Read Batak Dairi Jesaya 7 Bible Online

Jesaya 7 - Batak Dairi bible

Jesaya 7

¹Raja Ahas imo anak si Jotam, kempu si Usia. Tikan ia memerèntah Juda masa mo geraha. Roh mo si Rezin raja Siria dekket si Pekah anak si Remalya raja Israel lako mengkubu Jerusalem. Tapi oda tertaluken kalak i kuta i.

²Idengkoh Raja Juda kessa mo enggo roh tenterra Siria mi nagerri Israel mersada taki, buradan mo ia dekket bangsana, menggirgir mo kalak i bagè kayu isempul angin.

³Idokken JAHOWA mo mbang si Jesaya, “Arahken mo anakmu si Syear Jasyub janah dahi mo Raja Ahas. Idapet kono mo ia ipunca parik laè bangkiten bendar kan julu, bekkas menaptapi.

⁴Ulang mbiar ia barang bingung. Laga Raja Pekah dekket Raja Rezin bak tenterra kalak Siria i oda merbahayaen i daripada dua puntung kayu mercèmber.

⁵Siria enggo sada taki dekket Israel deket rajana.

⁶Naing ijuhap kalak i ngo Juda dekket mencubiari jelma pengisina i asa gabè kan kalak i, nai ipebangkit mo katèna anak si Tabeel gabè raja.

⁷Tapi Aku, JAHOWA, mendokken oda tuhu i masa,

⁸kumarna oda gegohen Siria asa Dam- syik kuta sabungenna i, janah Damsyik oda gegohen asa Raja Rezin. Ibagasen ennempuluh lima tahun terbagi-bagi mo Israel, sanga oda nè ètongen bagè bangsa.

⁹Oda gegohen Israel asa Samaria kuta sabungenna i, janah Samaria pè oda gegohen asa Raja Pekah. Mula oda tuhu-tuhu kènè percaya taba aku pasti ngo oda tahan kènè.”

¹⁰Ipesoh JAHOWA dèng ma ngo tennahna taba si Ahas:

¹¹“Pido mo asa iberrèken JAHOWA Dèbatamu sada pertanda bamu, tah ibekkas simatè i terruh tanoh nai barang tah i dates langit nai.”

¹²Ialoi si Ahas mo: “Oda aku mengido tanda. Oda uè aku mengunjuni JAHOWA.”

¹³Nai idokken Nabi Jesaya mo: “Mula bagi dengkohken mo alè pemparen Raja Daud! Oda dèng cukup iakap kènè mengunjuni kesobaren jelma, asa ioji kè dèng ma kesobaren Dèbatangku?

¹⁴Bagèndari JAHOWA sendiri merrèken pertanda bai ndènè: Berrat-berrat rumah mo sada simerbaju, itubuhken mo sada anak, ibaing mo gerarna Imanuel.

¹⁵Enggo kessa mbelgah ia ndorok memaing keputusenna sendiri, nduma mo nagerri èn.

¹⁶Kerna sinderrang mak dèng dapet tikki i, duana nagerri siniperèntah raja-raja sinikebiarenmi kennah itadingken terulang janah numar.

¹⁷Roh ngo raja Assur ipasulak JAHOWA, nai kono dekket pengisi bagesmu dekket ginemgemmu makin tersessak mo lampo dèng ipas sienggo nung iakapi kènè mulai pecah kerajaen Israel dekket Juda.

¹⁸Tupung masa i, idiloi JAHOWA mo kalak Mesir dekket kalak Assur, nai roh mo sidua bangsa i bagè lempagem dekket wani memuluti napa-napa merling-ling dekket ruang-ruang batu mamak. Sangkem mo kalak i i gennep rambah kopi-kopi dekket i karina bekkas merdukut.

²⁰Bagè cara iupahi JAHOWA ngo raja Assur asa ibaing kalak Israel bagè sada kalak tukkang gonting, mencukkur salpun karina buk dekket bukbuk i daging.

²¹Tikan masana i, mula lot sada kalak memiara sada lembu anè-anè dekket pellin dua sambing kambing,

²²laè susu pinakan i iba dèng ngo bai jelma sitadingna i nagerri i. Tuhu-tuhu mènum susu dekket tenggoli mo kalak i.

²³Tikan masana i pekken anggur sinisuani seribu ngkambenna anggur dekket harga seribu riar, gabè terulang janah turah mo i sidi rambah merdori-dori.

²⁴Barang isè laus mi sidi kennah merembah panah, kumarna suberri nagerri i enggo gabè rambah merdori-dori.

²⁵Bagi ma ngo dekket uruk sienggo biasa iula dekket isuani, enggo gabè rambah merdori-dori. Pellin bekkas lembu dekket biri-biri menggagat nai ngo kessa guna tanoh i.”