Read Batak Dairi Jesaya 53 Bible Online

Jesaya 53 - Batak Dairi bible

Jesaya 53

¹Ialoi bangsa i mo, “Isè mo percaya tersèngèt mi sienggo kudengkoh kami? Taba isè enggo ipetarar kuasa JAHOWA?

²Ipergeddo JAHOWA asa bagè tunas nemmu naposoNa i siturah i tanoh dakkir. Oda lot simerandal bana mahan tengenenta; oda lot mengabin perukuren bagè ipercinta ukurta.

³Silèai janah sipedaoh ngo bana nai jelma dom kinidersa janah ncemmal menggong simpiah ngo ia. Sada kalak poda uè menengensa, dekket ngo kita oda menguèisa.

⁴Situhuna sakitta ngo igongken kinipersahta ngo itahanken, keppèken ukurta mendokken Dèbata ngo mendabuh hukum kinidersa bana.

⁵Tapi iugahi pè ia kumarna dosa-dosanta ngo iligasi pè ia kumarna kejahatenta ngo. Ihukum pè ia, asa maluah ngo kita kumarna ugah-ugahna i malum siakap.

⁶Karina ngo kita laling bagè biri-biri gennep mersijuljul dalanna. Idendenken JAHOWA enggo bana kejahatenta karina.

⁷Sondel kinidersa ngo ibaing tabasa tapi sobar ngo ia menggongkensa. Nono sambing ngo ia bagè anak biri-biri siniiring mi penèaten bak bagè inang biri-biri sinigonting bukbukna.

⁸Itahan janah irungguken ngo ia nai iiring dekket ihukum matè. Isè poda menarihken nasipna; kumernaken dosa bangsanta ngo matè ia.

⁹Ikubur ngo ia rebbak dekket jelma perjahat; pendèbanna i tengah-tengah jelma bèak kasi pè oda nung iulaken kejahaten, janah oda pennah menipu.”

¹⁰JAHOWA ngo mengharkati asa igongken kinidersa janah menohken dirina mahan pèlèen kesasaen dosa. Nai nggeddang mo umurna janah ipetengen-tengen pinemparna ia ngo pesautken sinipergeddo atè JAHOWA.

¹¹Kumernakenna i nina JAHOWA, “Enggo kessa igongken kinipersah sayur ntua janah puas mo irasa. NaposongKu i ngo, sipesennangken ukurKu, enggo igongken hukumen jelma nterrem; kumernakensa Kuampuni mo kalak i.

¹²Rela ngo ia menohken nggelluhna janah masuk bilangen jelma perjahat. Ipersan ngo dosa jelma nterrem ninganna menodipken asa iampuni kalak i. Nai nterrem mo jelma Kuberèken mahan upahna janah terolih ngo ia rebbakken karina jelma ntèger.”