Read Batak Dairi Jesaya 65 Bible Online

Jesaya 65 - Batak Dairi bible

Jesaya 65

¹Idokken JAHOWA, “Kebbas ngo Aku mengaloi bangsangKu, tapi oda ngo mersodip kalak i taba Aku. Nggèut ngo Aku ijupai kalak i, tapi oda itulusi kalak i Aku. Oda ngo idilo bangsa i Aku, kasi pè enggo kebbas Aku mengaloi: Èn ngo Aku!

²Dak kebbas ngo Aku menghalopken bangsangKu, tapi dak memberontak ngo kalak i. Mengulaken jahat ngo bangsa i janah menjuljulken sura-surana sendiri.

³Pukpuk ngo punguren Aku ibaing kalak i kumarna ipèlèken ngo pèlèen i pekken-pekken bai sembahen dekket menutung kemènjen i langgaten-langgatenna.

⁴Laus ngo kalak i tikan berngin mi liang-liang dekket mi perkuburen lako mengido peddah bai sumangan nai. Ipangan kalak i ngo jukut babi dekket iènum kuah gulè haram.

⁵Idokken kalak i ngo, ‘Laus kè ndaoh, ulang degges kènè kami kumarna mbadia ngo kami janah laèn bai ndènè nai!’ Oda tertengen-tengen aku ulah-ulah kalak i! Codi bagè api siso nung mèntep ngo lagangku midah kalak i.

⁶Enggo tersurat i lebbèngku hukum taba kalak i. Tuhu-tuhu oda mertahan sip Aku. Naing kubales ngo kejahaten kalak i

⁷kumernaken dosana dekket dosa empungna. Ilèai kalak i ngo Aku merkitè menutung kemènjen bai sembahen i bekkas mersembah i delleng. Kennah kubales ngo taba kalak i tosè mi pengelakona i tikki sienggo laus i”.

⁸Idokken JAHOWA, “Buah anggur mula lot dèng laèna oda ipatakken, tapi ipetcek ngo asa gabè anggur. Bagidi ma ngo bangsangKu oda Kuripasken karinana, kerna lot dèng ngo i tengah-tengah kalak i nai menguèi taba Aku.

⁹Simpulungen kalak Israel i marga Juda nai naing kupasu-pasu, janah pinempar kalak i imo sidasa tanoh dellengKu. Jelma sikupilih i simenguèi taba Aku ngo merian i sidi.

¹⁰Isembah bangsangku mo Aku; menggagati mo biri-biri dekket lembu kalak i i kendet Saron dekket i Napa Akhor.

¹¹Tapi oda ngo bagi jalonken kalak simenadingken Aku siso menulihken Sion dellengKu simbadia, simemèlèken pangaen bai Gad dekket Meni, sembahen peruntungen bak nasip.

¹²Matè mo kènè karina sikira pèlèen kegegohen. Kumarna, tikan kudiloi kènè, oda ngo mengaloi kènè, janah tikan mongkam Aku, oda idengkohken kènè. Lemmoen ngo atè ndènè mengalo Aku dekket mengulaken jahat.

¹³Situhunna, mangan ngo kalak simenembah Aku, tapi rapar ngo ukum kènè. Mènum ngo kalak i, ukum kènè muasen ngo. Mersampang atè ngo kalak i, ukum kènè termèla mo.

¹⁴Situhuna, mersurak oang-oang ngo kalak i, ukum kènè tangis milangi mo.

¹⁵Ipakkè jelma sikupilih i mo gerar ndènè mahan sumpah: “Katerra pè ibunuh JAHOWA Sintèmbul i mo kènè bagè kalak i!” Tapi kalak simenguèi Aku, Kuberèken mo bana gerar rembaru.

¹⁶Karina jelma silot i nagerri i simengido pasu-pasu, mengido pasu-pasu bai JAHOWA nai si setia i. Karina kalak sinaing mersumpah, mersumpah ngo merkitè gerar JAHOWA si setia i. Ai enggo mersep kinidersa arnia janah ilupaken.”

¹⁷Idokken JAHOWA, “Kubahan mo langit rembaru dekket tanoh rembaru. Ilupaken mo simasa perlebbè i janah oda nè èngèten i.

¹⁸Lolo janah mersampang atè mo soh mi amman sumendah kumernaken kadè sienggo Kuhanaken. Kujadiken mo Jerusalem rembaru dom sampang atè, dekket pengisina meria-ia.

¹⁹Aku sendiri pè merlolo atè kumarna Jerusalem, dekket mersampang atè kumarna pengisina. Oda lot nèngè tangis i kuta i, dekket oda lot nè dilo-dilo mengido pengurupin.

²⁰Oda lot matè dukak-dukakna tikan kètèk janah simbelgah pè nggeddang mo umurna. Jelma simerumur seratus tahun, poso dèng ngo iètong, janah mula matè tikan madèng bagidi iètong kenna hukumKu.

²¹Ipajek jelma mo bages janah i iani sendiri; oda gabè i iani dèba. Isuani kalak i mo pekken anggur janah mengerasai laè anggurna; oda gabè ènumen ndèba. Nggeddang mo umur bangsangKu bagè kayu, janah mengerasai hasil ndiula kalak i.

²³Karina sini bahan kalak i merhasil janah dukak-dukakna pè oda matè sidari. Kalak i dekket pinemparna kupasu-pasu mo soh mi amman sumendah.

²⁴Sinderrang mak dèng ipido kalak i, enggo mo Kualoi; sinderrang madèng pul mersodip kalak i, enggo mo kuuèi sodipna i.

²⁵Rebbak menggagat mo sorigala dekket anak biri-biri; kipangan nggala mo singa bagè lembu, janah nipè oda nèngè merbahaya. I suberri dellengKu simbadia oda lot nè simengerogiken bak memaing jahat.”