Read Batak Dairi Jesaya 56 Bible Online

Jesaya 56 - Batak Dairi bible

Jesaya 56

¹Idokken JAHOWA mo taba bangsaNa, “Ulaken mo karina sisènteng janah sirembang mi patinKu. Kerna sigejap nai roh mo Aku paluahken kènè janah ntarar mo kesèntengenKu.

²Kupasu-pasu ngo kalak simengerebuken ari Sabat janah sioda mengelamuni ari i. Kalak siso mengulaken kejahaten selloh ngo Kubaing bana.”

³Kalak sideban simersaor dekket bangsa JAHOWA oda ndorok mendokken, “Oda ngo ipadiat JAHOWA aku menembahsa rebbakken bangsaNa.” Kalak sinikasing oda ndorok merpikir, “Oda ndorok aku gabè bangsa JAHOWA, kumarna oda ndorok merpinempar aku.”

⁴Idokken JAHOWA ngo taba kalak i, “Mula irebuken kènè ari Sabat, mula setia kènè mi padanKu janah mengulaken kadè pesampangken atèngKu,

⁵ièngèt mo gerar ndènè i BagesKu, dekket i tengah-tengah bangsangKu. Lotien ngo i daripada mbuè dukak daholi bang daberru. Hot mo Kubaing gerar ndènè mada terlupaken.”

⁶Idokken JAHOWA taba jelma sidèban sienggo mbengket mi bilangen bangsa JAHOWA, simengkekelengi bak menguèi taba JAHOWA simengerebuken ari Sabat janah setia mi padanNa,

⁷“Kuarak mo kènè mi Sion, mi dellengKu simbadia, janah Kuberèken sampang atè i bages perguruenKu. Kujalo mo pèlèen sinipèlèken ndènè i langgatenKu. Igerari mo BagesKu rumah sodip bai karina bangsa.”

⁸Bagèen ngo nina JAHOWA Sintèmbul i simenaruhken Israel balik i buangen nai, “Kuarahken ma mo kalak sidèban asa mersaor dekket kalak sienggo pulung.”

⁹Ipasulak JAHOWA ngo bangsa-bangsa sidèban roh bagè binatang penjerngem lako menjerngem bangsaNa.

¹⁰Nina JAHOWA, “Pètung ngo pengulu-pengulu bangsangKu! Kadè poda pemettoh kalak i. Tosè bagè biang pekkak siso mengerreng ngo kalak i, tapi meddem sambing ninganna ternipi. Sennang kalohon ngo kalak i meddem!

¹¹Tosè bagè biang mokkus ngo kalak i oda merkebesur-besuren. Oda terbaing pengulu-pengulu i mengarusi. Karina kalak i mersibaing roh gèutna ninganna menulusi perlabanna sendiri.

¹²Idokken permabuk-permabuk i mo, ‘Arke mènum anggur turun gegohta! Sellohen dèng ngo baremben daripada ari èn!’ ”