Read Batak Dairi Jesaya 59 Bible Online

Jesaya 59 - Batak Dairi bible

Jesaya 59

¹Ulang idokdok kènè oda lot gegoh JAHOWA lako paluahken kènè, barang tongkiksu lako mendengkoh dilo-dilo ndènè.

²Kumarna kejahaten ndènè ngo memaing asa oda idengkohken sodip ndènè tabasa. Dosa-dosa ndènè ngo menirang kènè bai Dèbata nai.

³Salah ngo kènè kumarna merluap dekket maing akkal-akkal, kerna maing kegegohen bak memunuh.

⁴Mengadu ngo kènè oda pella lot alasen dekket mengerungguken tapi oda sènteng hukum ndènè. Luap ngo kènè janah me- ngasangken siso merguna; ibaing kènè ngo rencana lako mencilakaken sidèban dekket mengulaken kejahaten.

⁵Taki-taki ndènè jahat merembahken kememago bagè naruh nipè merbisa. Mpustak kessa tinaruh i rumuar mo nipèna. Cituk poda merguna bamu taki-taki i, tosè bagè oles sinitenun ipas asar labah-labah nai!

⁷Dakdak ngo isura-surai kènè kejahaten, janah sèkel asa ndor ipesaut. Oda ragu kènè memunuh kalak siso mersalah. Barang mikè sambing kènè laus, itadingken kènè ngo kinicèda dekket kemagoen.

⁸Oda nung iusahaken kènè bakunè asa rukun, janah karina pengelako ndènè oda sènteng. Dak merbulut-bulut ngo dalanmu, barang isè mengèkutken dalan i, oda ngo ia sayurntua.

⁹Nina bangsa i mo mbang Dèbata, “Enggo kubettoh kami bagèndari kasa oda ipaluah ko kami bai jelma simenèndes kami nai. Kupèma kami ngo kecihuren tapi silotna pellin gellap tuiten.

¹⁰Dadap-dadap ngo kami bagè sipètung; cèger ari pè kami tergempang bagè tengah berngin; i tengah jelma singgelluh bagè kalak simatè ngo kami.

¹¹Buradan janah bonek ngo kami; kutulusi kami ngo kesèntengen, tapi oda lot; kuharapken kami ngo keluahen, tapi sia-sia.

¹²Mbuè kalohon ngo kesalahen nami meradepken ko; dosa-dosa nami ngo menalahken kami. Tuhu-tuhu ngo enggo satdar kami i kejahaten nami, janah memettoh dosa-dosa nami.

¹³Enggo mengosè padan kami meradepken JAHOWA, janah oda uè mengèkutken Dèbata nami. Enggo kutèndes kami sidèban janah menurimpang; laling ukur nami, janah luap kata nami.

¹⁴Enggo ipesisi hukum sènteng janah ipedaoh ketègerren. Kejujuren irèmèhken i tengah jelma nterrem janah keborjoken oda isarihken.

¹⁵Oda lot nè jelma ntèger, janah barang isè pesisiken kejahaten, ia sendiri mo gabè kenna kejahaten.” Enggo idah JAHOWA janah oda sennang Ia kerna oda lot nè kesèntengen.

¹⁶Lengang ngo ia kerna oda lot kèkè janah oda lot simenarapi. Nai ipakkè mo kuasaNa sendiri lako paluahken bak merrè kemenangen bai kalak i.

¹⁷Iselluk mo ketègerren dekket kinijuah mahan baju bessi dekket tangkuluk waja. Itekatken ngo lako mengolihken bagè sienggona janah memales siso sènteng.

¹⁸Ibalesken ngo taba musuh-musuhNa tosè bagè pemaing kalak i. Dekket ngo bangsa-bangsa simerian i pulo-pulo sindaoh oda maluah ibas hukumNa nai.

¹⁹Kuasa bak kehejinNa ikebiari karina jelma i kebincaren nai soh mi kesunduten. Roh ngo ia bagè laè nderras sinipuyu angin ngkerras.

²⁰Idokken JAHOWA taba bangsaNa, “Roh nè mo Aku mi Jerusalem lako paluahken kènè karina sitobat i dosa-dosa nai.

²¹Kubaing mo padan dekket kènè: Kuberèken mo kuasangKu bai ndènè bak peddahKu soh mi amman sumendah. Peddahken mo taba dukak-dukak ndènè asa iajarken kalak i ma turun-tumurun bagèndari nai soh mi amman sumendah.”