Read Batak Dairi Jesaya 66 Bible Online

Jesaya 66 - Batak Dairi bible

Jesaya 66

¹Idokken JAHOWA, “Langit ngo tahtangKu tanoh ngo tingkahen nehèngKu. Jadi bakunè mo bages sinaing bahanenmu bangKu, janah bakunè mo bekkas sinaing peliasenmu ianenku?

²TanganKu ngo menempa suberri dunia, memaing hana i karina. Tapi kalak percerrep ukur ngo lemmo atèngku, kalak simenelselli dosa-dosana, simerkebiaren janah menguèi taba Aku.

³Tapi merpengelako roh-roh gèutna ngo kalak i, lolo ngo kalak i mersembah merkitè cara pemoyang atè. Oda lot kalihna bai kalak i: memèlèken lembu tonggal dekket memèlèken jelma, memèlèken anak biri-biri dekket memohok kerahong biang; memèlèken domen dekket memèlèken daroh babi, menutung dahupa dekket menembah gana-gana.

⁴Kumerna i Aku pè kubaing mo lemmo-lemmo atèngKu janah pesempaken taba kalak i olpek sinikebiaren kalak i. Kerna tikan dilo-dilo Aku, oda lot simengaloi tikan mongkam Aku, oda lot simendengkohken. Loloen ngo kalak i mengalo Aku dekket mengulaken jahat.”

⁵Dengkohken mo bakunè pendokken JAHOWA kènè alè simerkebiaren janah merpenguèi baNa, “Kumarna setia ngo kènè taba Aku, lot ngo i tengah-tengah bangsamu nai nggogo midah kènè, janah oda uè mersaor dekket kènè. Irehè-rèhè kalak i mo kènè merkitè mendokken, ‘Siidah mo ipacidah JAHOWA kehejinNa, asa kuidah kami sampang atèmu.’ Tapi kalak i nola ngo termèla.

⁶Beggè! Lot sora gumeruhguh i kuta; lot sora i BagesKu nai; sorangKu ngo i sidang memales musuh!

⁷Tosè bagè sada pertua ibages ngo kutangku simbadia i tikan madèng mengennat rabisen; menubuhken anak daholi tikan madèng irasaken mbernit menubuhken.

⁸Isè nung mendengkoh bagidi? Isè nung mengidah masa bagidi? Tapi enggo tubuh bangsa Israel tikan irasaken Sion rabisen lako tubuh-tubuhen.

⁹Ulang dok atè ndènè kuarak bangsangKu soh mi tikki tubuh-tubuhen janah oda memelli kalak i itubuhken.” Bagidi ngo pendokken JAHOWA.

¹⁰Mersampang atè mo rebbak dekket Jerusalem, kènè alè simengkekelengisa. Kènè sibonek kumernakensa bagèndari ndorok meroang-oang.

¹¹Irasai kènè mo kinidumana, codi bagè sada dukak menusu taba inangna.

¹²Kerna idokken JAHOWA, “Kuberèken mo bai ndènè kesennangen bagè laè menjarir; itaruhken mo bai ndènè kekayaen bangsa-bangsa bagè laè merginja. Tosè mo kènè bagè sidukak ipesusu bak icèmun inangna, bana idemban-demban i abing-abingenna.

¹³Kuapoi mo kènè i Jerusalem, bagè pemaing inangna mengurihken dukakna.

¹⁴Mengidah i, lolo mo kènè janah gabè mergegoh bak sèhat bagè umbut. Nai irasaken naposongKu mo kuasangKu janah irasai musuh-musuhKu mo lagangKu.”

¹⁵Tuhu-tuhu ngo, roh mo JAHOWA merkitè api; ipasang mo kurètaNa bagè angin lako pepulakken lagaNa, janah nggang mo isenggak.

¹⁶Kerna karina kalak siterdapet mersalah ihukum merkitè api dekket peddang, janah nterrem ngo ihukum matè.

¹⁷Idokken JAHOWA, “Karina kalak sipebadiaken dirina merkitè merotor mi pekken-pekken lako bai sembahen dekket mersembah tabasa, matè ngo rasken kalak sikipangan jukut babi dekket menci bak pangaen sidèban simeronah.

¹⁸Kubettoh ngo pikiren dekket ulah-ulah kalak i. Roh mo aku lako pepulungken jelma i suberri bangsa-bangsa nai. Sinderrang tumpu kalak i, idah kalak i mo kuasangKu.

¹⁹Kubaing mo sada tanda i tengah-tengah kalak i. Kupaluah mo situk bai kalak i nai. Kupasulak mo kalak i mendahi bangsa-bangsa i nagerri sindaoh siso nung dèng mendengkoh tersèngèt Aku barang mengidah kehejinku dekket kuasangKu: Mi Tarsis, Libia dekket Lidia bak pemanah-pemanahna sipandè i, mi Tubal dekket Junani. Isukutken kalak i mo kebelgahenKu i tengah-tengah bangsa-bangsa idi.

²⁰Iarahken kalak i mo balik kaka-anggi ndènè sisada bangsa i nagerri i nai mahan luah bangKu. Iarahken kalak i mo jelma i mi dellengKu simbadia i Jerusalem ninganna memasang kuda, kalodè dekket unta, bagi ma bak kurèta dekket pedati, bagè kecemmalen kalak Israel merembah pagè ibas baka mbersih mi Bages JAHOWA.

²¹Kupebangkit mo dèba bai kalak i nai gabè imam dekket gabè kalak Lewi.

²²Bagè langit dekket tanoh rembaru gabè tahan kerna kuasangKu, bagi ma mo pinemparmu dekket gerarmu, hot janah menettap.

²³Gennep Peltak Bulan dekket gennep ari Sabat roh mo karina jelma manusia lako menembah Aku i Jerusalem.

²⁴Sinderrang berkat, idah kalak i mo bangkè kalak sienggo memberontak taba Aku. Oda nggèut matè olong sikipangan bangkè kalak i, dekket api simengelekkup kalak i pè oda nè mèntep; sada sitengennen merpengerri bai karina jelma.”