Read Batak Dairi Jesaya 51 Bible Online

Jesaya 51 - Batak Dairi bible

Jesaya 51

¹Nina JAHOWA, “Dengkohken mo Aku, kènè alè sinaing ipaluah janah roh mo kènè taba Aku mido pengurupien. Èngèt mo delleng batu bekkas ndènè idikè nai kin kènè ipahat dekket pengkeruken batu bekkas ndènè ikurkuri.

²Èngèt mo empungmu si Abraham dekket si Sara tikan Kudiloi si Abraham, oda lot dèng anakna nai Kupasu-pasu mo ia janah Kuberèken nterrem pinemparna.

³Jerusalem, naing Kuapoi mo kono, dekket karina sitadingna dèng irumpak-rumpakmu. Jampalenmu sienggo dakkir i Kubaing gabè pekken, bagè Edom, pekkenKu nggabur i. Lolo janah meria-ia mo jelma i sidi mendokken lias atè merkitè endè.

⁴Perdatèken mo sorangKu, alè bangsangKu, dengkohken mo ranangKu, alè bangsangKu. Kuberèken mo peddahKu bai bangsa-bangsa, pati-patinKu mencuhayai kalak i.

⁵Enggo ndessing keluahen sinaing Kuberèken i; dapet nè mo tikki kemenangenKu i. Aku sendiri mo memerèntah bangsa-bangsa. Nagerri-nagerri sindaoh pè memèma Aku janah mengharapken kinimahantu pemahanku.

⁶Tarè mo langit janah tengen mo tanoh èn; mersep mo langit i bagè cèmber janah tanoh èn pè mumuk bagè oles malè, karina jelma pengisina matè bagè namuk. Tapi soh mi amman sumendah ngo keluahen siKuberrèken i, janah oda merpunca kemenangenKu i.

⁷Dengkohken Aku, alè bangsangKu, ibettoh kènè ngo kadè bennar; peddahKu terpennep ibas ukurmu. Ulang mbiar mula irèhè jelma kènè, ulang buradan mula ilèai kènè.

⁸Binasa mo kalak i janah salpun, bagè oles ipangani ngitngit bak oles buk biri-biri ipan ocip. Tapi hot soh mi amman sumendah ngo keluahen siKuberèken, kemenangen pè terrus turun-tumurun.”

⁹Kèkè mo kono alè JAHOWA, tolong mo kami paluah mo kami merkitè kuasaMu. Kèkè mo ko bagè siarnia tikan ireppuk ko Rahab dekket ijuluk ko naga laut i soh matè.

¹⁰Kono ma ngo mengkerahi laut, laè laut simbages i. Ipelias kono ngo dalan arap laè i, asa ndorok suberrang kalak sinipaluah i.

¹¹Nai, mulak mo kalak sinipaluah JAHOWA meroang-oang mo kalak i mbengket mi Jerusalem mbinar ngo abè kalak i kumarna sampang atè simenettap. Merlolo atè ngo kalak i janah meria-ia, enggo mo salpun bonek dekket kelsoh.

¹²Nina JAHOWA, “Aku ngo mengapoi kènè. Kasa mbiar kono midah jelma simangko-angko bang taba jelma sinipatakken bagè dukut?

¹³Kasa lupa ko taba JAHOWA Situmempa kono sipekimbangken langit bak simencibalken dangaen tanoh? Kasa buradan kono suntuk ari midah pengamuk sipenèndes sidak kebbas lako mengeripasken? Situhuna, ukum pengamuk kalak i. Oda tellap bamu.

¹⁴Ndor mo ipaluah sitertaban; oda kurangen pangaen kalak idi, janah oda matè bak ikubur.

¹⁵Kumarna aku ngo JAHOWA Dèbatamu, simenggoncang laut gabè merdengung ombakna. Gerarku imo Pergegoh Siso tercodi.

¹⁶Aku ngo sipekimbangken langit bak mengeletakken dangaen tanoh. Kudokken taba Sion: Bangsangku ngo kono; Kuberèken ngo peddahKu bamu janah kujamoti kono merkitè kuasangKu.”

¹⁷Kèkè mo ko, alè Jerusalem, kèkè mo! Hukumen sinidabuh JAHOWA kumarna pungurNa enggo kerri idalani ko karina.

¹⁸Oda lot meneggu kono ibas jelma pengisimu nai, oda lot menatah kono ibas jelma simengiani kono nai.

¹⁹Dua bagè ngo mara dak sempa bamu; kumernaken garaha melala nagerrimu janah matè rapar mo ginemgemmu. Oda lot simermasèh atè bak simengapoi kono.

²⁰I gennep punca dalan geppah mo denganmu kerna kerri gegohna tosè bagè balkih isengkik aring. Sempa mo taba kalak i pungur Jahowa, janah ilagai Dèbatamu.

²¹Dengkohken mo, kènè alè kalak sitertèndes, sijumemba-jemba bagè kalak mabuk!

²²Bagèen ngo kata JAHOWA ndènè JAHOWA Dèbata ndènè ngo simenampati kènè, “Kinidersa sikupesempa kumarna pungurKu, naing Kuagoi mo i bamu nai. Malap mo pungurKu janah oda nèngè gongenken ndènè.

²³Kinipersuk i Kupesempa taba simendersa kènè kalak sinung mendokken kènè galè i tanoh, bak mendedohi kènè nidokdok bagè dalan sibellusen ndèba kènè.”