Read Batak Dairi 3 Musa 1 Bible Online

3 Musa 1 - Batak Dairi bible

3 Musa 1

¹Ibas Undung-undungNa nai, itenggoi JAHOWA mo si Musa janah iberrèken mo bana hatoren-hatoren

²si kennah uèen kalak Israel. Mula lot sada kalak memèlèken pinakan mahan pèlèen situtungen bai JAHOWA, ndorok ngo ia memèlèken lembu, biri-biri barang pè kambingna.

³Mula sinipèlèken i sada lembu, kennah tonggal ngo pinakan i janah oda mertikas. Kennah i iring ngo lembu idi mi Pèntu Undung-undung JAHOWA, asa lemmo atè JAHOWA taba kalak i.

⁴Ninganna kennah iampèken tanganna i babo takal pinakan i, nai ijalo JAHOWA mo pèlèen i mahan kesèsaen dosana.

⁵Kessa i kennah isèat mo lembu i lebbè Pèntu Undung-undung i. Darohna kennah ipèlèken imam-imam pinempar si Aron bai JAHOWA, nai ipispisken mo mi empat lumpak langgaten sinilebbè pèntu Undung-undung i.

⁶Nai kennah ibebak kalak i janah igatgati mo pinakan i.

⁷Kennah ilakati imam-imam i mo api i babo langgaten ninganna isusun sebban i babona.

⁸Pèlèen sienggo igatgati i, dekket takal bak pessohna kennah igamparken kalak i ibabo api.

⁹Nai kennah iborih kalak i mo bituka dekket paha lembu i janah kennah itutung imam simerkebbas mo karina jukut i. Sennang mo atè JAHOWA menganggoh bau pèlèen situtungen i.

¹⁰Mula sipèlènken idi sada biri-biri barang kambing ngo, kennah tonggal ngo pinakan i janah oda lot tikasna.

¹¹Kennah isèat kalak i pinakan i kettan utara langgaten i, nai ipispisken imam-imam mo darohna mi empat lumpakna langgaten i.

¹²Enggo kessa igatgati pinakan i, karina sinigatgati i dekket takal bak pessohna, kennah iampèken imam i babo api sinilanggaten i.

¹³Nai kennah iborih kalak i mo bituka dekket paha pinakan i. Kessa i kennah ipèlèken imam mo i karina bai JAHOWA, janah itutung i babo langgaten. Sennang mo atè JAHOWA menganggoh bau pèlèen situtungen idi.

¹⁴Mula sada manuk-manuk ngo ipèlèken, kennah manuk-manuk kèrap barang pè ndarapati menguda.

¹⁵Kennah iembah imam ngo manuk-manuk i mi langgaten, nai ipoles mo kerahongna janah itutung mo takalna i babo langgaten i. Kennah ipetiris ngo daroh manuk-manuk i mi ruar gembar dingding langgaten i.

¹⁶Biruruna dekket karina sinna kennah iagoi, janah iambongken mi kettan kebincaren langgaten bekkas cirabun.

¹⁷Nai kennah irampingken mo pangkal kabengna i, tapi oda ndorok nggettap ukum kabengna i. Nai kennah itutung mo manuk-manuk i i babo langgaten i. Sennang mo atè JAHOWA menganggoh bau pèlèen situtungen i.