Read Batak Dairi Jesaya 62 Bible Online

Jesaya 62 - Batak Dairi bible

Jesaya 62

¹Kumernaken Jerusalem mongkam mo aku, kumernaken Sion oda mertahan sip aku, soh mi tikki ipaluah ia janah kemenangenna merbendella bagè obor tikan berngin.

²Alè Jerusalem idah bangsa-bangsa mo kemenangenmu, raja-raja menatap kehangganmu. Igerari mo ko dekket gerar rembaru JAHOWA sendiri ngo memaing gerarmu.

³Codi bagè rudang merandal ngo ko i tangan JAHOWA rudang kerajaen i tangan Dèbatamu.

⁴Oda nè ‘Sinitadingken’ gerarmu oda nè ‘Sinipelongo’ nagerrimu. Igerari mo ko, ‘Sinikekelengi Dèbata’, janah nagerrimu igerari, ‘Sienggo jejap’, kerna ngkelleng ngo atè JAHOWA bamu, tosè bagè sinibalè ngo ia bai nagerrimu.

⁵Bagè anak perana mengkabini simerbaju, bagi ngo situmempa ko mengabin gabè sinibagesna ko. Bagè sada kalak kèla lolo midah sinibagesna, bagi ngo lolo atè JAHOWA midah ko.

⁶Kubaing ngo penjaga i parik Jerusalem; oda ndorok ndong kalak i mahar ari berngin, tapi kennah terrus pesèngètken JAHOWA tersèngèt bagah-bagah sienggo nipadankenNa.

⁷Oda ndorok ibelli kalak i Ia mertahan sip kum mak dèng ipelias nola Jerusalem, dekket memaingsa termurmur i suberri tanoh èn.

⁸Enggo ipadanken JAHOWA merkitè bulaban janah pesautenna ngo i merkitè kuasaNa: “Oda nè kuberrè pagèmu bai musuhmu; kalak sidèban pè oda nè mengènum anggurmu siniulakenmu mersusah payah.

⁹Tapi kènè sipepulungken siniperani kipangan hasilna ninganna memoji JAHOWA; janah kènè simenapu buah anggur mengènum laèna i kasèan BagesKu.”

¹⁰Alè pengisi Jerusalem, karuar mo kè arap pèntu pengkeruhen, pèmaken dalan bai kalak sinaing balik. Bahan mo dalan lubungen, pesisi mo batuna, pecènder pertanda bai bangsa-bangsa.

¹¹Itengesken JAHOWA ngo tennahna èn bai karina dèsa siualuh i tanoh èn, “Bagahken taba pengisi Sion, ‘Tengen, enggo roh JAHOWA sipaluahken i! Rasken ngo Ia dekket kalak sienggo nipaluahNa i.’ ”

¹²Igerari mo kalak i: ‘Bangsa simbadia’; ‘Bangsa sinipaluah JAHOWA’. Igerari mo Jerusalem ‘Kuta niririt JAHOWA’. ‘Kuta siso itadingken JAHOWA nèngè’.