Read Batak Dairi Jesaya 58 Bible Online

Jesaya 58 - Batak Dairi bible

Jesaya 58

¹Nina JAHOWA, “Surakken mo tuk gegohmu! Bagahken mo taba bangsangKu tersèngèt dosa-dosana.

²Isembah kalak i ngo Aku gennep ari, janah sèkel naing ibettoh lemmo atèngKu, bagè cara iulaken ma simerandal, janah setia mi patinKu. Idokken kalak i, lolo ngo kalak i menembah Aku janah ikekelengi patinKu sintèger i.”

³Ikusoken bangsa i mo, “Kadè lapaten puasa, ukum oda idah JAHOWA? Man kadè kita pecerrepken ukur, ukum oda ngo iper- datèken?” Idokken JAHOWA mo, “Situhuna, puasa pè kènè, menulusi perlabaen ngo kènè ninganna memetcek kalak sigajien ndènè.

⁴Ningan puasa merselisih janah merubati ngo kènè dekket memaing paksa. Idokdok kènè cara puasa ndènè i mendungkul Aku lako mendengkohken sodip ndènè?

⁵Ai mula puasa kessa kènè, isiksa kènè mo diri ndènè; ipetungkuk kènè mo takal ndènè, bagè bulung dukut-dukut. Ipekimbang kènè mo kaèn goni, nai ihamburi kènè cirabun mo i, nai galè mo kè i babona. Bagidi mo sinidokken ndènè puasa? Idok kènè ngo lolo Aku midah ulah-ulah ndènè i?

⁶Bagèen ngo ukum puasa siKukelemoken: Osari mo rantè penokohen dekket boban siso sènteng, janah paluah kalak sitertèndes.

⁷Bagiken panganmu taba kalak sikelèhèen, jalo mo kalak simampar-ampar mi bagesmu. Berrè mo oles bai kalak sabar janah ulang tulak kaka-anggimu simemerluken pengurupen.

⁸Nai mbincar mo kecihuren bamu bagè mataniari, janah ndor mo malum ugah-ugahmu. Kudengani mo kènè lako paluahken kènè. Roh mo aku lako menjamotken kènè i karina arah nai.

⁹Nai mula mersodip kènè, mènter kuuèi mo. Mula dilo-dilo kè taba Aku, mèter kualoi mo. Ulang nèngè tèndes kènè dengan ndènè. Petadi mo rubat-rubat dekket menukasi.

¹⁰Berrè mo mangan kalak simelèhè janah urupi kalak siterkilang. Mula bagi ngo ibaing kènè, sigellap i sikuliling ndènè kin gabè ncihur mo bagè mahar.

¹¹Dak kuteggu-teggu mo kènè janah kubessuri kasi pè i tanoh ngkerrah-kerring; Kudèdah mo kènè asa tong njuah-njuah janah mergegoh. Bagè pekken cukup laèna mo kènè, bagè takal laè oda nung marsak.

¹²Kuta sienggo ndekkah merumpak, gabè ipelias kènè nola mo balik i babo danganna kin. Igerari mo kènè, ‘Bangsa simengolihi peliasken pagar batu dekket pekadeken bages sienggo ncèda.’ ”

¹³Nina JAHOWA, “Rebuken mo ari Sabat ai i ngo ari JAHOWA. Ulang mengurus keperluenmu sendiri tupung ari i. Rayaken mo ari i ari sampang atè; pesangap ari JAHOWA merkitè ulang laus merdalani; ulang ma mahan bahaen barang mengerana sia-sia.

¹⁴Asa mersampang atè kènè kumernaken menguèi taba Aku. Kubaing mo kènè mersangap i suberri dunia. Sennang mo nggelluh ndènè kipangani hasil tanoh pusakka si Jakob, empung ndènè i. Aku JAHOWA ngo simendokken i.”