Read Batak Dairi 3 Musa 13 Bible Online

3 Musa 13 - Batak Dairi bible

3 Musa 13

¹Iberèken JAHOWA mo bai si Musa dekket si Aron hatoren-hatoren èn:

²Mula lot sada kalak mbutul-mbutul i koling dagingna barang baroh tah pè bandul-bandulen; barang riap-riapen dagingna sindorok gabè puru, kennah embahen mo ia mendahi imam pinempar si Aron.

³Kennah iperèso imam mo koling simersakit i. Mula gabè mbentar ngo buk silot ibas sikenna puru i janah si kenna puru i idahen lennengen daripada koling sidèbanna i nai, kenna sakit puru ntengam ngo jelma sibagidi. Nai kennah idokken imam mo ia melamun.

⁴Tapi ukum mbulan ngo rupa koling si kenna puru i janah oda ngkelnoh i koling sidèbanna i nai, janah oda ma gabè mbulan bukbuk ibas sipuruen i, kennah ipejaè lebbè bekkas jelma i sidekkah pitu ari.

⁵I ari pepituken kennah iperèso imam nola mo ia mengolihi. Janah mula bagi-bagi sambing ngo sakit idi oda merkuraraten, kennah tong deng ngo ipejaè bekkasna pitu ari nai dekkahna.

⁶I ari pepituken kennah iperèso imam nola mo ia mengolihi, janah mula enggo makin mersep puruna idi janah oda nè rarat, kennah idokken imam mo enggo mbersih ia. Oda ngo pella merbahaya puruna idi. Nai kennah itaptapi jelma i mo geddana janah gabè mpanting mo ia.

⁷Tapi mula enggo kessa idokken imam mbersih, keppè rarat nola mo mulak sakitna i, kennah balik nola ngo ia menghadep imam.

⁸Kennah iperèso imam nola mo ia, janah mula tuhu ngo mengerarati nola sakitna idi, kennah idokken ngo kalak i melamun; enggo kenna puru merbahaya ia.

⁹Mula lot sada kalak kenna puru merbahaya, kennah iembah ia mendahi imam.

¹⁰Mula mengèkutken pemerèsoen imam lot ibas daging kalak i mbessar janah rupana mbentar bagè bandul janah buk sinisidi gabè mbentar,

¹¹kenna puru merbahaya ngo kalak i. Kennah dokenken imam mo kalak i enggo melamun. Oda pella ipejaè bekkasna kerna enggo tangkas ia melamun.

¹²Mula enggo idah imam simerkalindo mbentar-mbentar i kolingna idi enggo rarat i takalna nai soh mi nènèhna,

¹³janah mengèkutken pemèrèsona enggo rarat sakit i mi karina dagingna janah selli kolingna idi enggo gabè mbulan, dokenkenna mo enggo mpanting jelma i.

¹⁴Tapi mula lot nola buruk, kennah iperèso imam nola ngo ia mengolihi.

¹⁵Mula tuhu ngo i puru, kennah idokken ngo samur jelma i, kumerna kenna puru merbahaya ia.

¹⁶Tapi mula malum puruna i janah gabè mbulan nola mengolihi, kennah laus mo kalak i mengadep imam

¹⁷asa iperèso balik. Mula tuhuna burukna i enggo gabè mbulan dokenken imam mo jelma i mpanting.

¹⁸Mula lot sada kalak barohen tapi engo njuah,

¹⁹tapi tubuh nola ibas ciningna i bandul janah mbentar rupana, barang pè merkalino mbentar narih mbara-mbara, kennah laus ngo jelma i menghadep imam

²⁰asa iperèso. Mula ngkelnoh idahen simerkalino i daripada koling-koling sikulilingna i, janah buk silot i sidi enggo gabè mbentar ma, kennah dokenken imam ngo kalak i enggo melamun. Baroh idi ngo pertebenaen sakit puru merbahaya.

²¹Tapi ukum oda ngo mbulan buk nisidi mengèkutken pemerèsoen imam, janah oda ma ngkelnohen simerkalino i daripada koling sikulilingna i nai, pellin narih mengudaen ngo kessa rupana, kennah ipepunjung ngo bekkasna sidekkah pitu ari.

²²Mula makin mi raratna ngo simerkalino mbulan i, kennah idokken imam ngo enggo melamun jelma i kumerna enggo kenna sakit puru merbahaya ia.

²³Tapi mula oda ngo mobah simerkalino mbentar i janah oda ma merkuraraten, cining baroh i ngo kessa i, jadi mpanting ngo ia dokenken.

²⁴Mula lot sada kalak ugahen kerna messeng, nai gabè mbentar mo koling siugahen i barang mbentar mersakkor mbara,

²⁵kennah iperèso imam mo ia. Mula gabè mbentar buk silot i si janah ngkelnohen koling ugah i daripada koling sikulilingna, enggo gabè langket sakit puru merbahaya ibas ugah simesseng idi, janah melamun mo jelma i dokenken imam.

²⁶Tapi mula oda ngo pella gabè mbentar buk silot i si janah oda ma pella ngkelnohen daripada koling sikulilingna i nai, pellin narih mengudaen ngo kessa tengenen, kennah ipepunjung mo bekkasna sidekkah pitu ari.

²⁷I ari pepituken kennah iperèso imam mo mengolihi. Mula makin rarat ngo simerkalino mbentar i, kenna puru simerbahaya ngo enggo ia, janah melamun mo ia dokenken.

²⁸Tapi mula oda ngo mobah simerkalino mbentar idi janah oda ma mengerarati, pellin narih mbentaren ngo kessa rupana, oda ngo sakit puru simerbahaya ukum idi. Kennah idokken imam ngo mpanting ia, kumerna rupa simbentar idi pellin cining ugah messeng idi ngo kessa i.

