Read Batak Dairi Jesaya 63 Bible Online

Jesaya 63 - Batak Dairi bible

Jesaya 63

¹“Isè ngo ia siroh i Bozra sini Edom nai? mbara bajuna, pakkènna merandal; teggap ngo ia merdalan janah meheji.” “Aku ngo JAHOWA siterbaing paluahken janah roh merembah berita kemenangen.”

²“Kasa bagi mbarana pakkènmu, bagè baju pengerrik buah anggur?”

³“Sadaku ngo mbengket mi pengeriken anggur oda lot mengurupi Aku i tengah-tengah bangsangKu nai. Kuerrik ngo bangsa-bangsa kumarna lagangKu, bagè mendedohi buah anggur. Mbirsak mo daroh kalak i menaptapi bajungKu mengelamuni karina pakènKu.

⁴Enggo kupilih ari pemalessen dekket tikki keluahen bai bangsangKu.

⁵Menulusi ngo aku, tapi oda lot mengurupi lengang ngo Aku kerna oda lot membantu. Nai gegohKu sendiri ngo mengurupi Aku, lagangKu membantu Aku.

⁶Ibagasen lagangKu singgerger i Kudedohi bangsa-bangsa; Kubinasaken kalak i, janah Kuorèken daroh kalak i mi tanoh.”

⁷Naing kubagahken masèh atè JAHOWA dekket memojisa kumarna pemaingNa i karina. Merginja ngo pasu-pasuna bai bangsaNa kumarna masèh atèNa janah oda mengadi-ngadi ngkelleng atèNa.

⁸Idokken JAHOWA, “Tuhu-tuhu ngo bangsangKu kalak i dukak-dukak siso maing terdehèrep.” Nai Ia mo gabè paluahken kalak i,

⁹ia sendiri ngo menggongken kesusahen kalak i. Oda itenges JAHOWA utusen barang gancihna; Ia sendiri ngo kipaluah kalak i, kumarna ngkelleng bak masèh atèNa. Dak ipermakan ngo kalak i mungkah arnia nai.

¹⁰Tapi memberontak ngo kalaki dekket peluiken atè JAHOWA. Nai merbalik mo Ia gabè musuh kalak i ia sendiri mo mergeraha mengalo kalak i.

¹¹Nai terèngèt mo kalak i jaman siarnia, tikala jaman si Musa, naposo JAHOWA. Kuso-kuso mo kalak i, “Idikè ngo JAHOWA simeneggu pengendeng bangsaNa memellus laut? Idikè ngo JAHOWA simemerèken kuasaNa bai kalak i?

¹²Idikè ngo JAHOWA simendengani si Musa merkitè tanganNa simergegoh bana mahantu, dekket memellah laè i hadeppen kalak i asa termurmur gerarNa soh mi amman sumendah?

¹³I dikè ngo JAHOWA simeneggu kalak i merdalan memellus laè mbages? Bagè kuda merdalan memellus padang gurun, oda pennah terdengdeng kalak i.”

¹⁴Iarak JAHOWA ngo kalak i mi bekkas adien tosè bagè pinakan ialai menggagat mi jampalen. Bagi ngo Ia meneggu bangsaNa, asa ipesangap gerarNa.

¹⁵Alè JAHOWA, tengen mo i sorga nai, ipas bekkasMu simbadia bak mermulia i nai. I dikè ngo ngkelleng dekket kemahantuenMu? I dikè ngo kehejienmu dekket masèh atèMu? Ulang mo tagangi i bai nami nai.

¹⁶Otang kono ngo Bapa nami? Si Abraham bak si Jakob oda menandai kami. Tapi ukum kono alè JAHOWA, Bapa nami ngo ko, simemperkinijuahi kami arnia nai.

¹⁷Alè JAHOWA, kasa ibelli kono kami laling? Kasa ipejengjeng kono ukur nami gabè oda nè merkebiaren kami baMu? Olihi mo kumerna pengendengMu, kumernaken bangsaMu, harta pusakkaMu.

¹⁸Kasa ibelli kono musuh i mengelucak-lucak BagesMu, dekket jelma kalak simengelamuni dellengMu simbadia?

¹⁹Ibaing kono ngo taba kami bagè siso nung merkuasa ko bai nami; bagè cara oda nung kami gabè bangsaMu.