Read Batak Dairi 3 Musa 12 Bible Online

3 Musa 12 - Batak Dairi bible

3 Musa 12

¹Iberèken JAHOWA mo hatoren-hatoren èn bai si Musa

²lako bai bangsa Israel. Mula lot daberru menubuhken dukak daholi, samur ngo daberru idi sidekkah pitu ari, tosè bagè sinderrang roh pantangen alesna.

³I ari peualuhken kennah itakkil ngo dukakna idi.

⁴Enggo kessa tellupulu tellu ari nai nola, tong dèng ngo melamun daberru idi kumerna tong dèng meniir darohna. Oda ndorok ia menjamah nasa haliu sipakèen lako memoji JAHOWA janah oda ndorok ibengketti Undung-undung JAHOWA soh mi tikki lebbè dung ia menguras.

⁵Mula lot daberru menubuhken dukak daberru, melamun ngo daberru idi sidekkah sipuluh empat ari, tosè bagè sinderrang roh pantangen olesna. Enggo kessa i ennempuluh ennem ari nai nola, tong dèng ngo melamun daberru idi kumerna tong dèng menir darohna.

⁶Nai enggo kessa dung arina menguras, tah pè kumerna enggo menubuhken dukak daholi barang daberru, kennah merembah pèlèen ngo daberru idi bai imam i lebbè pèntu Undung-undung JAHOWA. Pèlèen idi imo sada anak biri-biri merumur sitahun mahan pèlèen situtungen dekket sada ndarapati anè-anè barang kèrap anè-anè mahan pèlèen pengampunen dosa.

⁷Kennah pesakaten imam mo pèlèenna idi bai JAHOWA dekket memahanken kerja lako menguras daberru idi asa gabè mpanting ia. Asa idi mo kennah ulaenken sada kalak daberru enggo kessa ketaring ia.

⁸Mula oda terpepada daberru idi sada anak biri-biri, kennah iembah mo dua ndarapati anè-anè barang pè kèrap anè-anè, sada mo i mahan pèlèen situtungen janah sada nai mahan pèlèen pengampunen dosa. Kennah ibaing imam mo kerja menguras daberru idi, nai gabè panting mo ia.