Read Batak Dairi Jesaya 61 Bible Online

Jesaya 61 - Batak Dairi bible

Jesaya 61

¹Lot ngo bangku kuasa JAHOWA Sintèmbul i; Ia ngo memilih dekket mengutus aku lako merembah sukuten keluahen bai sincor dekket pemalumken kalak sienggo melala ukurna; lako meningtingken taba kalak siterkurung ndor nè mo kalak i ipaluah, dekket taba kalak sikurungen ipaluah nè mo kalak i.

²Ia ngo pasulakken aku lako memagahken enggo dapet tikkina JAHOWA paluahken; lako mengapoi karina kalak sibonek dekket memales taba musuh-musuh kalak i;

³lako merèken sampang atè bak oang-oang taba kalak sibonek bak simerhendem; lako mengobah bonek kalaki gabè endè pemojien. Codi mo kalak i bagè kayu sinisuan JAHOWA sendiri. Iulaken kalak i mo simendè janah bennar, gabè ipesangap mo JAHOWA.

⁴Ipajek kalak i nola mo kuta sienggo ndekkah kin merumpak janah pecèndekken bekkas sienggo ndekkah melongo.

⁵Alè bangsangku kalak sidèban mo mengkebasi kènè kalak i mo mermakani pinakan ndènè dekket mengula juma bak pekken anggur ndènè.

⁶Igerari mo kènè naposo JAHOWA janah ipenggerarken imam Dèbatanta. Kènè mo mengerasaken kinibèak bangsa-bangsa janah gegah mo pengakap ndènè kumarna harta kalak i.

⁷Kumarna enggo dua kali lempit kememèla ndènè bak tikas bang kelèaen enggo bagian ndènè nai terolih tading-tadingen dua kali lempit mo kènè i nagerri ndènè janah milik ndènè mo sampang atè simenettap.

⁸Idokken JAHOWA, “Kukekelengi ngo kesèntengen jah nggogo midah penèndessen bak kejahaten. Setia ngo aku merèken upah ndènè bak mahan padan menettap dekket kènè.

⁹Termurmur mo pinemparmu tah soh mikè termurmur i tengah-tengah karina bangsa. Nai karina kalak simengidahsa mengakui, kupasu-pasu ngo bangsa èn.”

¹⁰Nina JAHOWA mo, “Mersampang atè ngo Aku kumarna JAHOWA, meroang-oang ukurku kumarna Dèbata. Bagè anak laki bak daberru sirembaru jejap memakè pakèen merandal kalohon, bagidi mo isellukken JAHOWA bangku baju kinijuah bak kemenangen.

¹¹Bagè bennih siniennahken turah mo i gabè suan-suanen, bagi mo JAHOWA Dèbata peturahken kinijuah janah karina bangsa mo memojisa.”