Read Batak Dairi Jesaya 5 Bible Online

Jesaya 5 - Batak Dairi bible

Jesaya 5

¹Dengkohken mo nangenku tersèngèt pekken anggur supanku. Supanku merpekken anggur i pispis delleng nggabur.

²Ipangkur ngo tanohna janah ipatakken batuna Isuan anggur pilihen ibahan pantar pemuroen. Ikurak mo lubang sada bekkas mengilang anggurna, nai ipèma mo buahna ntasak tapi macem ngo hasil buah anggurna.

³Bagèndari idokken supanKu i mo katana “Kènè alè karina pengisi Jerusalem bak Juda, hukum kènè mo Aku bak pekken anggurKu.

⁴Bakunè nola mo ndia Kubaing simadèng Kubaingken mi pekken anggurKu? Kasa ndia buah macem hasilna, oda buah merandal bagè buah siKuharapken?

⁵Bagèen mo Kubaing mi pekken anggurKu i; Kuberkati mo pagar sikulilingna i dingding simengelènggemmisa i pè Kurumpakken nai Kubelli mo binatang menggagatisa dekket memerjatisa.

⁶Kubelli mo i terulang. Batang anggur i pè oda nè Kugasi janah oda nè Kugogo. Kobelli mo bagi ipetcek kopi-kopi dekket dukut, soh mi hembun i pe Kugerra mendabuhken udan mi babona.”

⁷Pekken JAHOWA Pergegoh Sisotercodi imo bangsa Israel, janah kalak Juda imo kayu anggur sinisuanNa. Iharapken ngo bai kalak i nai kesèntengen, keppèken silot bai kalak i imo kejahaten. Iharapken ngo kalak i pecèndek kebenaren, keppè siterdengkoh gabè uo-uo mido keadilen.

⁸Merjaya mo kènè simenokor bages dekket simengakal-akali juma ndèba lako menambahi kinibèakna! Oda ndekkah nèngè oda lot nèngè bekkas jelma sidèban gabè pellin kono nai ngo kessa merian i nagerri i.

⁹Enggo kudengkoh isumpahken JAHOWA Pergegoh Sisitercodi, “Karina bages mbellen janah merandal èn numar mo i oda lot simengiani.

¹⁰Tanoh i pè maknè menghasilken, pekken anggur sipuluh hèktar belangna pellin sipuluh sellup laè anggur mo kessa hasilna. Seratus sellup bennih sipuluh sellup pagè mo hasilna.”

¹¹Merjaya mo kènè! Mulai siceggen nai soh berngin pellin mengènum ènumen mperngis ngo ulanmu janah mabuk-mabuk.

¹²Tupung pèsta-pèstamu terdengkoh sora kucapi, ganderrang, sordam dekket lobat bang mengènum anggur. Tapi oda isarihken kono sinibaing JAHOWA dekket tah kadè dèba sinihanakenNa.

¹³Kerna i gabè tertaban mo bangsangKu siso mettoh barang kadè janah ibuang. Nai matè rapar matè muasen mo pengulu-pengulu ginemgem.

¹⁴Ngangang ngo babah kematèen lako memendut kalak sipandè i Jerusalem rebbak dekket ginemgem simerpèsta i.

¹⁵Karinana kalak i kennah ipemèla dekket jelma sindates merukur gabè ipeterruh.

¹⁶Tapi ituduhken JAHOWA Pergegoh Sisotercodi mo kebelgahenNa merkitè memahanken ketègerren. Ipacidah mo kebadiaenna merkitè menghukum bangsaNa.

¹⁷Menggagati mo anak kambing dekket anak biri-biri ibas kuta sienggo merumpak i janah oda kurangen gagaten.

¹⁸Merjaya ngo kènè sidak mengulaken dosa!

¹⁹Nimu ngo, “Katerra pè ndor mo JAHOWA Dèbata Simbadia Israel memalesken! Katerra pè ibaingken mo rencanaNa i asa siidah janah sibettoh.”

²⁰Merjaya ngo kènè sipebalikken simendè dekket nggodo, singgellap dekket nterrang, simpagit dekket tenggi!

²¹Merjaya ngo kènè simerdokatè mpantas janah pandè dirina!

²²Merjaya ngo kènè simbisa mènum anggur! Gabè mboho janah mahantu enggo kessa idengani ènumen mperngis!

²³Tapi pellin lako muat kepeng sisip, gabè ipaluah kènè jelma siso salah asa ulang terolih ketègerren.

²⁴Enggo itulak kènè peddah JAHOWA Pergegoh Sisotercodi dekket mengelèai perèntah Dèbata simbadia Israel. Kernana i, tosè bagè ronci dekket dukut mperra kerri ilekkup api, bagi ma mo soh mi uratmu kennah gabè macik, bungamu pè mperra janah kerri ipuyu angin.

²⁵Punguren ngo JAHOWA taba bangsaNa. Enggo mo ikebbasi lako menghukum kalak i. Dumegger ngo karina delleng; mersara-sara mo bangkè tosè bagè empak-empak i tengah ndalan. Tapi tong dèng ngo punguren JAHOWA dekket tong kennah menghukumi.

²⁶Idiloi JAHOWA mo bangsa i sindaoh nai janah ndor mo kalak i roh!

²⁷Dak kebbas ngo kalak i mergeraha janah oda merkeleja-lejaen. Oda nung meddem barang tertunduh kalak i.

²⁸Tajem ngo anak panahna janah baorna enggo kebbas menèmbak. Mpihir ngo cikili kudana bagè batu perkas, janah daling kurètana kumessing bagè kalisungsung.

²⁹Balapergunggungna merngengngeng bage singa rembaru menjerngem, nai ilojangken mo janah oda lot sindorok mempebèlaisa.

³⁰Tupung ari i terdengkoh mo surak geraha i suberri Israel bagè perdengung laut. Tengen mo, suberri nagerri i ngo gellap janah pel-pel. Sinterrang kin pè gabè gellap bulita.