Read Batak Dairi Jesaya 60 Bible Online

Jesaya 60 - Batak Dairi bible

Jesaya 60

¹Kèkè mo ko, janah mercuhaya mo ko, alè Jerusalem, kerna enggo roh cuhaya keluahenmu; ibèndangi Dèbata ngo ko merkitè kemulianNa.

²Isangkemmi gellap ngo tanoh èn, hèjem mengemkemmi karina bangsa; tapi mbincar ngo bindella JAHOWA i babomu, ntarar ngo cuhaya pekerohNa i babomu.

³Merkolan-kolan karina bangsa roh mendapetken bendelamu, sèkel karina raja taba cuhaya siroh bamu nai.

⁴Tengen mo kadè masa i sikulilingmu; jelma nterrem rengem roh balik mendahi ko. Dukak-dukakmu daholi roh i sindaoh nai, itempi ngo berrumu.

⁵Lengang mo ko mengidah i janah mbinar abèmu; melui mo atèmu dekket sampang ukurmu Harta karina bangsa iembah bamu mertinèncuk mo kinibèak i kèpar laut nai bamu.

⁶Mertumpu mo mbuè unta mi nagerrimu, merohen ngo idi i Midian dekket Efa nai. I Seba nai iembah dèba mo emmas bak kemènjen, ninganna memoji pemaing JAHOWA.

⁷Kambing, biri-biri Kedar iembah bamu biri-biri i Nebayot nai mèma mahan persembahmu. Pesennangken atè JAHOWA ngo pèlèen i iperiah mo BagesNa dom kemuliaen.

⁸Kadè ngo i mayap-ayap bagè hembun mergiro-giro bagè ndarapati ngkabang lako balik?

⁹Idi mo keppel-keppel siroh merlabuh merembah bangsa Dèbata balik i nagerri ndaoh nai. Iembah ngo dekket emmas bak pirak lako memoji JAHOWA Dèbatamu; bai Dèbata Israel Simbadia kalohon, simemaing mersangap bangsaNa.

¹⁰Nina JAHOWA taba Jerusalem, “Kalak sidèban naing pekadeken balik pagar batumu, dekket raja-raja naing mengkebasi ko. Arnia Kuhukum ko ibas lagangKu, tapi bagèndari masèh ngo atèngku midah ko.

¹¹Mahar ari berngin mbuka mo pengkeruhenmu, asa ndorok itaruhken kinibèak bangsa-bangsa bamu dekket raja-raja kalak i gabè tabanen.

¹²Bangsa bak kerajaen siso uè tunduk bamu kennah binasa janah mersep-mersep bagi.

¹³Sikelolonken rambah Libanon kennah itaruhi bamu kayu ares, sempènur dekket mpiangi lako mahan BagesKu merandal dekket pemendèken bekkasKu cènder.

¹⁴Roh mo mersembah dukak-dukak simenèndes ko, kalak sinung mengelèai ko gabè tunduk, igerari mo ko ‘Kuta JAHOWA’, ‘Sion, kuta Dèbata simbadia Israel’.

¹⁵Oda nè mo ko itadingken bang ikecegoken, janah oda ibelli longo-longoen. Kubaing mo ko menettap kelolonken, bekkas mersampang atè soh mi amman sumendah.

¹⁶Ijamotken bangsa-bangsa bak raja-raja mo ko, bagè sada kalak partua ibages menjamotken dukakna. Nai satdar mo ko, Aku JAHOWA paluahken ko, dekket Dèbata Israel simergegoh i menampati ko.

¹⁷Kuembah mo emmas gancih suasah, dekket pirak gancih bessi. Kuberrè mo suasah gancih kayu, dekket bessi gancih batu. Kubaing mo mènak nagerrimu janah iperèntah merkitè kesèntengen.

¹⁸Oda mo lot nèngè berita tersèngèt penokoen i nagerrimu bang tersèngèt merumpak bak merentuh i aurmu. Bagè pagar batu Kulegenni kono, janah ipoji ko mo Aku sipaluahken kono.

¹⁹Oda nè perlu ko isenggang mataniari tikan mahar, janah oda perlu ibendangi bulan tikan berngin. Kumerna Aku JAHOWA mo gabè cuhaya simenettap bamu, Kucuhayai mo ko merkitè kemuliaenKu.

²⁰Lot mo bamu mataniari siso nung sundut dekket bulan siso pennah surut. Kumarna Aku JAHOWA mo gabè cuhaya simenettap bamu, mentadi mo bonekmu.

²¹Pengisimu pè merpengelako bennar mo, milik kalak i mo nagerri i soh mi amman sumendah. Bagè cangkoken siKusuan sendiri mo kalak i, lako petararken kehejinKu.

²²Salang bilangen cituk janah merlèa kennah gabè bangsa mbellen jah mergegoh. Ndor mo Aku JAHOWA kebbas tupung tikki selloh.”