Read Batak Dairi Jesaya 57 Bible Online

Jesaya 57 - Batak Dairi bible

Jesaya 57

¹Matè mo kalak selloh janah tobok, janah oda lot simengarusi barang memperatè-atèkensa. Enggo kessa matè, maluah mo kalak i ibas mara nai janah mengadi mo kalak i ibagasen damè.

³Tapi ukum kènè alè kalak perdosa, roh mo kènè asa ihukum! Oda sellohen kènè daripada kalak perhèlmu sihir, kalak silolo merlangkah julu meddem dekket merkendangen!

⁴Isè ngono sinitertabaen ndènè? Isè ngo sinirèhèen ndènè? Otang pemparen perluap bana pemberontak ngo kènè?

⁵Isembah kènè ngo sembahen maingken asa merdukak merkitè ibelli kè diri ndè iembah napsu i terruh-terruh kayu keramat ndènè. Ikubur kè ngo dukak-dukak ndènè i baruren laè, isellat-sellat batu.

⁶Jadi patut mo ipepulung kè batu-batu ndalit i sidi nai. Idi mo perbagianmu! Bai batu i ma mo iorèken kènè anggur dekket memèlèken domen. Idokdok kènè ngo lolo Aku mengidah karinana i?

⁷Laus ngo kè mi pucuk delleng lako memèlèken pèlèen dekket pepulakken napsu ndènè.

⁸Ibaing kènè ngo gana-gana meronah i gembar pèntu bages ndènè. Enggo itadingken kènè Aku. Italkasi kènè mo oles ndènè janah laus mi dates pedemmen siniamaken kendangen siniupahen ndènè asa rebbak kènè meddem, nai ipepulak kènè mo napsu ndènè.

⁹Ipakkè kènè mo minak dekket sibaungkus lako mersembah mi sembahen Molokh. Ipasulaki kènè ngo utusen mi nagerri ndaoh, bagi ma mi dunia kalak simatè.

¹⁰Oda merkeleja-lejaen kènè menulusi sembahen. Idokdok kènè ngo ndorok iberèken sembahen i gegoh rimbaru, asa ulang ndotè kènè.

¹¹Idokken JAHOWA, “Kadè pana sembahen i asa buradan kènè, memaing asa luap kènè janah lupa bangku? Oda nèngè ngo isembah kènè Aku, kumerna enggo ndekkah sip Aku?

¹²Tapi Kubagahken mo bai ndènè; palsu ngo ketoboken ndènè i, janah karina ulah-ulah ndènè i oda merguna bai ndènè.

¹³Mula dilo-dilo kènè, belli mo gana-ganaen idi paluahken kènè! Bennè mo kalak i ikabangken angin janah mersep merkitè iembus kessah sikali! Tapi kalak simerkeposen bangKu ngo sidasa nagerri i dekket menembah Aku i BagesKu.”

¹⁴Lot ngo mendokken, “Pekadè janah pèmaken mo dalan bai bangsangKu, pesisi mo karina penghalang.”

¹⁵Kerna bagèen ngo kata JAHOWA Sintèmbul i janah simbadia, simerkuasa soh mi amman sumendah, “Ndates kalohon ngo bekkasku janah mbadia, tapi bagi ma i tengah-tengah kalak sincerrep merukur janah peselsel kumarna dosa-dosana, lako pesuangken gegoh bak harapen kalak i.

¹⁶Oda ngo soh sidekkahna Kusalahken bangsangKu; oda ngo terrus dak melaga Aku, asa ulang mendellè kalak i, ai Aku ngo pegelluhken kalak i.

¹⁷Dosa kumarna nahaka kalak i ngo maing punguren Aku, kumarna i ngo Kuhukum janah Kutadingken kalak i. Tapi jèngèng ngo kalak i janah dak tong menjuljulken dalanna sendiri.

¹⁸Enggo kuidah pengelako kalak i, tapi Kupemalum ma mo kalak i. Kuteggu janah kuurupi mo kalak i janah kuapoi kalak sibonek ukur.

¹⁹Kuberèken mo kemènaken bai karina jelma, sindessing barang ndaoh pè. Kupemalum mo bangsangKu.

²⁰Tapi bagè laut ngo ukum jelma perjahat pukpuk mergalombang janah oda pennah mènak. Arasna merembah semperren dekket kubang.

²¹Oda lot kesennangen bai jelma perdosa,” nina JAHOWA.