Read Batak Dairi Jesaya 50 Bible Online

Jesaya 50 - Batak Dairi bible

Jesaya 50

¹Idokken JAHOWA mo taba Israel, “Alè bangsangKu, ukum katèmu Kupelaus ngo ko bagè sada kalak serangen pelausken jabuna? Mula bagi, apai surat sirangna? Idok ko ngo kudea ko, bage sada kalak partua ibalè merdea dukakna bai pertunggu ido? Oda! Itaban dekket ibuang pè kono kumarna dosa bak kejahatenmu sendiri ngo!

²Kasa sada kalak poda bangsangKu mengaloi tikan roh Aku menenggoi kalak i? Mada ngo ndia sip kalak i kerna dok atèna oda terbaing aku paluahken bak menjamoti kalak i? Situhuna, kerna perèntahKu ngo gabè ngkerrah laut, batang laè pè Kubaing gabè gurun pasir, gabè mermatèen mo ikan janah gabè bau mangir.

³Kubaing mo langit i mbèrèng gellap, kusangkemmi ia tosè bagè dekket kaèn bonek.”

⁴Iajari JAHOWA Sindatesna i ngo aku mengerana, asa ipergegohi ranangku kalak sindotè. Gennep ceggen dak ipekèkè ngo harkatku lako mendengkohken peddahNa bangku.

⁵Iberèken JAHOWA ngo bangku pengarusien oda ngo mengalo-ngalo barang merbalik aku bana nai.

⁶Kutaroken ngo gurungku taba kalak simemalu aku; bak kurumku taba kalak simengerengkat janggutku. Oda ngo kuboniken abèngku tikan ilèai dekket icèduri aku.

⁷Kumarna Dèbata JAHOWA ngo mengurupi aku, oda ngo pemèlanna aku. Kupetegguh ngo ukurku asa sobar menggong; ai kubettoh oda pemèlanna aku.

⁸Kerna njolmit ngo Dèbata idokken oda ngo aku mersalah. Isè uè mersoal dekket aku? Roh mo ia asa rasken kita. Isè ndia mengalo aku? Pasulak mo ia mendessingi aku.

⁹Tuhu ngo, JAHOWA Simermulia i ngo membèla aku, isè pang mendokken salah aku? Mersep mo karina simenangka aku bagè oles ipangan ngitngit.

¹⁰Kènè alè sipesangapken JAHOWA, dekket simendengkohken kata naposoNa, tah bakunè gellap dalan sibellusen ndènè, janah oda lot cuhaya menendangi kènè tapi percaya mo bai JAHOWA; janah kettoki mo Dèbatamu.

¹¹Kènè alè sinaing mencilakai sidèban, ibinasaken sura-sura ndènè sendiri mo kènè. JAHOWA ngo memaing saut masa bagi sondel mo peniksana taba kènè.