Read Batak Dairi 3 Musa 20 Bible Online

3 Musa 20 - Batak Dairi bible

3 Musa 20

¹Idokken JAHOWA mo si Musa

²mendokken bagèen taba bangsa Israel, “Barang isè i tengah-tengah ndènè nai barang kalak sidèban simerian i tengah-tengah ndènè memèlèken dukakna bai Molokh, kennah ibentiri jelma nterrem ia dekket batu soh matè.

³Kalak simemèlèken dukakna bai Molokh mengeramuni Undung-undungKu janah mengelèai gerarKu simbadia i ngo i. Kuhukum ngo ia janah oda nè Kuètong bilangen bangsangKu.

⁴Mula ibelli-belli jelma nterrem i ulah-ulah jelma bagidi, janah oda ia ihukum matè,

⁵Aku sendiri mo menghukumsa, karina simpangansa, bak karina sirebbak dekketsa simenadingken Aku, janah gabè menembah Molokh. Oda nè mo Kuètong kalak idi bilangen bangsangKu.

⁶Kalak silaus mengido ajar taba nangguru sipesellukken sumangan kalak sienggo matè kennah Kuhukum janah oda nè Kuètong bilangen bangsangKu.

⁷Jagaken kènè mo diri ndènè asa tong badia kènè, kumerna Aku ngo JAHOWA Dèbata ndènè.

⁸Uèi kènè ma mo pati-patinKu, kumerna Aku ngo JAHOWA Dèbata ndènè simemilih kènè gabè milikKu.”

⁹Iberèken JAHOWA mo hatoren-hatoren ènda, “Kalak simenumpahi bapana barang pè inangna kennah ihukum matè. Matè mo ia kumerna salahna sendiri.

¹⁰Mula lot sada kalak Israel merlangkah julu meddem dekket sinibages denganna sada bangsa, kennah ihukum matè ngo ia dekket daberru idi.

¹¹Sada kalak anak laki simercampur dekket sinibages bapana, mengerampas hak bapana ngo i. Kennah ihukum matè ngo anak laki dekket daberru idi. Matè mo kalak i kumerna salah kalak i sendiri.

¹²Mula lot sada kalak anak laki mercampur dekket purmaènna, kennah ihukum matè ngo kalak i duana. Enggo merlangkah julu meddem kalak i, janah matè kumernaken salah kalak i sendiri.

¹³Mula lot sada kalak anak laki mercampur dekket anak laki sidèban, luhlah janah hina ngo ulah-ulah kalak idi, janah kennah ihukum matè ngo kalak i duana. Matè mo kalak i kumernaken salahna sendiri.

¹⁴Mula lot sada kalak anak laki kabin dekket sada kalak daberru bak inang daberru i, telluna kalak i kennah itutung soh matè, kumerna mengulaken siso puna-puna ngo kalak i. Oda ndorok lot perulaen sibagidi i tengah-tengah ndènè.

¹⁵Mula lot sada kalak anak laki mercampur dekket binatang, kennah patènken ngo jelma sibagidi dekket binatang idi.

¹⁶Mula lot sada kalak daberru mercampur dekket binatang, kennah ipatèken ngo daberru dekket binatang idi. Matè mo kalak i kumerna salah kalak i sendiri.

¹⁷Mula sada kalak anak laki mercampur dekket turangna barang pè dekket turangna sinama barang sada inang jaè bapa, oda nè ètongen kalak i bilangen bangsangKu. Enggo mengulaken perulaen siso puna-puna kalak i janah kennah igongken akibatna.

¹⁸Mula sada kalak anak laki mercampur dekket sada kalak daberru tupung roh pantangen olesna oda nè ètongen kalak idi bilangen bangsangKu.

¹⁹Mula lot sada kalak anak laki mercampur dekket namberruna, kennah duana ngo kalak i menggongken akibat ulah-ulah kalak idi.

²⁰Mula sada kalak anak laki mercampur dekket nampuhunna, mengelèai puhunna idi ngo ia i si. Kennah gongenken anak laki dekket daberru idi ngo hukumenna. Soh matè kalak idi oda merdukak.

²¹Mula sada kalak anak laki mengerampas sinibuat dengan sibeltekna, mengelèai dengan sibeltekna i ngo ia isi, janah mengulaken siso puna-puna. Soh matè mo kalak i oda merdukak.”

²²Nina JAHOWA ngo, “Uèi mo karina hukum dekket perèntahKu, asa ulang ipelaus kènè i nagerri Kanaan nai ai mi si ngo kènè Kuembah.

²³Ulang kènè mengosih adat kecemmalen bangsa simerian i sidi. Moyang ngo atèngKu mengidah perulaen kalak i si jahat i. Idi ngo kulih sebabna memaing Kupelaus kalak i, asa ndorok kènè mbengket mi nagerri idi.

²⁴Tanoh kaya janah nggabur idi enggo Kuperbagah kin bai ndènè, nai Kuberèken bai ndènè gabè milik ndènè. Aku ngo JAHOWA Dèbata ndènè simenirang kènè i bangsa-bangsa sidèban nai.

²⁵Kumernakenna idi kennah tandaen ndènè ngo tangkas binatang haram dekket siso haram. Ulang pangan kènè binatang haram. Aku ngo mendokken haram binatang idi, jadi mula ipangan kènè idi gabè melamun mo kènè.

²⁶Kusirang ngo kènè i bangsa sidèban nai asa gabè milikKu kènè. Kennah mbadia ngo kènè, kumerna Aku ngo JAHOWA, janah mbadia ngo Aku.

²⁷Barang isè daholi barang daberru sipeselukken sumangan kennah bentiren dekket batu soh matè. Matè mo kalak i kumernaken salahna sendiri.”