Read Batak Dairi 3 Musa 19 Bible Online

3 Musa 19 - Batak Dairi bible

3 Musa 19

¹Idokken JAHOWA mo si Musa

²pe- sakatken bai bangsa Israel patiin ènda, “Kennah mbadia ngo kènè, kumerna mbadia ngo Aku JAHOWA Dèbata ndènè.

³Karina jelma kennah pesangapken bapa inangna janah mengerayaken ari Sabat ba- gè si Kuperèntahken. Aku ngo JAHOWA Dèbata ndènè.

⁴Ulang mersembah taba gana-ganaen. Ulang menggana gana-gana ipas tembaga nai dekket menembahsa. Aku ngo JAHOWA Dèbatamu.

⁵Mula ipèlèken kènè pinakan mahan pèlèen perdamèen, èkutken mo hatoren siKuberèken, asa Kujalo pèlèen idi.

⁶Jukutna kennah ipangan i arinkenna isèat pinakan idi barang sibarembenkenna. Jukut sitadingna dèng i ari petelluken kennah ilekkup kerri, kumerna enggo haram jukut idi.

⁷Mula ipa- ngan dèng tong jukut idi, oda Kujalo pèlèen idi.

⁸Mersalah ngo barang isè sikipangan jukut idi kumerna oda ihargai barang kadè simerkedekoen taba Aku. Kalak sibagidi oda nè Kuètong bilangen bangsangKu.

⁹Mula merani kènè, ulang pella potik pagè situbuh i biding-biding juma ndènè, janah ulang ulaki nèngè pepulungken pagè turiangna enggo kessa dung peranin.

¹⁰Ulang nè ulaki mi pekken anggur ndènè lako pepulungken buah anggur sitadingna dèng enggo kessa ibuat kènè hasil buahna perlebbè. Bagi ma buahna sienggo merdabuhen ulang buat kènè nèngè. Belli kènè mo idi bai kalak sincor dekket kalak sidèban. Aku ngo JAHOWA Dèbata ndènè.

¹¹Ulang menangko, menipu barang pè merluap.

¹²Ulang merjandi merkitè gerarKu mula oda ngo katèmu igarar ko jandi idi, kumerna merkitè bagidi enggo ilèai kènè gerarKu. Aku ngo JAHOWA Dèbata ndènè.

¹³Ulang memerroh kaltuna barang pè mengerampasi hartana. Ulang cèkèpi kènè upah simengula rebbak kènè, agia barang sada berngin sambing pè.

¹⁴Ulang sumpahi kalak sitongkik janah ulang bakin batu i lebbè kalak sipètung maingsa gabè terdengdeng. Kennah mehator janah merkebiaren kènè taba Aku, ai Aku ngo JAHOWA Dèbata ndènè.

¹⁵Kennah ntèger kènè mendabuh hukum; ulang merpihak taba kalak sincor janah ulang mbiar midah kalak sibèak.

¹⁶Ulang mo ruapken kata siso tuhu peroha-rohaken denganmu sada bangsa, asa ulang gabè kènè mengkerohken kematèen bai dengan ndènè jelma. Aku ngo JAHOWA.

¹⁷Ulang mo merhellem bai barang isè pè. Selangsaèken mo perselisihenmu barang bai isè sambing, asa ulang merdosa kono kumernaken kalak sidèban.

¹⁸Ulang bales dendam janah ulang merceggo-atè taba sidèban, tapi kekelengi mo denganmi bagè pengkekelengi mi diri ndènè sendiri. Aku ngo JAHOWA.

¹⁹Uèi kènè mo perèntahKu. Ulang pekabin pinakan siso dos matcamna. Ulang menuan dua bagè bennih ibas sinterpuk juma. Ulang memakè gedda sinitennun ipas dua bagè bennang nai.

²⁰Mula lot sada kalak anak laki menjandiken naing merdèa hambana daberru bai anak laki sidèban mahan siterbuangna, janah kalak sinaing menokor hamba idi oda dèng menggarar tokorna, nai mercampur nola mo indukna perlebbè idi kin dekket hamba idi, kennah ihukum ngo kalak i sidua, tapi oda ndorok ihukum matè, kumerna barang bakunè pè tong dèng ngo hambana daberru idi.

²¹Kennah itaruhken anak laki idi sada biri-biri tonggal mi lebbè pèntu Undung-undungKu mahan pèlèen gancih kerogien.

²²Kennah ipèlèken imam ngo biri-biri tikan kerja menguras, asa iampuni dosa kalak i. Nai Aku Dèbata mo menasa dosana.

²³Mula enggo mbengket kènè mi tanoh Kanaan janah menuan mermatcam bagè suan-suanen merbuah i sidi, sidekkah sitellu tahun perlebbè merbuah kennah ètongen ndènè haram ngo buahna idi janah oda ndorok panganen ndènè.

²⁴I tahun pe-empatken karina buahna kennah ipèlèken lako mendokken lias atè ndènè taba Aku, JAHOWA.

²⁵I tahun pelimaken pè asa ndorok kènè kipangan buahna. Mula iulaken kènè karina hatoren i, makin ratraten mo suan-suanen ndènè i. Aku ngo JAHOWA Dèbata ndènè.

²⁶Ulang pangan daroh. Ulang patohi helmu kinangguruen.

²⁷Ulang gonting buk sinitakal ndènè barang pè mencukkur janggut ndènè.

²⁸Ulang turahi koling ndènè lako memakin tanda-tanda barang pè mengugahi daging ndènè sikira tanda bonek kumerna lot kalak simatè. Aku ngo JAHOWA.

²⁹Ulang kurangi sangap berru ndènè merkitè memaing kalak idi gabè daberru perkendangen i rumah santi. Mula bagi ibakin kènè gabè ngkemmer ngo kuta ndènè, janah makin gandana ngo pengelako siso merjullat i bekkas i.

³⁰Rayaken mo ari Sabat janah hormati mo bekkas sienggo ikelini lako menembah Aku. Aku ngo JAHOWA.

³¹Ulang laus mengido ajar bai nangguru singgèut pesellukken sumangan sienggo matè. Mula iulaken kènè sibagidi gabè melamun mo kènè. Aku ngo JAHOWA Dèbata ndènè.

³²Kebiari janah pesangap mo kalak sienggo tua-tua. Naing mo nemmuken mehator janah merkebiaren kènè midah Aku, kumerna Aku ngo JAHOWA.

³³Ulang memahan siso puna-puna taba kalak sidèban simerian i nagerrimu.

³⁴Bakin mo taba kalak idi bagè pemakin ndènè taba dengan ndènè sada bangsa janah kekelengi mo kalak idi bagè mengkekelengi diri ndènè sendiri. Èngèt mo, kene pe pennah ngo mendampin bage kalak sideban i tanoh Mesir. Aku ngo JAHOWA Dèbatamu.

³⁵Ulang tipu kalak sidèban merkitè tuluk, dacing barang pè sellup palsu.

³⁶Pakè mo sibar-sibar, dacing dekket sellup situhuna. Aku ngo JAHOWA Dèbata ndènè, janah enggo Kuarak kènè karuar i Mesir nai.

³⁷Uèi mo nasa hukum dekket perèntahKu. Aku ngo JAHOWA.”