Read Batak Dairi Jesaya 8 Bible Online

Jesaya 8 - Batak Dairi bible

Jesaya 8

¹Idokken JAHOWA mo taba aku, “Buat mo sada batu lè mbellang, nai surat mo dekket surat ntangkas-tangkas: ‘Isèlu menaban, isèmbuk mupusi.’

²Dilo mo dua kalak mahan saksi ketoken, imo Imam Uria dekket si Zakharia anak si Jeberekhya.”

³Oda pella ndekkah isidi nai mbadan mo sinibagesku. Tubuh kessa mo anak nami i, idokken JAHOWA mo taba aku, “Baing mo gerarna ‘Isèlu menaban, Isembuk mupusi.’

⁴Kumarna tikanna madèng ibettoh anak i mendokken ‘Bapa’ dekket ‘Inang’, karina kinibèak Damsyik dekket karina harta sinitaban Samaria kennah iembah taba raja Assur.”

⁵Idokken JAHOWA nola mo taba aku, nina mo,

⁶“Itulak bangsa èn ngo laè nong dahan laè Syiloah, janah lolo kalak i midah Raja Rezin dekket Raja Pekah.

⁷Kumerna i aku JAHOWA pasulakken raja Assur dekket karina soridaduna lako menjuhap Juda. Merdalan mo kalak i bagè laè Efrat mengeraja janah mengeremrem linglingna.

⁸Ibarnus kalak i mo Juda bagè laè mengeraja soh mi bergeng bagesna janah mengeremrem karinana.” Dèbata ngo mendengani kita! KabengNa ngkèrbang mengelènggemmi nagerrinta.

⁹Tumpu mo kènè ibagasen mbiar, alè karina bangsa! Dengkohken mo alè punca tanoh èn! Kebbas mo kènè lako mergeraha, tapi ibagasen ukur mbiar!

¹⁰Bahan kènè mo rencana, tapi karina ngo i sondat. Baing mo putusenna, tapi oda ngo merguna i, ai Dèbata ngo mendèngani kami.

¹¹Ikuasai JAHOWA mo aku janah ilumbaken asa ulang kuèkutken dalan sinidalanen bangsa i. Nina mo,

¹²“Ulang iètong ko komploten, kadè siniètong kalak idi komploten, janah ulang kebiari, kadè sinikebiaren kalak idi.

¹³Engèt mo, simbadia ngo Aku JAHOWA Pergegoh Sisotercodi. Pellin Aku ngo kennah kebiarenmu.

¹⁴Kumarna mbadia kalohon ngo Aku, gabè batu bekkas terdengdeng ngo Aku bai kalak Juda dekket Israel, janah to- gong-togong menengkik pengisi Jeru- salem.

¹⁵Nterrem ngo kalak tergempang kerna terdengdeng janah ugahen. Ter- ungkup ngo kalak i mi bagasen togong- togong.”

¹⁶Kènè sisinku kennah memennep dekket mematohi tennah siniberrèken Dèbata bangku.

¹⁷Enggo iboniken JAHOWA dirina bai pemparen si Jakob nai bangsana i, tapi percaya janah mengharap ngo aku bana.

¹⁸En ngo aku dekket dukak siniberrèken Dèbatangku bangku. JAHOWA Pergegoh Sisotercodi ngo memerèntah i Uruk Sion, pasulakken kami gabè tanda-tanda bai bangsa Israel.

¹⁹Tapi mèduk ngo kalak pasulakken kènè lako mengido ajar bai datu-datu simerkosik-kosik dekket mobit-obit. Idokken jelma i mo, “Otang patut ngo kita mengido ajar bai sumangan lako keperluen jelma nggelluh?”

²⁰Bagèèn mo pengaloimu, “Dengkohken pengajari JAHOWA! Barang isè mengerana oda tosè mi peddah i, oda lot harapenna.”

²¹Jelma mpersah janah rapar kumasèbut i nagerri i. Kumerna lèhè melaga-laga mo kalak i, isumpahi mo raja dekket Dèbatana. Mikè pè itengngen kalak i, barang mi dates,

²²barang mi terruh, oda lot kadè idah kalak i, laènken kepenjetten dekket kegellapen bak kinisudah mengayaki. Nai ibuang mo kalak i mi bekkas singgellap i.

²³Tapi oda ngo soh sidekkah-dekkahna nagerri i menggongken kepenjetten i. Nagerri sini-ianen marga Zebulon dekket Naptali nung ngo iètong JAHOWA oda masuk bilangen. Tapi mi podin èn, Ia ngo maing roh penghormaten taba suberri nagerri mulai i laut Tengah nai mi kebincaren soh mi suberrang laè Jordan soh dèng ma mi Galilea sini-ianen kalak sidèban.