Read Batak Dairi Jesaya 55 Bible Online

Jesaya 55 - Batak Dairi bible

Jesaya 55

¹Nina JAHOWA, “Roh mo kènè karina simuasen, ènum mo, laè sienggo hantar. Roh mo kènè siso merkèpèng jalo mo pagè oda pella mergarar, janah pangan mo! Enggo ihantari anggur bak susu jalo mo, oda pella gararen.

²Man kadè tokoren siso pepulakken janah man kadè mengula siso pebessurken? Uèi mo perèntahKu, asa ipangan kènè simerandal dekket kipangan pangaen ntaboh.

³Dengkohken mo, alè bangsangKu, roh mo kè taba Aku, asa Kuberèken bai ndènè kenggeluhen situhuna. Merkitè ngkelleng bak kesetiaen siKuperbagah bai si Daud, Kubahan padan menettap dekket kènè.

⁴Situhuna kupebangkit ngo ia gabè raja bak pakalima saksi kuasangKu bai bangsa-bangsa.

⁵Idiloi kènè mo bangsa-bangsa sidèban, nai isudu kalak i mo roh mendahi kènè, kumernaken Aku, JAHOWA Dèbatamu, Dèbata simbadia Israel, kumarna enggo kupetèmbul kènè.”

⁶Sidekkah ndorok dèng, mulak mo kènè taba JAHOWA dilo mo tikan njolmit dèng Ia.

⁷Iobahi perjahat mo pengelakona janah iobah mo pikirenna. Belli mo balik ia taba JAHOWA asa terolih masèh atèNa. Idempakken mo balik taba Dèbatanta, kumarna permendè basa ngo JAHOWA mengampuni.

⁸Nina JAHOWA, “Oda ngo pikirenKu pikiren ndènè janah oda ngo dalanKu dalan ndènè.

⁹Bagè dates langit i tanoh nai bagidi mo datesna pikirenKu i pikiren ndènè nai, dekket dalanKu i dalan ndènè nai.

¹⁰Bagè udan susur i langit nai oda nè balik, tapi ibernekki mo tanoh i, pegaburkensa bak peturahken suan-suaen, merèken buah mahan pangaen bak bennih suanen,

¹¹bagi ma ngo rana sikuruapken oda ngo balik bagi sambing bangku, tapi ipesaut ngo barang kadè nipercintangku, janah pesautken karinana harkatku.

¹²Mersampang atè mo kènè menadingken Babel janah merkinijuah itaruhken mi ruar. Delleng bak uruk lolo janah mersurak-surak, mengkurpak tangan kayu-kayu sinijuma.

¹³Kayu sempènur mo menggancihi kayu merdori, suan-suaen bunga menggancihi kopi-kopi. Masa i karina asa termurmur Aku; mahan pertanda menettap siso ndorok mbalang.”