Read Batak Dairi Jesaya 6 Bible Online

Jesaya 6 - Batak Dairi bible

Jesaya 6

¹I tahun permatè Raja Usia, kuidah ngo JAHOWA. Kundul ngo ia i tahtaNa ndates janah mermulia. JubahNa menangkemmi suberri Bages JAHOWA.

²I sikulilingNa lot ngo cènder malaèkat Serafim njolah bagè api, terennem ngo kabengna gennep. Dua kabengna menutupi abèna, dua menutupi dagingna, janah dua nai kabengna i ipakkè lako ngkabang.

³Mersidilon ngo kalak i samahsa: “Simbadia, simbadia, simbadia. Simbadia ngo JAHOWA Pergegoh Sisotercodi. Dom kemuliaenNa ngo suberri dunia èn.”

⁴Dumegger ngo hatap Bages JAHOWA ibaing sora kalak i janah dom cèmber ngo Bages JAHOWA.

⁵Nai ningku mo, “Enggo cilaka! Oda lot nèngè harapenku, kumerna melamun ngo babahku ibaing dosa, janah aku pè rebbak jelma sibagidi ma. Tukasi pè bagi, enggo idah matangku Raja, JAHOWA Pergegoh Sisotercodi!”

⁶Nai ngkabang mo sada pergelluh i mendahi aku merembah rara sinibuatna igappit i langgaten i nai.

⁷Nai idaisken mo rara i mi bibirku ninganna idokken, “Enggo dais rara èn mi bibirmu. Bagèndari enggo isasa kesalahenmu janah dosamu pè enggo iampuni JAHOWA.”

⁸Nai kudengkoh mo sora JAHOWA mendokken, “Isè mo ndia Kupasulak? Isè mo ndia merembah beritanta?” Kualoi mo, “En ngo aku. Pasulak mo aku!”

⁹Nai ipasulak mo aku merembah tennah èn mendahi jelma: “Dak idengkohken kènè ngo, tapi oda iarusi kènè. Dak iperdatèken kènè ngo, tapi oda ibettoh kènè kadè masa.”

¹⁰Nai idokken mo taba aku, “Pejèngèng mo pikiren kalak i, petongkik penggelna janah pepètung matana, asa ulang merpendidah kalak i, ulang merpendengkoh barang me- ngarusi, nai balik mendahi Aku janah gabè malum iakap.”

¹¹Mengkuso mo aku, “Sadikè dekkahna masa bagi alè JAHOWA?” Ialoi mo, “Soh merumpak karina kuta janah oda nèngè lot mengiani, sapo i pè oda i iani, dekket tanoh i pè gabè terulang janah ndagal,

¹²pengisi kuta i pè Kupelaus mo mi bekkas ndaoh, nai gabè melongo mo suberri tanoh èn.

¹³Salang sada kalak ipas sipuluh kalak nai mula lot dèng tading i nagerri i, ia pè kennah ibinasaken. Tapi tosè bagè kayu beringin mula pè itabah, ukum lot dèng tongkohna, bagi ma ngo lot dèng sima-sima bangsa i mahan pemparen bangsa simbadia.”