²⁹Mula lot sada kalak anak laki barang daberru buruken takalna barang pè ipas isangna,

³⁰kennah iperèso imam ngo ia. Mula enggo lennengen tengennen ugah sinikolingna i daripada i sikulilingna i, janah buk bang pè janggut silot i si bagè narih nggersing-nggersing bana merurusen, enggo mo kenna sakit puru merbahaya ia janah kennah mo idokken melamun ia.

³¹Mula mengèkutken pemerèsoen imam oda pella ngkelnohen koling simersakit i daripada koling sikulilingna, tapi oda lot buk barang pè janggut simendè tengenen i bekkas i, kennah ipepunjung bekkas kalak i sidekkah pitu ari.

³²I ari pepituken, kennah iperèso imam ngo mengolihi simersakit i, janah mula oda ngo pella rarat sakit i janah buk barang janggutna oda nggersing tengenen i bekkas i, janah oda ma pella ngkelnohen kolingna daripada koling sikulilingna,

³³kennah icukkur ngo bukna barang janggutna i sikuliling simersakit i. Nai kennah ipepunjung dèng ngo ia sidekkah pitu ari nai.

³⁴Ibas ari pepituken, kennah iperèso imam ngo ia mengolihi. Mula oda ngo megerarati sakitna idi janah oda ma pella ngkelnohen idahen i koling sikulilingna nai, idokken mo ia enggo mpanting janah kennah itaptapi ngo geddana.

³⁵Tapi mula enggo idokken ia mpanting kepèken mengerarati nola sakitna idi,

³⁶kennah iperèso imam nola mo ia mengolihi. Mula tuhu ngo rarat sakit i, oda pella perlu nèngè iperèso imam tah nggersing buk barang janggut kalak i, kerna enggo ntangkas melamun ia.

³⁷Tapi mula oda ngo rarat sakitna i mengèkutken pemerèsoen imam, janah mendè ngo turah buk barang pè janggutna i bekkas i, imo magahken enggo malum sakit idi, janah kennah idokken imam mo enggo mpanting ia.

³⁸Mula lot sada kalak anak laki barang daberru kenna riap-riap mbentar ibas kolingna,

³⁹kennah iperèso imam ngo kalak i. Mula narih ialang ngo mbentarna idahen riap-riap i, pellin i langketti gurap ngo kessa ia i, janah dokenken ngo ia mbersih.

⁴⁰Mula lot sada kalak anak laki gabè mbolsih kettan podi barang kettan perdempaken takalna, oda ngo pella memaing gabè melamun ia kumarna simbolsih i.

⁴¹

⁴²Tapi mula lot nola mbessar bagè mbentar janah narih mbara-mbara ibas simbolsih idi, enggo kenna sakit puru simerbahaya ia.

⁴³Kennah iperèso imam ngo jelma i, janah mula tuhuna ngo lot mbessar bagè mbentar janah mbara-mbara,

⁴⁴kennah melamun ngo ia dokenken imam kumarna enggo kenna sakit puru merbahaya i takalna.

⁴⁵Sada kalak sikenna sakit puru merbahaya, kennah merpakèen ompak ampik janah bukna pè ibelli merbulut. Kennah itutupi abèna kettan terruh janah idilo-diloken, “Melamun! Melamun!”

⁴⁶Melamun ngo ia sidekkah menggongken sakit idi janah kennah merian i ruar perundung-undungen ngo ia, ndaoh i bekkas jelma nterrem nai.

⁴⁷Mula lot mocip taridah ipas pakèen barang ipas kaèn wol nai barang pè ipas kaèn linen nai,

⁴⁸barang i pas bebak bak barang kadè sambing sinibahan ipas bebak nai,

⁴⁹janah rupa simocip i narih meratah barang narih mbara, nggèut ngo langket simocip sibagidi jadi kennah ipacidah ngo i bai imam.

⁵⁰Kennah iperèso imam ngo gedda idi, ipepunjung bekkasna sidekkah pitu ari.

⁵¹Ibas ari pepituken kennah iperèso nola mengolihi, janah mula rarat ngo simocip idi, melamun ngo barang idi.

⁵²Kennah itutung imam ngo barang idi, kerna uè ngo langket mocipna i, jadi kennah ilekkup kerri merkitè api.

⁵³Tapi mula oda ngo mengerarati simocip i ibas oles idi mengèkutken pemerèsoen imam,

⁵⁴idokken mo asa itaptapi oles idi janah ipejaè mi bekkas sidèban sidekkah pitu ari nai.

⁵⁵Nai kennah iperèso imam nola mo mengolihi. Mula oda ngo makin rarat simocip idi, tapi tong dos rupana melamun ngo tong oles idi janah kennah ilekkup mula pè simocip idi teridah pellin kettan lebbè barang kettan podina.

⁵⁶Tapi mula enggo mersep si mocip idi mengèkutken pemèrèsoen imam, kennah ribakenken ngo kaèn barang bebak simocip i.

⁵⁷Mula mengolihi nola, janah gabè rarat simocip idi, kennah ilekkup sidasa i ngo geddana idi.

⁵⁸Tapi mula itaptapi kessa, gabè masap rupa simocip i ibas oles idi nai, kennah itaptapi nola ngo oles idi, nai ipè asa iètong mpanting.

⁵⁹Bagidi mo hatoren tersèngèt mula lot teridah mocip ipas oles barang ibas kaèn linen barang wol nai barang ipas kadè sambing tupèh sinibahan ibas bebak nai.