sia ngo kelejaenku; sia-sia ngo bang pè kukerriken gegohku!” Tapi tok ngo aku ibèla JAHOWA ngo hakku. Ibalesken JAHOWA ngo bangku tosè mi pemahanku.

⁵Idilo JAHOWA ngo aku tikan madèng tubuh gabè naposoNa, lako pepulungken bangsa Israel, asa mulak kalak i tabasa. Merlia ngo aku ibaing JAHOWA, Dèbata ngo kegegohenku.

⁶Idokken JAHOWA taba aku, “Ulaen simbelgahna memèma kono alè naposongKu oda pellin pedèmpuken pemparen si Jakob sitadingna i sambing kono dekket mengolihken kebelgahen marga-marga Israel, tapi kubaing ma mo gabè kecihuren bangsa-bangsa, asa ipaluah suberri dunia.”

⁷Idokken Dèbata simbadia Israel taba kalak sinipelèa-lèa kalohon, dekket taba sinikecegoken bangsa-bangsa janah gabè hamba kalak simerkuasa, “Idah raja-raja mo sikubahanken; kèkè mo kalak i pesangapken Aku. Idah perkuasa-perkuasa ma mo i nai sujud mersembah.” Masa pè i kumarna enggo ipilih JAHOWA naposoNa; ai setia ngo Dèbata simbadia Israel i padanNa.

⁸Idokken JAHOWA taba bangsaNa, “Mula toko kuakap mengaloi ngo Aku tupung arina Aku paluahken, Kuurupi mo kènè. Kujamoti ngo kènè janah Kudèdah, janah Kubaing perpadanen bai bangsa-bangsa. Kubalikken mo nagerri simelongo i gabè tanoh pusakka janah i iani.

⁹Kudokken karuar kalak sinikurung; kalak simerian i sigellap kuarahken mi sinterrang. Baliksa i delleng sienggo gundul pè oda kurangen kalak i, i sidekkah merdalan dak mèma ngo panganen.

¹⁰Oda ngo ndorok muasen kalak i barang melèhè, janah oda isenggang nggara ari i gurun pasir. Kumarna Aku, simengkekelengi kalak i ngo mengarak, bak meneggu kalak i mi laè mul.

¹¹Kubahan mo dalan mengelausi delleng, karina dalan lubungenKu Kupedèas.

¹²Merrohen mo bangsangKu i sindèas nai i utara nai, kesunduten dekket Sinim i selatan nai.”

¹³Merendè mo ko alè langit, mersurak-surak mo ko alè tanoh, alè delleng, mersurak meroang-oang mo! Kumarna roh ngo JAHOWA mengapoi bangsaNa, masèh ngo atèna midah bangsaNa sinitèndes.

¹⁴Tapi nina pengisi Jerusalem ngo, “Enggo itadingken JAHOWA kita enggo ilupaken Dèbatanta kita.”

¹⁵Ialoi JAHOWA mo, nina mo, “Nung ngo lupa partua i bages taba anakna, janah oda ikekelengi dukak nitubuhkenna? Mula pè ia mengelupakensa, ukum Aku oda kulupaken ko!

¹⁶Jerusalem, dak Kuèngèt ngo kono; kuokirken ngo gerarmu itapap tapap tanganKu.

¹⁷Ndor nè mo roh jelma sinaing pecèndekken kono, janah laus mo kalak sienggo mengerumpakken ko.

¹⁸Tengen janah tatap mo i sikulilingmu, enggo pulung bak roh ginemgemmu taba ko. Kumarna Aku, Dèbata singgelluh i, ningku ngo, tuhu-tuhu sampang mo atèmu kumernaken pengisimu, bagè daberru sijahè, sampang atèna kumernaken emmas pakènna.

¹⁹Nagerrimu sidakkir janah longo-longoen gabè sempitsu bagèndari bai jelma sinaing mengianisa. Janah kalak sinaing membinasaken kono, enggo laus ndaoh bamu nai.

²⁰Dukak-dukak situbuh i bekkasmu itaban mendokken taba kono, ‘Sempitsu ngo nagerri èn bangku berrè mo bekkas, asa ndorok aku merian i sèn.’

²¹Nai nina mo ibas ukurmu, ‘Isè ngo menubuhken dukak-dukak i bangku? Otang enggo kembalangen dukak aku, janah oda ndorok nèngè menubuhken? Iembah ngo aku mi buangen janah ipesisi bana itadingken sadaku sendiri. Nai idikè nai dukak-dukak idi, janah isè pebelgah-belgahken kalak i?’ ”

²²Nina JAHOWA Sindatesna mo taba bangsaNa, “Kuberrèken mo tandana bai bangsa-bangsa janah iolihken kalak i mo dukak-dukakmu; itempi mo dukakmu daholi, bak berrumu pè itongtong.

²³Gabè dosken bapa mo raja-raja bamu janah dosken inang mo raja daberru. Sujud mo kalak i lako pesangapken ko janah ipecerrep ukurna meradepken ko. Nai ibettoh kono mo Aku ngo JAHOWA; barang isè mengharapken Aku, oda ngo terdehèrep.”

²⁴Mengkuso mo kènè “Terampasen ngo ndia taban-taban i tangan lubalang nai, barang terampasen ngo ndia jelma tabanen i tangan kalak kejam nai?”

²⁵Ialoi JAHOWA mo, “Bagidi mo masa. Kennah irampasi ngo jelma sinitaban lubalang. Harta taban-taban kalak kejam kennah irebbut nola. Kumarna Aku sendiri ngo mengalo musuhmu; Aku mo paluahken dukak-dukakmu.

²⁶Kubaing mo mabuk daroh musuhmu, gabè mersibunuhen mo kalak i. Nai suberri jelma mo memettoh, Aku JAHOWA ngo, Paluahken ko; Simahantu, Dèbata si Jakob, Menebbus ko.”