Read Batak Dairi Jesaya 54 Bible Online

Jesaya 54 - Batak Dairi bible

Jesaya 54

¹Jerusalem, ukum arnia bagè daberru nggempus ngo ko siso ndorok menubuhken. Tapi bagèndari meroang-oang mo ko dekket merendè mersampang atè! Kumarna nterrem kalohon ngo dukak-dukakmu, buèen daripada dukak daberru siso itadingken sinibalèna.

²Pebellang mo undung-undung bekkasmu; pegeddang tinalina janah petegguh pasek-pasekna!

³Makin mbellang mo ko mi kamuhun bak kambirang, jelma pengisimu mengalah tanoh bangsa-bangsa janah mengiani mèduk kuta simelongo bagèndari.

⁴Ulang mbiar, oda ngo pemèlaenna ko; oda ilèai barang ipemalu. Oda nè èngètenmu oda setia i ko tikan poso; oda nè èngètenmu longomu tikan mbalu.

⁵Simenghanaken kono dosken sinibalèmu ngo Dèbata simbadia Israel ngo paluahken ko. JAHOWA Perkuasa, idi mo gerarNa, ia ngo Dèbata mengerajai suberri dunia

⁶Alè Israel, bagè sinibages rembaru ngo ko melui kumara itadingken sinibalèna. Tapi idiloi Dèbata nola ngo ko mengolihi janah nina,

⁷“Pellin sigejap ngo kessa kutadingken ko; ibagasen dom ngkelleng atè, Kualengi nola ngo ko.

⁸Pellin sigejap ngo Kutondalken ko kumernaken lagangKu mertuhu-tuhu. Tapi merkitè kelleng simenettap, masèh ngo atèngku midah ko.” Bagidi mo pendokken Dèbata sipaluahken ko.

⁹“Bagè tikan tikki si Noak merjandi ngo Aku oda nè iremrem laè mbuncar tanoh èn bagi ma mo bagèndari Aku merjandi oda nè melaga barang kuasup kènè.

¹⁰Dumegger pè karina delleng dekket uruk-uruk, oda nè mpostep kelleng atèngku bamu. Padan kedamèenKu dak hot ngo Kujèmak,” nina JAHOWA simengkekelengi ko.

¹¹Nina JAHOWA, “Alè Jerusalem kuta mersial ndotè ngo ko janah oda lot mengapoi. Kupelias nola mo danganmu, dekket batu-batu maharga.

¹²Kupajek mo bèntèng ipas batu jaspis nai pèntu pengkeruhenmu ipas batu intan nai pagarmu ipas batu nilam meratah nai.

¹³Gabè sisinKu mo karina pengisina i nai nduma janah sennang mo kalak i.

¹⁴Ipajek mo kono merdangaen mi ketègerren, ipedaoh ibas kinimpersah bak penèndessen nai.

¹⁵Mula ijuhap kono, oda ngo Aku pasulakken, barang isè sambing menerrang ko, dak talu ngo.

¹⁶Aku ngo menghanaken tukkang bessi simengumbaki api lako meneppa sinjata. Aku ma ngo menghanaken soridadu simemakkè sinjata i lako memunuh.

¹⁷Tapi karina sinjata siniteppana lako mengalo ko, oda merguna. Janah karina sangkaen i perhukumen ibuktiken kono mo i salah. Kuberèken mo kemenangen taba naposongKu,” bagidi ngo pendokken JAHOWA.