Read Batak Dairi Jesaya 9 Bible Online

Jesaya 9 - Batak Dairi bible

Jesaya 9

¹Bangsa simerian ibas kegellapen mengidah cuhaya mbellen. Simerian ibas lenggemmen kematèen ibendangi cuhaya nterrang.

²Alè JAHOWA, enggo iberrè ko bai kalak i sampang atè mbellen ibaing ko kalak i meria-ia kalohon. Mersampang atè kalak i kumarna basa-basaMu bagè sampang atè tikan peranien barang tikan merbagi taban-taban

³Enggo iagoi ko embahen mbotong siampè bana dekket kayu lanjaen siampè mi barana. Enggo italuken ko bangsa penèndes i simemeroh bangsami. Tosè bagè tikki arnia tikan italuken ko soridadu Midian.

⁴Cipatu soridadu simerderap-derap dekket bajuna simersapu daroh, kennah kerri ilekkup api.

⁵Enggo tubuh sada banta dukak, iberrèken banta sada anak. Ia mo gabè rajanta. Ibaing mo gerarna. “Pemeddahi Mpantas”, “Lubalang Dèbata”, “Bapa soh amman sumendah”, “Raja Damè”.

⁶Memerèntah ngo ia bagè Raja pemparen si Daud, kuasana mbelgah kalohon. Nagerrina dak ngo mènak janah damè; pemerèntahenna merdangaen mi hukum dekket ketègerren bagèndari nai soh mi amman sumendah. JAHOWA Pergegoh Sisotercodi pasti pesautken i.

⁷Enggo idabuh JAHOWA hukumen taba kerajaen Israel.

⁸Karina bangsa Israel dekket pengisi Samaria memettoh, JAHOWA ngo mahanken bagidi. Ukum bagèndari tunggang ngo kalak i janah ndates ukurna. Nina kalak i,

⁹“Bages sinibahan ibas batu nai enggo merumpak, tapi kubahan kami nola mo bages rembaru i batu nai. Kayu ara pè enggo itabah, tapi kugancihi kami mo dekket kayu sempènur simendèna i Libanon nai”.

¹⁰Enggo ikebbasi JAHOWA musuh mengalo kalaki.

¹¹Bangsa Siria i kebincaren, bangsa Palistin i kesunduten mengerampas Israel. Tong dèng ngo melaga janah menghukum JAHOWA.

¹²Laju ngo oda peselsel kalak Israel tukasi pè enggo ihukum JAHOWA Pergegoh Sisotercodi; oda dèng ngo kalak i tobat tabasa.

¹³Kumerna i ibagasen sidari sambing ngo ihukum JAHOWA pengulu-pengulu Israel dekket ginemgemna. Igettap janah ipatakken mo takal dekket uitna.

¹⁴Takalna imo pe- ngètua-pengètuai dekket kalak simersangap, uitna imo nabi-nabi simengajarken latlat.

¹⁵Enggo ilalingken pengulu bangsa i ginemgem i janah isompar-baèrken.

¹⁶Enggo laling bangsa i dekket luhlah janah karina kata-katana jahat. Kumernanai sada poda nè anak perana ipaluah JAHOWA. Oda nè masèh atèna midah daberru mbalu dekket simelumang. Tapi tong dèng ngo melaga JAHOWA janah menghukumi.

¹⁷Bagè api mengelekkup ngo kejahaten kalak i mengkeriken rambah dom dori. Perlakatna bagè rambah messeng mercèmpul-cèmpul cèmberna.

¹⁸Melaga kalohon ngo JAHOWA Pergegoh Sisotercodi, hukum sinibaingna bagè api mergollah-gollah gabè bangsa i mo kerri sikira sebbanna. Sada kalak poda mermasèh atè midah kaka anggina.

¹⁹Mersirampas-rampasen mo jelma isuberri nagerri i janah kipangan kadè sambing sindorok ipangan, tapi oda merkebesur-besuren. Salang denganna sendiri pè ipangan ngo.

²⁰Mersijuahapen mo kalak Manasye dekket kalak Efraim, nai rebbak mo kalak i mengalo Juda. Tapi tong dèng ngo melaga JAHOWA janah menghukumi.